قانمەن جازىلعان كىتاپ : قازاقتىڭ تىلىندە سويلەۋدى ماسقارالىق كورەتىن سالت قايدان شىعىپ وتىر؟
شىعارما وقىرماندار تاراپىنان جوعارى سۇرانىسقا يە بولدى. ءبىز الداعى ۋاقىتتا باتىردىڭ «قانمەن جازىلعان كىتابىن» سىزدەرمەن بىرگە وقۋدى ءجون كورىپ وتىرمىز.
وتتى جىلداردا قان كەشە ءجۇرىپ، قان- تەرىن سارقىپ، بولاشاققا امانات رەتىندە قالدىرعان جازۋشىنىڭ بۇل ەڭبەگى جاستاردى پاتريوتيزمگە، ەرلىك- جىگەرگە، ادامگەرشىلىككە تاربيەلەيتىن ونەگەلى ءومىر مەكتەبى بولارى انىق.
***
وسىندا بولعاننان بەرى ءبىرقاتار جايدى كورىپ، سەزدىم. ءبىرقاتار ادامدار تىم ۇزاق، ءوز قاراباسىندىق ماقساتتان جوعارى ەمەس. بۇكىل ەلدىڭ، حالىقتىڭ قامى دەگەندى مۇلدە ۇمىتقان. وپەرا تەاترىنىڭ حورىندا قازاق ءانىن ايتاتىن انشىلەر قالماعانىن نە دەيسىڭدەر، حالىق جايىن كەڭىنەن ويلاپ، تولعاپ پىشەتىن ەلدىڭ نامىسى قايدا؟ ءبىز كىم ەدىك، كىمبىز، كىم بولامىز دەگەن سۇراۋلار ءالى كۇنگە جاۋاپسىز قالىپ كەتىپ بارا جاتقان جوق پا؟ ءتىپتى ءوزىنىڭ قازاق ەكەنىن ۇمىتىپ بارا جاتقاندارىڭ كوپ ەمەس پە؟ قازاقپىن دەپ ماقتانۋدى ار كورەتىن، قازاقتىڭ تىلىندە سويلەۋدى ماسقارالىق كورەتىن سالت قايدان شىعىپ وتىر؟ بالالاردىڭ كوبى نە قازاق، نە ورىس بولىپ تاربيەلەنبەي، شورە- شورە بىردەمە بولىپ ءوسىپ جاتقانىن نەگە كورمەيسىڭدەر؟ وسىلاردى كۇيىنىپ ايتقاندا مەنىكى قازاق حالقى دا سوۆەتتىك وتانىمىزداعى باسقا ەلدەردىڭ قاتارىندا جەتىلگەن - ۇلتتىق داڭقىن، سالتىن تولىق ءبىلدىرىپ ماقتانا الاتىن ەل بولۋىنا تىلەك ايتىپ وتىرعاندىق قوي.
ەلدى، جاستاردى، حالىقتىڭ ىزگى، جاقسى ادامگەرشىلىك سالتىندا تاربيەلەۋ، بۇگىنگى مادەنيەتتى حالىقتىڭ كونە مادەنيەتىمەن ۇشتاستىرىپ دامىتۋ قاجەت ەكەنىن ۇعىنۋ كەرەك ەمەس پە؟ «گۆارديا، العا» سياقتىلار - جاڭا مادەنيەت، اقيقات شىعارما ەمەس، جالعان، بۇگىنگى شىندىققا كارريكاتۋرا.
سونىمەن، بەكتىڭ كەلۋىنە ورالايىن. بۇل جولى مەن ونى سوككەن جوقپىن. ول ماعان دارمەنسىز كۇيدە كەلگەن ەدى. مەن وعان ەشقانداي دا تىك مىنەزدىلىك كورسەتكەن جوقپىن، ول مەنەن ريزا كوڭىلمەن اتتانىپ كەتتى. مۇنى كاپيتان قۇرمانبەك ساعىندىقوۆ تا راستاي الادى. نويابر ايىنىڭ سوڭىندا مەن موسكۆاعا كەلدىم. مەنىڭ كەلۋ قارساڭىمدا بەك ەكىنشى پوۆەستىڭ ەكىنشى نۇسقاسىن اياقتاپ قالعان ەكەن. ەكىنشى پوۆەست بىرىنشىسىنە قاراعاندا، ءسوز جوق، جاقسى شىققان، ءبىراق ءالى دە بولسا ويداعىداي ەمەس- ءتى. ءبىز ەكى اپتاداي ۋاقىت باس كوتەرمەي قولجازبانى وڭدەپ، جەتىلدىرىپ جۇمىس ىستەدىك.
وسى جەردە جازۋشىلار وداعى بەكتىڭ پوۆەسىن ءجونسىز تالقىلاۋدى ويلاستىرادى. بەك بولسا قاتتى ابىرجىدى، ءتىپتى بۇل تالقىلاۋدان جۇرەكسىندى دە، ءسويتىپ مەنىڭ قاتىسۋىمدى قيىلا ءوتىندى. ءوزىنىڭ ءوتىنىشىن ول بىردە- ءبىر اسكەري جانە اسكەري پسيحولوگيالىق سۇراقتارعا جاۋاپ بەرە المايتىنىن ايتىپ دالەلدەدى (ال ول بولسا تالقىلاۋدا وسى ماسەلەلەر باستى نازاردا بولاتىنىنا سەنىمدى بولاتىن) . مەن كەلىسىم بەرمەدىم.
- مەنىڭ ەندى ءبىر توپ قىزىققۇمار موسكۆالىقتارمەن اۋرە بولۋىم قالعان ەكەن عوي. سىزبەنەن بىرگە اۋرە سارساڭمەن جۇرگەنىم دە جەتەر، - دەدىم بەككە. وسى جەردە ول ادىلەتسىزدىك، زىمياندىق جاسادى: ەكى كۇننەن سوڭ ول حابارلاندىرۋ باسىلعان گازەتتى الىپ كەلدى، وندا 8 -دەكابردە جازۋشىلار وداعىنىڭ كلۋبىندا كىتاپتىڭ تالقىلاناتىندىعى جانە وعان مەنىڭ قاتىساتىنىم جازىلىپتى. مەن رەنىش ءبىلدىردىم.
بەك قۋلانا جىميىپ:
- كلۋبتا ۇلكەن حابارلاندىرۋ ءىلۋلى ءتۇر، وندا ءسىزدىڭ فاميلياڭىز ءىرى ارىپتەرمەن بادىرايتىپ جازىلىپ قويىلعان، - دەپ ءسوزىن جالعاستىردى.
بۇل تالقىلاۋعا ەشبىر دايىندىقسىز بارۋىما تۋرا كەلدى. حالىق كوپ جينالعان ەكەن. قىزىققۇمار موسكۆالىقتار مەن موسكۆالىق بيكەشتەر مەنى كوزدەرىمەن ءىشىپ- جەپ بارادى. تالقىلاۋدى گەنەرال- لەيتەنانت يگناتيەۆ اشتى. سونان سوڭ ءسوز بەككە بەرىلدى. ءبىراق ول وسى جەردە دە زىمياندىق جاسادى: ءبىرىنشى تاراۋدى وقىپ شىققاننان كەيىن باسقا ەشنارسە ايتا المايتىنىن، ويتكەنى پولكوۆنيك باۋىرجان مومىش ۇلى ونىڭ اڭگىمەسىن وزىنەن گورى جاقسىلاپ ايتىپ بەرەتىنىن، اۋديتوريانى قىزىقتىراتىن بارلىق سۇراقتارعا جاۋاپ بەرەتىنىن ايتتى. وتىرعان جۇرت دۋ قول شاپالاقتادى. مەن تريبۋنادا جۇرتشىلىقتىڭ الدىندا ءبىر جاپىراق قاعازسىز قۇر قول تۇرمىن.. .
تالقىلاۋدىڭ ستەنوگرامماسىن بىرەر كۇندە الىپ قالارسىزدار. مەن سىزدەر سۇراعاننان كەيىن تەك قانا ءوزىمنىڭ سويلەگەن ءسوزىمنىڭ ستەنوگرامماسىن الا كەلدىم. اۋىتقىپ كەتپەس ءۇشىن ونى جاي وقىپ بەرەيىن. ءوزىنىڭ سويلەگەن ءسوزىنىڭ ستەنوگرامماسىن وقيدى) .
بەكپەنەن ءوزارا قارىم- قاتىناسىمىز بەن «ارپالىستىڭ» جاعدايى قازىرشە وسىنداي. كەيبىر ماسەلەلەر جونىندە سىزدەردى «ارپالىس» پوۆەسىنە ءجيى سىلتەۋىمنىڭ سەبەبىن وسىدان تۇسىنە جاتارسىزدار. ءوز سوزىممەن تاقىرىپتى قورىتىندىلايمىن. ارتىلعان ۋاقىتتى سۇراقتارعا قالدىرايىق. مەن سىزدەرگە بىرنارسە وقىپ بەرەيىن دەپ نيەتتەنىپ ەدىم. سونى سىزدەرگە وقىپ بەرەيىن.
«ءبىر نارسەنى ىستەي الۋ ءۇشىن نە ىستەۋ كەرەكتىگىن ءبىلىپ الۋ كەرەك - دەمەك، زەرتتەپ ءبىلۋ قاجەت. زەرتتەپ بىلمەيىنشە ءبىلۋ دە، ىستەي الۋ دا مۇمكىن ەمەس» . ارميا قازىرگى زامانعى تەحنيكامەن قانشالىقتى باقايشاعىنا دەيىن قارۋلانعانىمەن، ەگەر ونىڭ ادام قۇرامى جان- جاقتى جاۋىنگەرلىك دايارلىقتان وتپەگەن بولسا، ال وفيتسەرلەرى اسكەرلەردى، تەحنيكالاردى جانە قارۋ- جاراقتاردى باسقارا ءبىلۋ ءادىس- تاسىلدەرىن ناشار يگەرگەن بولسا، وندا ارميا پايداسىز توبىر كۇيىندە قالادى، ءارى دۇشپاننىڭ مىقتاپ تۇرىپ بەرگەن العاشقى سوققىسىنان- اق بىت- شىت بولىپ، بۇرشاقشا بىتىراپ كەتەدى. ماشىقتانعان ارميا ءۇشىن ۇرىسقا كىرۋ، شايقاسۋ - جاۋىنگەرلىك قاسيەتتەردى العاشقى قاجەتتى سىناقتان وتكىزۋ بولماق، مۇنىڭ ءوزى اسكەرلەردى كەيىنگى جاۋىنگەرلىك قيمىلدار ءۇشىن ەداۋىر اسا ماڭىزدى ءمانى بولاتىن اسكەري شىنىعۋدان، شىڭدالۋدان دا وتكىزۋ بولماق. العاشقى ۇرىس كەيىنگى جاۋىنگەرلىك قيمىلداردىڭ قالاي بولاتىنىن دا كورسەتەدى. اسكەرلەردى العاشقى ۇرىستا قالاي بولعان كۇندە دە، مىندەتتى تۇردە جەڭىپ، ۇتىپ شىعۋعا ۇيرەتۋ، دايارلاۋ قاجەت.
1. ستەنوگرامما «مايداننان جازىلعان حاتتار» ءبولىمىندە بەرىلدى. تاجىريبە مەن جەكە باقىلاۋلارىمنان بايقاعاندارىمنان قىسقا تۇردە مىنا ماسەلەلەردى ايتا كەتۋدى قاجەت دەپ ەسەپتەيمىن. وقۋ- جاتتىعۋدى اسكەرگە شاقىرىلعان العاشقى پۋنكتتەن باستاپ ءبىرىنشى جەڭىسكە جەتكەن شابۋىلعا دەيىنگى ارالىقتا ۇيىمداستىرا ءبىلۋ قاجەت. جاۋدان تارتىپ الىنعان شەپتە بەكىنىپ قالۋعا دا ۇيرەنگەن ءجون، ۇيرەنۋ، شىنىعۋ ءارى ەسەيۋ ءۇشىن سوعىسا ءبىل. بىردە- ءبىر «بەيبىت» ءارى بىردە- ءبىر جاۋىنگەرلىك كۇن وقۋسىز، ۇيرەنۋسىز، جاتتىعۋسىز بوسقا وتپەسىن. (بىزدەر كوبلياكيدە شيكى ماتەريالدى جاڭادان الىنعانداردىڭ بەس كۇندىك «اكادەمياسىندا» قالاي ۇيرەتكەندىگىمىز جونىندە - بۇل تاجىريبەنى ەگجەي- تەگجەيلى سيپاتتاپ جازۋ كەرەك) . اسكەرلەردىڭ جاۋىنگەرلىك ازىرلىگى مەن سوعىسقا جارامدىلىعىنىڭ نەگىزى - ءاربىر سولداتتىڭ جاۋىنگەرلىك ازىرلىگىنىڭ جانە سوعىسقا جارامدىلىعىنىڭ نەگىزى بولىپ تابىلادى. ۇرىس دالاسىنداعى مىندەتتى شتاب نەمەسە شەشىم قابىلداعان كومانديردىڭ ويى تۇجىرىمدالعان كارتا ەمەس، جاۋىنگەرلىك ازىرلىك، دايارلىق شەشەدى. ەگەر سولداتتىڭ دايارلىعى ناشار بولسا، كومانديردىڭ جاقسى دا پاراساتتى شەشىمى تۇككە اسپاي قالادى، كەرىسىنشە، ەگەر جاۋىنگەرلەر جاقسى دايارلىقتان وتكەن بولسا، ورتاشا شەشىمنىڭ ءوزىن وتە جاقسى ناتيجەگە جەتكىزۋگە بولادى. «جاۋىنگەردىڭ جاقسى ازىرلىگى - جەڭىسكە باستاما، مۇرىندىق» . جاۋىنگەرلەر مەن كومانديرلەردىڭ اسكەري ادامگەرشىلىك بەينەسىن قالىپتاستىرۋدى، جاۋىنگەرلەردىڭ بويىندا جاۋىنگەرلىك قاسيەتتەردى تاربيەلەۋدى بىزدە ءجيى داعدىلى ىسكە اينالدىرعانداي اڭگىمە جۇرگىزۋ مەن باياندامالار وقىپ بەرۋمەن شەكتەۋگە بولمايدى، قايتا سولدات كاسىبىنە جەرگىلىكتى جەردە، ناقتى جابدىقتالىنعان پوليگوندا، كەز كەلگەن شارتتى نارسەلەردەن قاشىپ، جاۋىنگەرلەر مەن كومانديرلەرگە قاجىر- قايراتى مەن اقىل- وي كۇشىنە ناعىز جاۋىنگەرلىك سالماق ارتا وتىرىپ، پراكتيكالىق تۇرعىدان ۇيرەتىپ- جاتتىقتىرۋ قاجەت.
وكىنىشكە وراي، ءبىزدىڭ كوپتەگەن اعا باستىقتارىمىز بويىنا ءسىڭىپ قالعان زياندى، مادەنيەتسىز ادەتتەن - قاراماعىنداعىلارعا وفيتسەردىڭ، تاربيەشىنىڭ، ۇستازدىڭ، باستىقتىڭ ابىرويىنا سىيىسپايتىن، اقىرىندا ازاماتتىق، اسكەري جانە ازاماتتىق ءومىردىڭ ادەت پەن نورمالارىنان شىعىپ كەتەتىن دورەكىلىكتەن زارداپ شەگىپ كەلەدى، ولاردىڭ وزدەرى دە ماسەلەنى شەشۋدە از، اياعىنا دەيىن زەرتتەپ تەرەڭىرەك ويلانبايدى، اۋزىنان شىققان ءسوزى مەن ايتقان ويىنا ءمان بەرمەيدى، ءۇزىلدى- كەسىلدى تۇردە، كەيدە باقىرىپ، ادامداردى قاعىتپا سوزبەن كەكەپ، ءجونسىز دورەكىلىك كورسەتىپ ورىنسىز بالاعاتتايدى. وسىنداي باستىقتار وزدەرىنىڭ مادەنيەتسىزدىكتەرىن قاراماعىنداعىلارعا ءۇزىلدى- كەسىلدى اقىل ايتۋشىلاردى، دورەكىلەردى، «ناۋبايشىلاردى» جاقسى، تالاپ قويعىش كومانديرلەر دەپ ايتىپ، تاراتادى. مۇنىڭ ءوزى ءسوزسىز اقىماقتىق باعا ەكەنىن ولار ۇقپايدى. ولار ءوزىنىڭ ويىن ابدەن ەكشەلگەن، شاعىم بەرۋگە جاتپايتىن پىكىر دەپ ەسەپتەپ، وزگەلەردىڭ ويىن ەلەمەيدى، باسقالاردىڭ ۇسىنىستارىمەن، اقىل- كەڭەستەرىمەن ەسەپتەسپەيدى. مۇنداي ءوزىن- ءوزى دارىپتەۋشىلىك - ءوز كۇشى مەن قابىلەتىن تىم اسىرا باعالاۋشىلىق. مورالدىق جانە قاجىر- قايرات جاعىنان مىقتى بولۋعا تاربيەلەۋ ۇنەمى ادام جانىنا ۇڭىلە ءبىلۋدى، وعان نازار اۋدارىپ وتىرۋدى، يگىلىكتى قۇلشىنىستارعا قاناتتاندىرىپ، ەرىك- كۇشىن، ادامگەرشىلىك، مورالدىق، قاجىر- قايراتىن، اقىل- وي قابىلەتىن نىعايتۋدى، ادامنىڭ ادامگەرشىلىگىن جەكە جانە ۇلتتىق ماقتانىش سەزىمىن سانالى تۇردە ءتۇسىنۋدى، ءوزىنىڭ كۇش- قۋاتى مەن قابىلەت- قارىمىنا دەگەن كوزى ابدەن جەتكەن سەنىمدىلىگىن جانە ءاربىر سولداتتىڭ ءوز قارۋ- جاراعىنا دەگەن سەنىمدىلىگىن نىعايتۋدى تالاپ ەتەدى. توزىمدىلىكپەن جانە ەرىنبەي- جالىقپاي ۇيرەتىپ، جاتتىقتىرىپ، جاۋىنگەرلەردىڭ ءىس- قيمىلدارىنا اقىل- كەڭەستەرمەن، ەسكەرتۋلەرمەن، جەتەكشى سۇراقتارمەن سەنىمدىلىك ۇيالاتىپ، كومەككە ۇيرەنۋشىلەردىڭ تۆورچەستۆولىق كۇشى مەن اقىل- ويىن جۇمىلدىرىپ، ينيتسياتيۆانى، جاۋىنگەرلىك تاپقىرلىقتى، ايلاكەرلىكتى جانە باسقا دا جاۋىنگەرلىك قاسيەتتەردى دامىتىپ، جەتىلدىرۋ قاجەت. اسىرەسە، كومانديردىڭ بويىندا وزىنە دەگەن سەنىمدىلىكتى، ينيتسياتيۆانى، مىقتى، قايتپاس، قاجىماس ەرىك- جىگەردى دامىتۋ قاجەت. دۇرىس ءارى جۇيەلى ويلاي بىلۋشىلىكتى، تەرەڭ ويلاستىرىلعان شەشىم جاساي الۋشىلىقتى قالىپتاستىرۋ كەرەك. بارلىق كەزدە ونىڭ پىكىرىمەن ساناسىپ، سونى وي- پىكىرىن قولداپ، دامىتىپ وتىرۋ قاجەت - ولاردان ۇيرەنىپ جانە ۇنەمى ۇيرەتىپ وتىرۋ كەرەك.
سولداتتىڭ اۋىر بەينەتى ەڭبەگى مەن ومىرىنە شىنايى تۇرعىدان تالداۋ جاساۋ نەگىزىندە ۇنەمى جاۋىنگەرلىك رۋحتى كوتەرىپ وتىرعان ءجون. جاۋىنگەرلىك كوللەكتيۆتىڭ ىنتاسىن ءادىل تۇردە باعالاعان ورىندى. ەرىك- جىگەر مەن ينيتسياتيۆانى كەيبىرەۋلەردىڭ ادەيى «بۇدان دا جاقسى ناتيجەلەرگە قول جەتكىزۋىمىز كەرەك دەگەن نيەتپەن» ۇنەمى «ناشار» دەپ ايتىپ، تۇقىرتىپ تاستايتىنىنداي باسىپ تاستاماۋ قاجەت. ءتوزىمدى، شىدامدى، جيناقى، اقىل- پاراساتپەن: بىلمەۋشىلىكتى، تاجىريبەسىزدىك پەن اسكەري قىزمەتتى اتقارۋ كەزىندەگى سالدىر- سالاقتىقتى ايىرا ءبىل. ولاردىڭ سەبەپتەرىن تاۋىپ، دەر كەزىندە جەكە ەرەكشەلىكتەرىن، قابىلەتتەرىن، پسيحيكاسىن ەسكەرىپ، ءبارىن بەت الدى «ءبارى جاقسى» نەمەسە «ءبارى وتە جاقسى» دەپ ساناماي، ماداقتاۋ نەمەسە جازالاۋ شارالارىن قولدانىپ وتىر. كىنالى بولعان ادامدى ەسىن جيعىزباي ۇنەمى تىنىشىن الا بەرمە نەمەسە كوزگە تۇسكەندەردى تىم داندايسىپ كەتپەيتىندەي اسىرا ماقتاما. ماداقتاۋ مەن جازالاۋدى قادىرىن كەتىرىپ ءجونسىز قولدانبا. ءاربىر سولداتتىڭ كاسىبي جانە ەتنوگرافيالىق ەرەكشەلىگىن ءبىل.
ودان ءارى قاراي. مەن سىزدەردىڭ نازارلارىڭىزدى مىناعان اۋدارايىن دەپ ەدىم (قولجازبانى كورسەتەدى) . بۇل نەگىزىنەن قازاقستان تاريحىنا قاتىستى. قازاق س س ر تاريحىن وقىپ شىققاننان كەيىن، مەن بۇل كىتاپتىڭ رەداكتورىنا حات جازدىم: مىنا الدارىڭىزدا ءىلۋلى تۇرعان كارتا- سحەما بويىنشا پانفيلوۆ ديۆيزياسىنىڭ تاريحىن بايانداۋعا كىرىسپەس بۇرىن مەن سىزدەرگە كەيبىر اسكەري تەرميندەردىڭ انىقتاماسىن، ءمانىن اشاتىن كەيبىر جالپى ۇعىمداردى ايتىپ، تۇسىندىرە كەتەيىن. ءبىر- ءبىرىمىزدى جاقسى ءتۇسىنۋ ءۇشىن سىزدەرمەن ورتاق ءتىل تابىسقانىمىز جاقسى. مۇمكىندىگىنە قاراي مەن اسكەري تىلمەن سويلەمەي، ويىمدى جەڭىل، قاراپايىم ءارى تۇسىنىكتى ەتىپ جەتكىزۋگە تىرىسىپ كورەيىن، ءبىراق اسكەري ماسەلەدە اسكەري ءتىلدى مۇلدەم قولدانباۋ دا ادىلەتسىزدىك بولار ەدى. تىڭداۋشىلارىم كاسىبي اسكەري تەرميندەردى، سوزدەردى، ۇعىمداردى بارلىق كەزدە ۇعىنا المايتىنىن، تۇسىنە بەرمەيتىنىن ەسكەرىپ، اڭگىمە بارىسىندا كەيبىر جاعدايدا تاراتىپ، ءتۇسىندىرىپ ايتۋعا، كەيدە تاقىرىپتىڭ مانىنەن، اياسىنان دا اۋىتقىپ كەتۋگە ءماجبۇر بولماقپىن، الايدا بۇنىمىز اڭگىمەمىزدى ۇزارتىپ جىبەرمەك. وسىنىڭ ءوزىنىڭ قاجەتى بار ما، اڭگىمەنى بۇدان ءارى قالاي جۇرگىزۋىم كەرەك، سونى ايتىڭىزدارشى؟
اۋەزوۆ: وسىعان دەيىن قالاي جۇرگىزگەن بولساڭىز، اڭگىمەنى ءارى قاراي دا سولاي ەتىپ جۇرگىزە بەرىڭىز. ءبىزدىڭ ءبارىمىز اسكەري ادام بولماعاندىقتان، نەعۇرلىم كوبىرەك تالداۋ، ءتۇسىندىرۋ جاسالىنىپ وتىرسا، سوعۇرلىم جاقسى. ءسىز ءۇشىن قاراپايىم بولىپ كورىنگەن نارسە - بىزگە قاراپايىم ەمەس. بىزدەر اسكەري ماسەلەدەگى ءبىلىمدى تىكەلەي الىپپەدەن باستاۋعا مۇقتاجبىز. ء(بارى دە اۋەزوۆتى قولدايدى) .
باۋىرجان مومىش ۇلى: جاقسى، مەنىڭ ۋاقىتىمنىڭ كوبىسى وسى ءتۇسىندىرۋ مەن تالداۋعا كەتتى، ەندى ءوزىمىز بەلگىلەگەن ۋاقىتتىڭ ىشىندە سىزدەرگە ايتايىن دەگەندەرىمنىڭ ءبارىن ايتىپ شىعا الامىن با، جوق پا؟ مەنى مازاسىزداندىرىپ تۇرعان وسى.
ساتبايەۆ: تاعى دا اڭگىمەمىزدى ءبىر كۇنگە سوزارمىز، ياعني 5-6 ساعاتقا ەسەپ جاسايىق.
باۋىرجان مومىش ۇلى: جاقسى، مەن ەڭ قاجەتتى دەگەندەرگە، مۇمكىندىگىنشە قىسقاشا توقتالۋعا تىرىسايىن. كوپتەگەن انىقتامالار ەركىن تۇردە تۇسىندىرىلەتىنىن ەستەرىڭىزگە سالا كەتكىم كەلەدى.
1. حات «مايداننان جازىلعان حاتتار» بولىمىندە بەرىلدى، ويتكەنى مەنىڭ قولىمدا مىنا دالالىق ۋستاۆتان باسقا ءۇزىندى كەلتىرەتىن ماتەريال نەمەسە كونسپەكتى دە جوق.
شىعارما ادەبي KZ پورتالىنان الىندى.
جالعاسى بار
