قىزىلوردالىق قوس جەتكىنشەك شاحماتتان ازيا چەمپيونى اتاندى
قازاقستان قۇراما كومانداسى 4 التىن، 2 كۇمىس، 2 قولا مەدالدى ولجالاپ، جالپىكوماندالىق ەسەپتە ءتورتىنشى ورىندى يەلەندى. ونىڭ ىشىندە 2 التىن مەن 1 قولا قىزىلوردالىقتاردىڭ ەنشىسىندە. بۇل تۋرالى وبلىستىق دەنە شىنىقتىرۋ جانە سپورت باسقارماسىنىڭ باسپا ءسوز قىزمەتى حابارلادى.
23 مەملەكەتتەن شاحماتشىلار قاتىسقان اتالمىش باسەكەدە № 1 وبلىستىق وليمپيادالىق رەزەرۆتىڭ مامانداندىرىلعان بالالار-جاسوسپىرىمدەر مەكتەبىنىڭ شاحماتشى قىزدارى اسەل سەرىكباي مەن نازەركە نۇرعالي جەڭىس تۇعىرىنا كوتەرىلدى.
اسەل 13 جاسقا دەيىن جاسوسپىرىمدەر اراسىندا كلاسسيكادان جەڭىمپاز اتانىپ، وبلىس تاريحىندا ءبىرىنشى بولىپ فيدە شەبەرى ءنورماتيۆىن ورىندادى. ال بليتستەن قولا جۇلدەنى ەنشىلەدى.
نازەركە 11 جاسقا دەيىنگى باسەكەدە سىنعا ءتۇسىپ، شاحماتتىڭ كلاسسيكا تۇرىنەن ءبىرىنشى ورىندى يەلەندى.
شاحماتتان وبلىستىڭ اعا جاتتىقتىرۋشىسى ريزا قوشقاروۆانىڭ ايتۋىنشا، ەندى قوس سپورتشى 23 - 29 -ماۋسىم ارالىعىندا قىزىلوردادا بولاتىن ارالباي ماحامبەتوۆ مەموريالىنا ارنالعان قازاقستان كۋبوگىنىڭ II كەزەڭىنە قاتىسادى.
