جامبىل وبلىسىندا ستۋدەنتتىك قۇرىلىس جاساقتارىنىڭ جازعى ەڭبەك ماۋسىمى اشىلدى

تاراز. قازاقپارات - تارازدا، قازاقستاننىڭ تۇڭعىش پرەزيدەنتى ساياباعىندا ستۋدەنتتىك قۇرىلىس جانە «جاسىل ەل» جاستار جاساقتارىنىڭ ەڭبەك ماۋسىمى باستالدى.

بۇل تۋرالى جامبىل وبلىستىق اكىمدىگىنىڭ باسپا ءسوز قىزمەتىنەن حابارلادى.

جامبىل وبلىسىنداعى قۇرىلىس نىساندارىنا «جاسىل ەلدىڭ» 800 مۇشەسى اتتاندى.

بيىل مەملەكەتتىك الەۋمەتتىك تاپسىرىس اياسىندا ستۋدەنتتىك قۇرىلىس جاساقتارى جەرگىلىكتى بيۋدجەتتەن 7 ملن تەڭگەگە قارجىلاندىرىلادى. 2 ميلليون تەڭگە «جاسىل ەل» ەڭبەككەرلەرىنىڭ جۇمىسىن ۇدەتۋگە قاراستىرىلعان. 18,8 ميلليون تەڭگە 400 ادامدى تاراز بەن وبلىس اۋداندارىندا ۋاقىتشا جۇمىسقا ورنالاستىرۋعا باعىتتالماق.

ستۋدەنتتىك قۇرىلىس جاساقتارىنىڭ جۇمىس ساپاسىن جاقسارتۋ ءۇشىن ءجۇز ستۋدەنتتى ارنايى كۋرستاردا وقىتىپ، بىلىكتىلىكتەرىن ارتتىرۋ كوزدەلگەن.

كۋرستان وتكەن ستۋدەنتتەرگە سىلاقشى، دانەكەرلەۋشى، تاس قالاۋشى جانە قۇرىلىس سالاسىنداعى وزگە ماماندىقتاردى يگەردى دەگەن كۋالىك بەرىلمەك.