بابالار ءسوزى: ماڭعىستاۋ جەرىندەگى ماسات اتا اڭىزى
ونى الام دەپ كەلگەن تالاي جاۋدىڭ مەسەلى قايتىپ، دىڭكەسى قۇريدى. سونان كەيىن ولار ءار ءتۇرلى ايلا، سان قيلى شارعى ويلايدى.
اقىرى، ماساتتىڭ جاۋىنگەرلىكتە قولعا تۇسكەن جاپ- جاس توقالىنا جول تابادى. سول توقالمەن جاۋدىڭ جانسىزى اۋەس بولادى. وعان جاس توقال ماساتتىڭ وسال تۇسىن ايتىپ قويادى. سويتسە، ماسات تاڭ نامازىنا ۇيىپ وتىرعان كەزدە ونىڭ الپىس ەكى تامىرى ءيىپ، تۇلا بويى پەندەلىك قالىپقا ءتۇسىپ، بۋسانىپ كەتەتىن كورىنەدى. ءتىپتى، ول ناماز كەزىندە ماسات مەكەن ەتەتىن قارا تاس بالانىڭ ەڭبەگىندەي بولىپ، بىلقىلداپ جاتادى ەكەن.
سونان سوڭ الگى جانسىز ماساتتىڭ وسى وسال تۇسىن پايدالانىپ، تاڭ نامازى كەزىندە ونىڭ باسىن شاۋىپ تۇسىرەدى. سول كەز¬دە الدىنا دومالاپ تۇسكەن باسىن ماسات جەرگە تۇسپەستەن ەتەگىنە سالىپ الىپ، جاس بالانىڭ ەڭبەگىندەي بولىپ بىلقىلداپ ەرىپ جاتقان كوك تاستىڭ ۇستىمەن جۇگىرگەن ەكەن دەيدى. ونىڭ سوڭىنان بۇل سۇمدىقتى كورىپ تۇرعان ماساتتىڭ قۇلىندى بيەسى دە كىسىنەپ ىلەسە جونەلەدى. ماسات تۇتاسىپ جاتقان كوك تاستىڭ جيەگىنە جەتە بەرگەندە الدەقانداي ءبىر قۇدىرەت كۇشىمەن اسپان كۇڭىرەنىپ، قارا جەر قاق ايرىلادى دا، وعان ەتەگىنە باسىن سالعان قالپى الدىمەن ماسات، سوڭىنان بيەسى كىرىپ كەتەدى.
وسى اڭىزدىڭ كورىنىسى كۇنى بۇگىن كوك تاستى الاندايدىڭ ۇستىندە سارناپ جاتىر. الشاڭداپ اتتاپ باسقان ماساتتىڭ دا، قۇلىندى بيەنىڭ دە ىزدەرى، شاشىراعان قىپ- قىزىل قاننىڭ داقتارىنا دەيىن سول قالپىندا ساقتالعان. ءتىپتى سول سۇمدىق وقيعا كۇنى كەشە عانا بولعانداي. سونان ەل جاڭاعى جەردى « ماسات اتا» دەپ اتاپ كەتەدى.
