ءۇندىستاننىڭ داۋلەتتى كاسىپكەرىنىڭ ءبىرى بۇكىل بايلىعىنان باس تارتىپ موناستىرعا كەتتى
Forbes ونىڭ داۋلەتىن 600 ميلليون دوللارعا باعالادى - مۇنداي سوما دوشيدىڭ ءۇندىستاننىڭ ەڭ باي ادامدارىنىڭ قاتارىنا قوسىلۋىنا مۇمكىندىك بەردى.
دوشي - پلاستيكا وندىرىسىمەن اينالىساتىن DR International كومپانياسىنىڭ قوجايىنى. ماگنات ءوزىنىڭ قاراجاتىنىڭ ەداۋىر بولىگىن دجاينيستىك ۇيىمدارعا قايىرىمدىلىققا بەرۋگە شەشىم قابىلدادى. 31 -مامىردا ونى موناح قاتارىنا قابىلداۋ ءراسىمى ءوتتى. وعان 150 مىڭنان استام ادام قاتىستى.
ءراسىم پىلدەر، جىلقىلار، تۇيەلەر، مۋزىكانتتار، بيشىلەر مەن موناحتار قاتىسقان شەرۋمەن باستالدى. دجاينيستەر وزدەرىنىڭ عۇرىپتىق سالتىن ورىندادى، ونىڭ بارىسىندا دوشي شاشىن تاقىرلاپ الدىرىپ تاستادى.
كاسىپكەر ءوزىنىڭ بارلىق جىلجىمايتىن مۇلىگىنەن باس تارتۋى ءتيىس. ول ۇيالى تەلەفونداردى دا پايدالانبايتىن بولادى جانە تەك قانا اق كيىم كيىپ جۇرەدى. دوشي كۇن سايىن تاڭعى ساعات تورتتە تۇرىپ، بىرنەشە ساعات يوگامەن جانە مەديتاتسيامەن اينالىسادى. سونىمەن بىرگە ول ءتىرى ماقۇلىقتارعا، سونىڭ ىشىندە جاندىكتەرگە دە زالال كەلتىرمەۋى ءۇشىن ءارقاشان دا جالاڭاياق جۇرەتىن بولادى.
دوشيدىڭ وتباسى ونىڭ بار ءومىرىن موناستىرعا ارناۋىنا قارسى بولدى. كاسىپكەردىڭ ۇلى اكەسىنىڭ بۇل جولعا تۇسۋگە ءۇش جىل بويى ازىرلەنگەنىن ايتتى. دجاينيزم بۇكىل ءتىرى جاندىككە زيان تيگىزبەۋگە ۇندەيدى. ءدىن اسكەتيزمگە ۇلكەن ماڭىز بەرەدى. دجاينيستەر وردەنىنىڭ مۇشەلەرى نەكەدەن باس تارتادى.
بۇدان بۇرىن 29 -مامىردا دياسپورا جونىندەگى گرۋزين ءمينيسترى گەلا دۋمبادزە ءبىر اپتاعا موناستىرعا كەتەتىنىن جاريالادى. «مەن پرەمەر-مينيستردەن دەمالىس بەرۋىن سۇرادىم، سول كۇندەردى موناستىردا وتكىزگىم كەلەدى»، - دەدى شەنەۋنىك. ءبىراق تا، ول مينيسترلىك قىزمەتىنىن باس تارتپايتىنىن ناقتىلادى، دەپ جازادى ر ب ك.
