استانادا سيريالىق وپپوزيتسيانىڭ وكىلدەرى العاش رەت ءبىرقاتار ءتۇيىندى ماسەلەلەردە ۋاعدالاستىققا كەلدى - كۇردتەر قوزعالىسىنىڭ وكىلى ن. سارباس - فوتو
بۇل تۋرالى بۇگىن ەلوردادا سيريالىق وپپوزيتسيا وكىلدەرىنىڭ كەلىسسوزدەرىنەن كەيىنگى باسپا ءسوز ءماسليحاتىندا سيرياداعى كۇردتەر قوزعالىسىنىڭ وكىلى نابي سارباس ءمالىم ەتتى.
«وسى بەيتاراپ كەزدەسۋ بارىسىندا قازاقستان ۇكىمەتى كەلىسسوزدەر ءۇشىن بارلىق جاعدايلاردى جاساۋدى ماقسات ەتكەنىن بايقادىق. سوندىقتان دا ءبىز بۇدان بۇرىنعى كەلىسسوزدەرگە قاراعاندا العاش رەت ناقتى ناتيجەلەرگە قول جەتكىزە الدىق دەپ ءوز تاراپىمنان اتاپ وتكىم كەلەدى»، - دەدى ن. سارباس.
ونىڭ سوزىنە قاراعاندا، العاش رەت سيريالىق وپپوزيتسيا وكىلدەرى سيريانىڭ وڭتايلى بولاشاعىن ايقىنداۋ ءۇشىن ەلدەگى احۋالدى رەتتەۋ تۇرعىسىندا ءبىرقاتار ءتۇيىندى ماسەلەلەر بويىنشا ءبىر مامىلەگە كەلدى.
ەستەرىڭىزگە سالا كەتەيىك، وسى اپتانىڭ باسىندا استانادا سيريالىق وپپوزيتسيا وكىلدەرىنىڭ كەلىسسوزدەرى باستالدى. وسىعان دەيىن سيريانىڭ وپپوزيتسيالىق كۇشتەر توبى قازاقستانعا ءوز ەلدەرىندەگى داعدارىستى رەتتەۋ ماسەلەسى بويىنشا كەلىسسوزدەردە ارا اعايىندىق جاساۋ تۋرالى ءوتىنىشىن بىلدىرگەنى بەلگىلى.
اۆتور: رۋسلان عابباسوۆ
