كيىكتىڭ قىرىلۋىنا «ءولىم جولى» سەبەپ بولۋى مۇمكىن
ۇكىمەتتىڭ وكىلدەرىنىڭ «پاستەرەللەزدان ءولدى» دەگەن تۇجىرىمىنا كوڭىلىمىز تولمايدى دەگەن ماجىلىسمەندەر پرەمەر- مينيسترگە حات جولدادى. ال اقبوكەننىڭ جاپپاي ولىمىنە قاتىستى اۋىلشارۋاشىلىعى مينيسترلىگى وتكىزگەن جيىندا ءبىرقاتار عالىمدار مەن قوعام بەلسىندىلەرى دە ءوز پىكىرلەرىمىن ءبولىستى.
بەلگىلى ءبىر ايماقتاردىڭ عانا ماسەلەسىندەي بولعان كيىك قىرعىنى ەندى عانا رەسپۋبليكالىق ماڭىزعا يە بولىپ كەلە جاتىر. 2 اپتاداي ۋاقىت وتكەننەن كەيىن عانا اقبوكەننىڭ ءولىمى تاقىرىبى ماجىلىسكە جەتتى.
جۇماتاي اليەۆ، ق ر پارلامەنتى ءماجىلىسىنىڭ دەپۋتاتى:
بۇل نەدەن بولىپ وتىر؟ كەرەك پە زاڭعا وزگەرىس؟ شوپتەن بە؟ بۇل ەندى حالىقتى دۋ ەتكىزدى.
ساپارحان وماروۆ، ق ر اۋىل شارۋاشىلىعى ءمينيسترىنىڭ ورىنباسارى:
قازىرگى ايتىپ وتىرعان سەبەبى - ول پاستەرەللەز. ءبىراق ەندى ءبىزدىڭ مامانداردىڭ ايتۋىنشا باسقا دا سەبەبى بولۋى مۇمكىن.
قابيبوللا جاقىپوۆ، ق ر پارلامەنتى ءماجىلىسىنىڭ دەپۋتاتى:
بۇل ەندى سيستەماعا اينالىپ كەتتى عوي. جىلدا قىرىلادى. جىلدا قىرىلادى. سوعان ەندى شەشىمىن تابۋعا بولاتىن بولار.
دەپۋتاتتار «پاستەرەللەز» دەگەننەن باسقا سەبەبىن ىزدەڭدەر دەپ وتىر. ءتىپتى كەيبىرى بايقوڭىردان ۇشاتىن زىمىرانداردىڭ زيانىن دا ۇمىتپاۋ كەرەك دەدى. الايدا، اۋىلشارۋاشىلىق ماماندارى ءوز دەگەندەرىنەن قايتار ەمەس. بۇگىن اقبوكەندەردىڭ قىرىلۋىنا قاتىستى وتكەن ارنايى جيىندا وقىلعان باياندامالاردىڭ دەنى «پاستەرەللەز كىنالى» دەگەنگە سايادى.
مال دارىگەرلىگىنەن باستاپ، ۆەتەريناريا عىلىمدارىنىڭ كانديداتتىعىنا دەيىن جەتكەن ءادىلقاسىم جاقىپبايەۆتىڭ بۇل ايتقانى ۇكىمەت وكىلدەرىنە ۇناماعان سىڭايلى. جازىپ كەلگەن ەڭبەكتەرىن ەش قىلسا رەنجىمەگەندە شە. ال باسقا عالىمدار دا ءوز پىكىرلەرىمەن ءبولىستى. شەتەلدەن كەلگەن ساراپشىلار دا ازىرگە تۇپكىلىكتى كەسىم ايتۋعا ەرتە دەپ قايىردى. كيىكتىڭ ولىمىنە ۋلى وتىنمەن ۇشاتىن زىمىران كىنالى دەگەن "انتيگەپتيل" ۇيىمىنىڭ وكىلى عانا ايتىلعاندارمەن تولىقتاي كەلىسپەيمىن دەدى.
ماقسات ءىلياس ۇلى، "انتيگەپتيل" قوعامدىق قوزعالىسىنىڭ بەلسەندىسى:
10 مامىردان بەرى قاراي ەكولوگيالىق اپات ءجۇرىپ جاتىر. ءالى كۇنگە دەيىن مەملەكەتتىك ورتالىق ورگانداردىڭ، مينيسترلىكتەردىڭ اراسىندا ءبىر- بىرىمەن بايلانىس جوق. قازىر ەندى «اناۋ بولدىق، مىناۋ بولدىق» دەپ ەسەپ بەرەسىزدەر. ال ناقتى قانداي سەبەبى بولۋى مۇمكىن؟ ەندى ءارى قاراي نە ىستەيمىز؟ دەگەن سۇراققا، 2 جارىم ساعات سويلەپ جاتىرمىز، ءالى جاۋاپ العان جوقپىز.
ەرلان نىسانبايەۆ، ق ر اۋىل شارۋاشىلىعى ءمينيسترىنىڭ ورىنباسارى:
وزبەكستاندا، موڭعوليادا، تۇركمەنيادا، رەسەيدە كيىك قالمادى. سەبەبى مەملەكەتتەن بۇگىنگى بىزدەگىدەي وسىنشاما قولداۋ، وسىنشاما ءىس- ارەكەت جاسالىپ جاتقان جوق.
ماقتانارلىق جاعداي شىعار ارينە. الايدا، وسى مينيسترلىك وكىلدەرىنىڭ بۇگىنگى مالىمەتىنشە كومىلگەن كيىكتىڭ سانى 120 مىڭنان اسىپتى. بۇل - قازاقستانداعى بارلىق اقبوكەننىڭ جارتىسىنا جۋىقتايدى.
باقىتنۇر ءالىباي، سانات يمانعاليەۆ.
«31-ارنا»
