حالىقارالىق ەپيزووتيكالىق بيۋرو قازاقستانداعى كيىكتەردىڭ قىرىلۋىن زەرتتەيدى

استانا. قازاقپارات - دۇنيەجۇزىلىك جانۋارلار دەنساۋلىعىن ساقتاۋ ۇيىمىنىڭ (حالىقارالىق ەپيزووتيكالىق بيۋرو) ارنايى كوميسسياسى قازاقستانداعى كيىكتەردىڭ جاپپاي قىرىلۋى سەبەبىن انىقتاۋمەن اينالىسادى.

بۇل جايىندا ق ر اۋىل شارۋاشىلىعى مينيسترلىگىندە قوستاناي، اقتوبە جانە اقمولا وبلىستارى اۋماعىندا كيىكتەردىڭ بەتپاقدالا پوپۋلياتسياسىنىڭ جاپپاي قىرىلۋ فاكتىسىن انىقتاۋ بويىنشا اۋىل شارۋاشىلىعى ۆيتسە-ءمينيسترى ەرلان نىسانبايەۆتىڭ تورعالىعىمەن وتكەن جۇمىس توبىنىڭ وتىرىسىندا ءمالىم بولدى.

بۇدان بۇرىن حابارلانعانداي، قوستاناي جانە اقتوبە وبلىستارىندا قىرىلعان كيىكتەردىڭ سانى 112 مىڭ 475 كە جەتتى. ال اقمولا وبلىسىنىڭ جارقايىڭ جانە جاقسى اۋداندارىندا قازىرگى كەزدە 8502 كيىكتىڭ ولەكسەسىن جويۋ شارالارى جۇرگىزىلدى. ولاردىڭ ىشىندە 90 پايىزى - انالىق جانۋارلار.

قازاقستاننىڭ بيولوگيالىق ارتۇرلىلىكتى ساقتاۋ قاۋىمداستىعىنىڭ مالىمەتىنشە، 2014-جىلى مەملەكەتتىك كيىك ساناعىنىڭ ناتيجەسى بويىنشا قازاقستانداعى كيىكتەردىڭ سانى 300 مىڭنان اسقان.

اۆتور: رۋسلان عابباسوۆ