ب. ساعىنتايەۆ قازاقستان دەلەگاتسياسىنىڭ ۇلان-باتىرعا جاساعان ساپارى قورىتىندىسىن شىعاردى - فوتو

ۇلان- باتىر. قازاقپارات - ق ر پرەمەر-ءمينيسترىنىڭ ءبىرىنشى ورىنباسارى باقىتجان ساعىنتايەۆ ۇلان-باتىر قالاسىنا جاساعان ساپارى اياسىندا قازاقستان جانە موڭعوليا اراسىندا ءبىرىنشى كەزەكتە بولاشاقتا ەكونوميكالىق سالاداعى ىنتىماقتاستىقتى تەرەڭدەتۋ ماسەلەسىن تالقىلادى.

«قازاقستاندىق كومپانيالار ءبىرىنشى كەزەكتە، ەنەرگەتيكا، تاۋ-كەن سالاسى، اۋىل شارۋاشىلىعى، كولىك ينفراقۇرىلىمى، التىندى ءوندىرۋ جانە قايتا وڭدەۋ، سونداي-اق باسقا سالالارداعى ىنتىماقتاستىقتى دامىتۋعا دايىن»، - دەدى ول موڭعوليا پرەمەر-ءمينيسترىنىڭ ورىنباسارى ۋحنااگيين حۋرەلسۋحپەن بولعان كەزدەسۋ كەزىندە.

«قازاقستان رەسپۋبليكاسىنىڭ پرەزيدەنتى موڭعولياعا رەسمي جانە مەملەكەتتىك ساپارىمەن ءۇش رەت كەلدى. موڭعوليانىڭ پرەزيدەنتى، پرەمەر-ءمينيسترى جانە سىرتقى ىستەر ءمينيسترى دە قازاقستاندا ساپارمەن بولدى. ەلدەرىمىزدىڭ اراسىنداعى ىنتىماقتاستىقتىڭ بولاشاعى بار، باعىتى ايقىن جانە ەشقانداي ساياسي قايشىلىعى جوق. ءبىز قازاقستانمەن قارىم-قاتىناستى باۋىرلاستىق دەپ سانايمىز»، - دەدى ب. ساعىنتايەۆپەن بولعان كەلىسسوزدەردىڭ بارىسىندا ۋ. حۋرەلسۋح.

قازاقستاندىق تىلشىلەرگە بەرگەن سۇحباتىندا ب. ساعىنتايەۆ ۇلان-باتىرعا جاساعان ساپارىنىڭ ماقساتى مەن قورىتىندىلارى تۋرالى ايتىپ بەردى.

«موڭعوليا ەلىنە مەملەكەت باسشىسى نۇرسۇلتان نازاربايەۆتىڭ تاپسىرماسى بويىنشا كەلدىك. وزدەرىڭىز بىلەتىندەي، 9- مامىر كۇنى ماسكەۋدە ۇلى وتان سوعىسىنداعى جەڭىستىڭ 70 جىلدىعىن مەرەكەلەۋ كەزىندە مەملەكەت باسشىسى موڭعوليا پرەزيدەنتىمەن كەزدەسكەن. ەكى ەلدىڭ ودان جوعارى دەڭگەيدەگى ەكىجاقتى ساۋدا-ەكونوميكالىق قاتىناستاردى دامىتا باستايتىنى تۋرالى كەلىسىمگە قول جەتتى»، - دەدى ب. ساعىنتايەۆ.

ونىڭ ايتۋىنشا، ساپاردىڭ قورىتىندىلارى وتە جەمىستى بولدى. «ءبىز سونداي-اق وزىمىزگە موڭعول تاراپىنان كەلىپ تۇسكەن ۇسىنىستاردى تالقىلادىق. وندا ەلەكتر ەنەرگەتيكاسى، تەمىرجول سالاسى، اۆتوموبيل جولدارىن سالۋ سەكىلدى ءار ءتۇرلى ينفراقۇرىلىمدىق جوبالارعا قاتىسۋ كورسەتىلگەن»، - دەپ اتاپ ءوتتى ب. ساعىنتايەۆ.

ول قازاقستان دەلەگاتسياسى وتاندىق كومپانيالاردىڭ تاۋ-كەن قازۋ سالاسى، وڭدەۋ ونەركاسىبى، التىن ءوندىرىپ، قايتا وڭدەۋ، لوكوموتيۆتەردى موڭعولياعا جەتكىزۋگە ىنتا بىلدىرگەنىن ايتتى. سوڭعى ۇسىنىسقا موڭعوليا تاراپى قىزىعۋشىلىق تانىتتى. «وسى ماسەلەلەردىڭ بارلىعى ساراپشىلىق دەڭگەيدە ودان ءارى قاراستىرىلاتىن بولادى»، - دەدى ق ر پرەمەر-ءمينيسترىنىڭ ءبىرىنشى ورىنباسارى.

موڭعوليا ەلىنىڭ پرەمەر-ءمينيسترى جانە ۆيتسە-پرەمەرىمەن بولعان كەزدەسۋ بارىسىندا ۇكىمەتارالىق كوميسسيانىڭ جۇمىسىن كۇشەيتۋ تۋرالى ورتاق كەلىسىمگە كەلدى.

«موڭعوليا پرەزيدەنتىمەن كەزدەسۋ وتە جەمىستى بولدى. مەن وعان ءبىزدىڭ مەملەكەت باسشىمىز نۇرسۇلتان ءابىش ۇلى نازاربايەۆتىڭ ونى قازاقستانعا رەسمي ساپارمەن كەلۋگە شاقىرۋىن جەتكىزدىم. شاقىرۋدى قۋانا قابىلدادى. مەن نۇرسۇلتان ءابىش ۇلىنىڭ ءبىزدىڭ ەلدەرىمىزدىڭ اراسىنداعى ءوزارا قارىم-قاتىناستىڭ ساپالى جاڭا دەڭگەيىنە شىعۋ قاجەت دەگەن سوزدەرىن ايتىپ جەتكىزدىم»، - دەپ حابارلادى ب. ساعىنتايەۆ.

ونىڭ ايتۋىنشا، موڭعوليا پرەزيدەنتى تساحياگيين ەلبەگدورج ەكى ەلدىڭ ىنتىماقتاستىعىنداعى الەۋەتتى اتاپ ءوتىپ، سونداي-اق ەكىجاقتى قاتىناستاردى ساپالى جاڭا دەڭگەيگە شىعارۋ قاجەتتىلىگىن قولداپ وتىرعانىن كورسەتتى.

«موڭعوليا تاراپى ەۋرازيالىق ەكونوميكالىق وداقپەن ىنتىماقتاستىقتى دامىتۋعا نيەتتى. 29- مامىر كۇنى بۋرابايدا ەۋرازيالىق ەكونوميكالىق وداق پەن ۆەتنام اراسىندا ەركىن ساۋدا ايماعى تۋرالى كەلىسىمگە قول قويىلاتىنىن بىلەسىزدەر. بۇل - ءبىرىنشى قۇجات. موڭعوليا تاراپى وسىنداي كەلىسىمگە كەلۋگە ۇلكەن قىزىعۋشىلىق تانىتىپ وتىر»، - دەدى ب. ساعىنتايەۆ. ونىڭ ايتۋىنشا، كەلىسسوزدەر بارىسىندا قازاقستان ۇلان-باتىردىڭ اتالعان تالپىنىسىنا قولداۋ تانىتتى.

«كورشى بولساق تا، وكىنىشتىسى، بىزدە استانا-ۇلان-باتىر جانە الماتى-ۇلان-باتىر باعىتىنداعى تۇراقتى ۇشاق رەيسى جوق. ۇكىمەتتىك دەڭگەيدەگى كەلىسسوزدەر كەزىندە بۇل ماسەلەنى موڭعوليا دا كوتەردى»، - دەدى قازاقپارات ءتىلشىسىنىڭ سۇراعىنا جاۋاپ بەرگەن ب. ساعىنتايەۆ. ول سونداي-اق، موڭعوليا ەكسپو-2017 كورمەسىنە قاتىساتىنىن راستاعانىن ەسكە سالدى.

ۇلان-باتىرعا كەلگەن قازاقستاندىق دەلەگاتسيانىڭ قۇرامىندا 20 دان استام ادام باردى. ولاردىڭ اراسىندا ق ر ەكونوميكالىق ينتەگراتسيا ىستەرى ءمينيسترى جانار ايتجانوۆا، سىرتقى ىستەر ءمينيسترىنىڭ ءبىرىنشى ورىنباسارى ءراپىل جوشىبايەۆ، ادىلەت مينيسترلىگىنىڭ جاۋاپتى حاتشىسى مارات بەكەتايەۆ، ينۆەستيتسيالار جانە دامۋ ۆيتسە-ءمينيسترى البەرت راۋ، قارجى ۆيتسە-ءمينيسترى رۋسلان بەكەتايەۆ، اۋىل شارۋاشىلىعى ءمينيسترىنىڭ ورىنباسارى ەرمەك كوشەربايەۆ، KAZ Minerals PLC باسقارماسىنىڭ ءتوراعاسى ولەگ نوۆاچۋك، سونداي-اق ««سامۇرىق-قازىنا» ۇلتتىق ءال-اۋقات قورى» ا ق، «بايتەرەك» ۇلتتىق باسقارۋ حولدينگى» ا ق، قازاقستان دامۋ بانكىنىڭ باسقارۋشى ديرەكتورلارى جانە ت. ب. بار.