اعىلشىن ءتىلىن ۇيرەنىپ، كوكجيەگىمىزدى كەڭەيتۋىمىز قاجەت - ن. نازاربايەۆ
كادر دايىنداۋ جانە بەس ينستيتۋتسيونالدىق رەفورمالارعا توقتالا كەلە، مەملەكەت باسشىسى قازىر قازاقستان مەكتەپتەرىندە ۇشتىلدىلىك بەلسەندى ەنگىزىلىپ جاتقاندىعىن اتاپ ءوتتى.
«بۇل - قازاق، ورىس جانە اعىلشىن تىلدەرى. بۇل جوعارى سىنىپتاردا تولىقتاي اعىلشىن تىلىندە ءبىلىم الۋعا كوشۋگە نەگىزدەلگەن. كەيىن بىرتىندەپ ۋنيۆەرسيتەتتەردە تابيعي عىلىمعا باسا دەن قويىلادى. كەلەشەككە وسىلايشا بەت بۇردىق. وزدەرىڭىز بىلەسىزدەر، قازاقستان «بولاشاق» باعدارلاماسى بويىنشا شەتەلدە جاستاردى 22 جىلدان بەرى وقىتىپ كەلەدى. 20 مىڭعا جۋىق ادام شەتەلدە ءبىلىم الىپ، بۇگىندە ەكونوميكا سالاسىندا ەڭبەك ەتۋدە. ءبىز ءۇشىن بۇل ەرەكشە جەتىستىك!» - دەدى ن. نازاربايەۆ.
«بۇدان باسقا، بارلىق وبلىستا زياتكەرلىك مەكتەپتەر اشىلدى، وندا ۇلكەن بايقاۋ ارقىلى دارىندى بالالار جيناقتالادى. نازاربايەۆ ۋنيۆەرسيتەتى اۆتونومدىق رەجىمدە جۇمىس ىستەپ جاتىر. ونىڭ ارنايى زاڭناماسى بار. بارلىق پروفەسسۋرا شەتەلدەن، تولىقتاي اعىلشىن تىلىندە وقىتىلادى. 15 - ماۋسىمدا العاشقى تۇلەكتەر ءبىتىرىپ شىعادى. بۇل كەرەمەت دارىندى بالالار. نازاربايەۆ ۋنيۆەرسيتەتىنە تۇسۋگە 10 مىڭ جاس تىلەك بىلدىرسە، تەك قاتاڭ سۇزگىدەن وتكەن 500 بالا عانا قابىلدانادى»، - دەدى مەملەكەت باسشىسى.
پرەزيدەنتتىڭ ايتۋىنشا، اعىلشىن ءتىلى - كومپيۋتەر، الەمدىك عىلىم، مادەنيەت ءتىلى.
«ءبىز، قازاقتار، الەمدىك عىلىم مەن مادەنيەتكە ورىس ءتىلى ارقىلى شىقتىق. ءبىراق قازىر اعىلشىن ءتىلىن مەڭگەرىپ، كوكجيەگىمىزدى كەڭەيتە ءتۇسۋىمىز قاجەت»، - دەپ ءسوزىن تۇيىندەدى ن. نازاربايەۆ.
