ب. ساپاربايەۆ ەلباسىنا الەۋمەتتىك سالاداعى مەملەكەتتىك باعدارلامالاردىڭ ورىندالۋ بارىسىن باياندادى

 استانا. قازاقپارات - ق ر پرەزيدەنتى نۇرسۇلتان نازاربايەۆ پرەمەر- ءمينيستردىڭ ورىنباسارى بەردىبەك ساپاربايەۆتى قابىلدادى، دەپ حابارلادى اقوردانىڭ باسپا ءسوز قىزمەتىنەن.

بەردىبەك ساپاربايەۆ مەملەكەت باسشىسىنا تاپسىرمالاردىڭ جۇزەگە اسىرىلۋى، الەۋمەتتىك سالاداعى مەملەكەتتىك باعدارلامالاردىڭ ورىندالۋ بارىسى، سونداي- اق الداعى كەزەڭگە ارنالعان جوسپارلار تۋرالى باياندادى.

قازاقستان پرەزيدەنتى ازاماتتاردىڭ جۇمىسقا ورنالاسۋىنا جاردەمدەسۋ ءۇشىن مەملەكەت كۇش- جىگەر جۇمساپ وتىرعانىنا نازار اۋداردى.

- بيزنەس پەن جۇمىسپەن قامتۋدىڭ «جول كارتاسىن» جانە «نۇرلى جولدى» قوسا العاندا، بارلىق باعدارلامالار تۇرعىنداردى جۇمىسپەن قامتاماسىز ەتۋگە باعىتتالعان، بۇل مەملەكەتتىڭ الدىندا تۇرعان باستى مىندەتتىڭ ءبىرى بولىپ سانالادى. بۇل ورايدا، وڭىردەگى حالىق جەرگىلىكتى بيلىكتىڭ وسى باعىتتا قابىلداپ جاتقان شارالارى تۋرالى حاباردار بولۋى كەرەك. اكىمدىكتەر كاسىپورىنداردىڭ كادرعا دەگەن قاجەتتىلىگىن قاداعالاپ، كاسىپكەرلىك سۋبەكتىلەرىنىڭ اشىلۋىنا، قوسىمشا وندىرىستەردىڭ ىسكە قوسىلۋىنا ىقپال ەتكەنى ءجون. ءىرى كاسىپورىندار جاڭا تەحنولوگيالاردى، يننوۆاتسيالاردى ەنگىزۋ ەسەبىنەن جۇمىس ورىندارىن قىسقارتۋدا. مۇنداي جاعدايدا قىزمەت كورسەتۋ سالاسى، شاعىن جانە ورتا بيزنەس جۇمىس بەرۋشى ءرولىن اتقارۋى ءتيىس، - دەدى نۇرسۇلتان نازاربايەۆ.

مەملەكەت باسشىسى 2020 - جىلعا دەيىن بالالاردى مەكتەپكە دەيىنگى مەكەمەلەرىمەن تولىق قامتۋدى، اپاتتىق جاعدايداعى جانە ءۇش اۋىسىمدىق مەكتەپتەردى جويۋدى، كادر دايارلاۋدى وتاندىق ەكونوميكانى مەن مەملەكەتتىك باعدارلامالاردى جۇزەگە اسىرۋدى ەسكەرە وتىرىپ، كەلىسىم نەگىزىندە جۇرگىزۋدى تاپسىردى.

 قازاقستان پرەزيدەنتى جوعارى وقۋ ورىندارىنىڭ، عىلىمي- زەرتتەۋ ينستيتۋتتارى مەن وندىرىستىك كاسىپورىنداردىڭ نەگىزىندە عىلىمي- وندىرىستىك كەشەندەر قۇرۋدىڭ دا ماڭىزدىلىعىن اتاپ ءوتتى.

 نۇرسۇلتان نازاربايەۆ بەس ينستيتۋتسيونالدىق رەفورمانىڭ ماڭىزىن جانە «100 قادام» ءىس- قيمىل جوسپارىن ساپالى ورىنداۋ قاجەتتىگىن ايتتى.

ب. ساپاربايەۆ بيىل جۇمىسپەن قامتۋعا بەلسەندى جاردەم ەتۋ شارالارى 320 مىڭ ادامدى نەمەسە جۇمىسسىزدار مەن ءونىمسىز جۇمىسپەن قامتىلعانداردىڭ 25 پايىزىن قامتيتىنىن، بۇل جۇمىسسىزدىق دەڭگەيىن 5,2 پايىز شاماسىندا ۇستاپ تۇرۋعا مۇمكىندىك بەرەتىنىنە توقتالدى.

پرەمەر- ءمينيستردىڭ ورىنباسارى ەڭبەكپەن قامتۋ سالاسىنداعى احۋالدىڭ وزگەرۋىنە دەر كەزىندە ىقپال ەتۋ ءۇشىن بىلتىردان بەرى جاعدايى مۇشكىل 199 كاسىپورىندى كۇن سايىن مونيتورينگىلەۋ جۇرگىزىلىپ وتىرعانىن مالىمدەدى.

 سونىمەن قاتار، اقپان ايىندا بۇكىل رەسپۋبليكا بويىنشا ءوڭىر اكىمدەرى مەن جۇمىس بەرۋشىلەر اراسىندا جۇمىسشىلاردى جۇمىستان بوساتۋ جايتتارىن بولدىرماۋ ماسەلەلەرى بويىنشا ءوزارا ىنتىماقتاستىق تۋرالى مەموراندۋمدار جاسالا باستالدى. قازىرگى كەزدە 46 مىڭنان استام مەموراندۋمعا قول قويىلدى، سونىڭ ىشىندە 1,6 مىڭى - ءىرى كاسىپورىندارمەن، 44,8 مىڭى - جۇمىسشىلارىنىڭ جالپى سانى 2,1 ميلليون ادام بولاتىن ورتا جانە شاعىن كاسىپورىندارمەن مەموراندۋم جاسالدى.

ب. ساپاربايەۆ الداعى بەس جىلدا دەنساۋلىق ساقتاۋ سالاسىن دامىتۋدىڭ باستى باعىتتارى وسى سالانىڭ قارجىلىق ورنىقتىلىعىن قامتاماسىز ەتۋ، باستاپقى مەديتسينالىق- سانيتارلىق جاردەمدى جەتىلدىرۋ، اۋرۋلار تۇرلەرىمەن جۇمىس جۇرگىزۋ باعدارلاماسىن ەنگىزۋ، ۇزاقمەرزىمدى جوسپارلاۋ نەگىزىندە سالانىڭ كادرلىق الەۋەتىن نىعايتۋ بولاتىنىن اتاپ ءوتتى.

 كەزدەسۋ قورىتىندىسى بويىنشا مەملەكەت باسشىسى ءبىرقاتار ناقتى تاپسىرما بەردى.