وتاندى قاستەرلەۋگە جانە ەلدى قۇرمەتتەۋگە ارنالعان مەملەكەتتىك رامىزدەر كۇنىنىڭ ءمانى زور - مەملەكەتتىك حاتشى
«بۇگىن ءبىز مەملەكەتتىك رامىزدەر جونىندەگى كوميسسيانىڭ وتىرىسىن وتكىزگەلى وتىرمىز. الدىمىزدا، 4 - ماۋسىم مەملەكەتتىك رامىزدەر كۇنى كەلە جاتىر. وتاندى قاستەرلەۋگە جانە ەلدى قۇرمەتتەۋگە ارنالعان بۇل كۇننىڭ ءمانى زور دەپ بىلەمىن.
اسىرەسە، ەلباسى نۇرسۇلتان ءابىش ۇلى نازاربايەۆ ۇسىنعان 5 حالىقتىق رەفورمانىڭ ۇلتتىق جوسپارىنداعى 100 ناقتى قادامدى ىسكە اسىرۋدا ەڭ اۋەلى حالىقتىڭ بىرلىگى مەن تاتۋلىعى، وتانشىلدىق قاسيەتى اسا قاجەت. سوندىقتان كوميسسيا وتىرىسى شەشىمدەرىن ۇدايى باقىلاۋدا ۇستاپ، ءبىز مەملەكەتتىك رامىزدەردى زاڭناما اياسىندا ورىندى قولدانۋ، ونى حالىققا ناسيحاتتاۋ جۇمىسىن ءاردايىم ورىنداپ وتىرۋىمىز قاجەت»، - دەدى وتىرىستى اشقان گ. ءابدىقالىقوۆا.
كوميسسيا وتىرىسىندا قورعانىس، دەنساۋلىق ساقتاۋ جانە الەۋمەتتىك دامۋ مينيسترلىكتەرىنىڭ، سونىمەن قاتار استانا قالاسى مەن اتىراۋ وبلىسىنىڭ مەملەكەتتىك رامىزدەردى پايدالانۋ جانە ناسيحاتتاۋ جونىندەگى جۇمىستارى تۋرالى ەسەپتەرى تىڭدالدى. اتالعان ورتالىق جانە جەرگىلىكتى مەملەكەتتىك ورگانداردىڭ وسى ماڭىزدى يدەولوگيالىق سالاداعى جۇمىسىنا جان- جاقتى ءارى تەرەڭ تالداۋ جاسالدى.
مەملەكەتتىك حاتشى ۋاكىلەتتى مەملەكەتتىك ورگاندار باسشىلارىنىڭ نازارىنا مەملەكەتتىك رامىزدەر تۋرالى زاڭنامالاردىڭ بۇزىلۋىنا جول بەرمەۋ، ىشكى باقىلاۋدى ۇدايى قامتاماسىز ەتۋ، قۇقىق قولدانۋ تاجىريبەسىن جەتىلدىرۋ، سونداي- اق مەملەكەتتىك رامىزدەردى قولدانۋ مەن ناسيحاتتاۋ سالاسىنا باقىلاۋدى كۇشەيتۋ ماسەلەلەرىنە توقتالدى.
وتىرىس قورىتىندىسى بويىنشا ناقتى تاپسىرمالار مەن ۇسىنىستار بەرىلدى.
اۆتور: مارلان جيەمباي
