قازاقستاندا ايەلدەر وبىردان ەمدەلگەننەن كەيىن دە دۇنيەگە بالا اكەلە الادى
رەپرودۋكتيۆتىك مەديتسينا ينستيتۋتىندا وبىرعا شالدىققان 3 ايەلگە رەپرودۋكتيۆتىك دەنساۋلىعىن قالپىنا كەلتىرۋ وتالارى ءساتتى جاسالدى. ەمدەۋ شارالارى بىتكەننەن كەيىن ولار بالالى بولا الادى.
ونكولوگيالىق ناۋقاستاردىڭ انالىق بەزى تىندەرىن كريوكونسەرۆاتسيالاۋ وتالارىنىڭ وزەكتىلىگى سوندا، سوڭعى جىلدارى رەپرودۋكتيۆتىك فۋنكسيالارىن تابىستى ىسكە اسىرا الماعان جاس ايەلدەردە قاتەرلى ىسىك اۋرۋلارىن انىقتاۋ جاعدايلارى ارتۋ تۇسۋدە.
وبىردى ەمدەۋدە قولدانىلاتىن حيميو تەراپيا، ساۋلەلىك تەراپيا سياقتى ادىستەر گونادوتوكسيكالىق اسەر ەتەدى. ايەلدەر بالا كوتەرە الماي، بەدەۋلىك پايدا بولادى.
يننوۆاتسيالىق ادىستەردى ەندىرۋ ءۇشىن رەپرودۋكتيۆتىك مەديتسينا ينستيتۋتىنا جاپونيانىڭ ۋنيۆەرسيتەتتىك كلينيكاسىنان ماماندار شاقىرىلدى. انالىق بەزى تىنىنەن لاپاروسكوپيالىق الۋ جانە كريوكونسەرۆاتسيالاۋ شارالارىن جاپوندىق پروفەسسورلار قازاقستاندىق ماماندارمەن بىرگە اتقاردى. وپەراتسيا حيميو تەراپيا الۋى ءتيىس 3 ايەلگە جاسالدى.
ەرىتىلگەن انالىق بەزى ءتىنىنىڭ اۋتوترانسپلانتاتسياسى ونكولوگ- دارىگەرلەردىڭ قورىتىندىسىنا سايكەس ايەلدەردى ساۋىقتىرۋ ءۇشىن جاسالادى.
وتاندىق حيرۋرگتەرمەن بىرگە وتا جاساعان پروفەسسور ناو سۋزۋكي: «حيميا- ساۋلەلىك تەراپيامەن ەمدەۋدەن كەيىن بولۋى ىقتيمال زارداپتار جانە رەپرودۋكتيۆتىك فۋنكتسيالاردى ساقتاۋ ادىستەرى جونىندە ناۋقاستارعا ايتۋ - ونكولوگ- دارىگەرلەردىڭ پارىزى. بۇگىنگى تاڭدا مەديتسينا جاڭا شەشىمدەر ۇسىنۋعا قاۋقارلى. قازاقستاننىڭ بۇل سالادا كوشتەن قالماي كەلە جاتقانى قۋانىشتى»، - دەيدى.
رەپرودۋكتيۆتىك مەديتسينا ينستيتۋتىنىڭ ديرەكتورى تامارا جۇسىپاليەۆا ءوز كەزەگىندە: «ونكولوگيالىق ناۋقاستارعا رەپرودۋكتيۆتىك فۋنكتسيالارىن، دۇنيەگە بالا اكەلۋ قابىلەتىن ساقتاۋعا كومەكتەسۋ ءبىزدىڭ مىندەتىمىز. قازاقستاندا مۇنىڭ شىندىققا اينالعانى ءبىزدى قۋانتادى. ءبىزدىڭ ينستيتۋتتا ونكولوگيالىق ناۋقاستارعا مۇنداي كومەك تەگىن كورسەتىلەدى. جوبا تەك قايىرىمدىلىق ماقساتىندا ىسكە اسىرىلادى»، - دەپ اتاپ ءوتتى.
بەلگيادا حودجكين ليمفوماسىنان تولىق ەمدەلىپ شىققان ايەلگە 6 جىلدان سوڭ ەرىتىلگەن كريوكونسەرۆاتسيالانعان انالىق بەزى تىندەرىن قايتا سالعاننان كەيىن العاشقى بالا 2004 -جىلى دۇنيەگە كەلدى. بۇل ءادىستى قولدانۋ ارقاسىندا بۇگىنگى دەيىن 40 بالا تۋىلدى.
