حالىقارالىق وليمپيادا كۇنىنە وراي الماتىدا ۆەلوشەرۋ ءوتتى
مارە سىزىعىن «سۇڭقار» حالىقارالىق شاڭعى ترامپلينىنەن باستاعان قاتىسۋشىلار ورتالىق ستاديونعا تابان تىرەدى. سپورتتىق نىساندا مەرەكەلىك كونسەرت، سپورتتىق ويىندار ۇيىمداستىرىلدى.
«بۇگىنگى ۆەلوشەرۋدى حالىقارالىق وليمپيادا كۇنىنە وراي ۇيىمداستىردىق. بۇل شارا ءبىز ءۇشىن ۇلكەن ماڭىزعا يە. كورىكتى الماتىمىز 2022-جىلعى قىسقى وليمپيادا ويىندارىن وتكىزۋگە ۇمىتكەر. قالا كوشەلەرىنە شىققان مىڭداعان تۇرعىندار قالامىزدىڭ سالاۋاتتى ءومىر سالتىن قولدايتىنىن بىلدىرەدى»، - دەدى قالا اكىمى ا. ەسىموۆ.
سونداي-اق قالا باسشىسى تۇرعىنداردى بۇگىن قالادا ءوتىپ جاتقان ءىرى مادەني شارا - «الماتى - گۇل قالا» فەستيۆالىنە شاقىردى. قالا باسشىسى شاھاردا ءوسىرىلىپ كەلە جاتقان گۇل كىلەمنىڭ كولەمى 200 مىڭ شارشى مەترگە جەتەتىندىگىن مالىمدەدى. قالانى كورىكتەندىرۋ باعىتىندا بۇگىندە اۋقىمدى جۇمىس جۇرگىزىلىپ كەلەدى. ساياباقتار مەن الاڭقايلار قالپىنا كەلتىرىلىپ، سۋبۇرقاقتار جوندەلدى. 150 مىڭعا جۋىق اعاش وتىرعىزىلدى. حالىقارالىق وليمپيادا كوميتەتىنىڭ پرەزيدەنتى توماس باحتىڭ قۇتتىقتاۋىن ق ر ۇلتتىق وليمپيادا كوميتەتىنىڭ ۆيتسە-پرەزيدەنتى پاۆەل نوۆيكوۆ وقىپ بەردى.
«وليمپيادا كۇنى - جاستاردى سالاۋاتتى ءومىر سالتىنا باۋليتىن ماڭىزدى مەيرام. وسى كۇننىڭ نەگىزگى ماقساتى الەمدەگى بارلىق ادامداردى سپورتتىق مەرەكەگە قاتىسۋعا ۇندەۋ. وسى كەرەمەت ءداستۇردى ساقتايىق»، - دەلىنگەن قۇتتىقتاۋ حاتىندا.
سونىمەن قاتار، قالا باسشىسى ەڭ بەلسەندى ۆەلوسيپەدشىلەردى ماراتتادى.
اۆتور: گۇلميرا عوسمانالي
