ءماندى تالاس - جاپون ەرتەگىسى

استانا. قازاقپارات - وسىعان دەيىن ءبىز سىزدەرگە پارسى، ورىس ەرتەگىلەرىن ۇسىندىق. بۇگىن جاپون ەرتەگىسىن بەرىپ وتىرمىز.

بالالارىڭىزعا وقىپ بەرىپ، تۇراقتى تىركەستەردىڭ، بەينەلى سوزدەردىڭ ماعىناسىن ءتۇسىندىرىپ وتىرىڭىز. كىشكەنە كەزىندە قۇلاعىنا سىڭگەن ءسوز ەسىندە جاقسى ساقتالاتىن بولادى ءارى ءتىل بايلىعىن ارتتىرادى. ەڭ باستىسى ەرتەگىلەر بالانىڭ وي- ءورىسىن دامىتىپ، تانىم- تۇسىنىگىن قالىپتاستىرادى.

ءماندى تالاس

ءبىر كۇنى ءۇش ادام جولدا كەلە جاتىپ، ءسوز تالاستىرىپ قالادى.

- ەگەر بىرەۋىمىز جولدان وتىز سوم تاپساق، - دەيدى ءبىرى، - ءارقايسىمىز ون سومنان تەڭ ءبولىپ الايىق.

- جوق! - دەپ قارسىلاسا كەتەدى ەكىنشىسى. - كىم دە كىم بۇرىن تاپسا، كوبىن سول السىن.

- بۇل ادىلدىك ەمەس! - دەپ كيلىگە كەتەدى ءۇشىنشىسى. - ەشقايسىمىزعا قيانات جاساماي، تەڭ ءبولىپ الۋىمىز كەرەك!

- اپىرماۋ، بۇعى اۋلاۋدا مىناداي ءداستۇر بار عوي: مىسالى، كىمنىڭ ساداعىنىڭ وعى بۇعىعا بۇرىن تيسە، باسىن سول الادى. مۇندا دا سولاي: كىم بۇرىن تاپسا، اقشانىڭ دەنىن سول الۋ كەرەك!

جولاۋشىلار داۋرىعا تالاسىپ قىزىل شەكە بولادى. بۇلارعا قارسى ماي ساتۋشى ۇشىراپ، داۋلارى ونىڭ قۇلاعىنا تيەدى. ماي قۇيعان كۇبىسىن جولدىڭ جيەگىنە قويا سالىپ، تورەلىك ايتۋعا كىرىسەدى:

- بىلاي بولسىن، جولاۋشىلار! الدىمەن تاپقان اقشانى مىنا جەرگە سالىڭدار!..

سوندا دا بولماي، جولاۋشىلار جۇدىرىقتاسا كەتەدى. ءبىر- ءبىرىنىڭ باسىنا تاياق ويناتادى. ۇشقىنى ساۋداگەرگە دە ءتيىپ كەتەدى، ونىمەن قويماي كۇبىسىن توڭكەرىپ تاستاپ، بار مايىن توگەدى.

- توقتاڭدار، توقتاڭدار! - دەپ ايقاي سالادى ساۋداگەر. - مايىمدى توگىپ تاستادىڭدار! مۇندا اكەلىڭدەر وتىز سومدى!

- و نە قىلعان وتىز سوم؟ - دەپ تاڭىرقايدى جولاۋشىلار. - ءبىز ءالى تاپقان جوقپىز قوي!

ۇشەۋى جونگە كوشىپ، ءارى قاراي ءجۇرىپ كەتەدى.

تالاس نە ءۇشىن بولعانىن بايىپتاپ ءبىلىپ الماي، بىرەۋدىڭ ىسىنە بەت الدى كيلىككەنىنە وكىنگەن ماي ساتۋشى بارماعىن تىستەپ قالا بەرىپتى.

 

اۋدارعان: شاعىبان راقىمبەكوۆ

massaget.kz