قازاقستان شەكاراسىن زاڭسىز كەسىپ وتكەن قىتاي ازاماتتارى ۇستالدى
ولارعا قاتىستى قورداي شەكارا وتريادىنىڭ تەرگەۋ ءبولىمى الدىن الا قىلمىستىق كودەكستىڭ 392-بابىنىڭ 1-تارماقشاسى بويىنشا قىلمىستىق ءىس قوزعادى، دەپ حابارلايدى ق ر ۇ ق ك شەكارا قىزمەتىنىڭ باسپا ءسوز قىزمەتىنەن.
تەرگەۋ بارىسىندا مەملەكەتتىك شەكارا بۇزۋشىلاردىڭ جالپى سانى 46 ادام ەكەندىگى انىقتالدى. بارلىعى العاشقىدا «ءۇرىمجى- ماناس» باعىتىنداعى ۇشاقپەن قىرعىز ەلىنە كەلىپتى. جۇمىس ىزدەگەن قىتايلىقتار ودان كەيىن الدەبىر ۇيىمداستىرۋشىلاردىڭ كومەگىمەن قازاق- قىرعىز شەكاراسىنان وتكەن. ودان كەيىن ولاردىڭ 39 ى وڭتۇستىك قازاقستان وبلىسىنا ساپار شەككەندىگى بەلگىلى بولدى.
«نەلەگال-2015» ءىس- شاراسىنىڭ اياسىندا 20 - مامىر كۇنى قازاقستاندىق شەكاراشىلار وڭتۇستىك قازاقستان وبلىسى بويىنشا ۇلتتىق قاۋىپسىزدىك كوميتەتىنىڭ جانە ىشكى ىستەر دەپارتامەنتتەرىنىڭ قىزمەتكەرلەرىمەن بىرلەسە وتىرىپ جەدەل ىزدەستىرۋ شارالارىن وتكىزدى. بىرلەسە وتكىزىلگەن ءىس- شارانىڭ ناتيجەسىندە 39 قىتايلىق ازاماتتىڭ مەكەن- جايى انىقتالىپ، بارلىعى دا قولعا ءتۇستى.
قازىرگى ۋاقىتتا اتالعان دەرەك بويىنشا قىلمىستىق ءىس قوزعالىپ، تەرگەۋ امالدارى جۇرگىزىلۋدە.
