مەملەكەت باسشىسى «نۇرلى جول» باعدارلاماسىن جۇزەگە اسىرۋدىڭ ناقتى ناتيجەلەرىن اتادى
بۇل تۋرالى بۇگىن «ينفراقۇرىلىم: ەكونوميكانىڭ ورنىقتى ءوسىمىنىڭ درايۆەرى» تاقىرىبىنداعى VIII استانا ەكونوميكالىق فورۋمىنىڭ جالپى وتىرىسىندا ەلباسى نۇرسۇلتان نازاربايەۆ ايتتى.
«ءبىز استانامىزدان شۇعىلا قاعيداتى بويىنشا وڭىرلەرگە تارايتىن اۆتوموبيل جولدارى جەلىسىن، تەمىر جولدار، كوپىرلەر، ەلەكتر جەلىلەرىن، مەكتەپتەر، اۋرۋحانالار، تۇرعىن ءۇي كوممۋنالدىق شارۋاشىلىعى نىساندارىن جانە وتە كوپ تۇرعىن ۇيلەر سالامىز. ولار ەڭ الدىمەن جاستارعا ارنالادى ءارى قولجەتىمدى بولادى. مەملەكەت پايىزدىق ستاۆكاسىن سۋبسيديالايدى»، - دەدى ەلباسى.
مەملەكەت باسشىسىنىڭ اتاپ وتۋىنشە، «نۇرلى جول» باعدارلاماسى اياسىندا سالىناتىن اۆتوجولداردىڭ كولىك كوممۋنيكاتسيالارى ءۇش جىلدىڭ ىشىندە سالىناتىندىعىن اتاپ ءوتتى.
«بۇل ەلدىڭ بارلىق وڭىرلەرىنىڭ تەڭگەرىمدى دامۋىنا قول جەتكىزۋگە مۇمكىندىك بەرەدى، ەكونوميكالىق دامۋدا، سونىمەن بىرگە الەۋمەتتىك-دەموگرافيالىق احۋالدا تەڭسىزدىكتى تومەندەتەدى. «نۇرلى جول» باعدارلاماسىن جۇزەگە اسىرۋ ءبىرقاتار كورنەكتى ناتيجەلەرگە قول جەتكىزۋگە مۇمكىندىك بەرەدى. 2019-جىلعا دەيىن كورشى ەلدەرگە شىعۋ مۇمكىندىگىن قامتاماسىز ەتە وتىرىپ، ءىرى قالالار اراسىنداعى جولعا كەتەتىن ۋاقىت ۇشتەن ءبىر ەسەگە قىسقارادى. ەلەكتر ەنەرگياسىنا قاجەتتىلىكتى تولىقتاي قامتاماسىز ەتەتىن ءبىرىڭعاي ەنەرگيا جۇيەسى قالىپتاستىرىلادى. بۇل ءتۇرلى وڭىرلەردەگى ەكونوميكالىق وسىمدەردى تەڭەستىرۋگە مۇمكىندىك بەرەدى. بۇعان قوسا، باعدارلاما جارتى ميلليوننان استام جۇمىس ورنىن قۇرادى. بۇل ءبىز ءۇشىن از ەمەس»، - دەدى ق ر پرەزيدەنتى.
اۆتور: مارلان جيەمباي
