ماسكەۋدە ەلباسىنا ارنالعان كىتاپتىڭ تۇساۋكەسەرى ءوتتى - فوتو
ⅩⅨ عاسىردا تۇرعىزىلعان، ماسكەۋدەگى تاريحي-مادەني ەسكەرتكىشتەردىڭ ءبىرى سانالاتىن ءزاۋلىم سارايدا ۇيىمداستىرىلعان بۇل سالتاناتتى شاراعا بەلگىلى مەملەكەت جانە قوعام قايراتكەرلەرى، ساياساتكەرلەر مەن زيالى قاۋىم وكىلدەرى قاتىستى.
ەلباسىنىڭ ءومىر جولىنا ارنالعان كىتاپتىڭ تۇساۋكەسەر راسىمىندە نۇرسۇلتان نازاربايەۆتىڭ تۇلعالىق قاسيەتتەرىنە قاتىستى كوڭىل تولقىتار، تالايعا وي سالار اڭگىمەلەر ايتىلدى. سونداي-اق، ەڭبەكتى جازۋ بارىسىندا اۆتوردىڭ تالماي، ايانباي تەر توككەنى، كەيىپكەرىن سومداردا ادالدىقتان اتتاماي، شىندىقتى تۋ ەتىپ ۇستاي بىلگەنى دە كەڭىنەن ءسوز ەتىلدى.
تاراتا ايتار بولساق، ايتۋلى جيىنعا ارنايى قاتىسقان رەسەي فەدەراتسياسىنىڭ سىرتقى ىستەر ءمينيسترى سەرگەي لاۆروۆ قازاقستان پرەزيدەنتىنە دەگەن ىستىق ىقىلاسقا تولى لەبىزىن بىلدىرە كەلىپ، «جىبەكتەي ەسىلمەگەن جول» كىتابىنىڭ ماڭىزدىلىعىنا، جازۋشىنىڭ ءوز كەيىپكەرىنىڭ بولمىس-ءبىتىمىن، سان-سالالى ەڭبەگىن، قايراتكەرلىك قاسيەتىن، ءوز ەلىن ورگە سۇيرەۋدە تاباندىلىق كورسەتىپ كەلە جاتقانىن، قارىم-قابىلەتىن، ەرىك-جىگەرىن، ادامي جان دۇنيەسىن كوركەم تىلمەن جەتكىزە بىلگەنىنە توقتالدى.
سونداي-اق، جيىنعا قاتىسقاندار اراسىندا رەسەي جازۋشىلار وداعى ماسكەۋ قالالىق باسقارماسىنىڭ ءتوراعاسى، جازۋشىلاردىڭ حالىقارالىق قاۋىمداستىعى اتقارۋ كوميتەتىنىڭ ءبىرىنشى حاتشىسى ۆلاديمير بويارينوۆ، م. ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ رەكتورى ۆيكتور سادوۆنيچي، ك س ر و- نىڭ حالىق ءارتىسى ارمەن دجيگارحانيان، ازەربايجان ك س ر- ءىنىڭ حالىق ءارتىسى، اتالعان رەسپۋبليكانىڭ رەسەيدەگى ەلشىسى پولاد بيۋلبيۋلوعلى، بەلگىلى ساياساتتانۋشى ماكسيم شيەۆچەنكو، قازاقستاننىڭ رەسەيدەگى ەلشىسى مارات ءتاجين، «نازاربايەۆ ورتالىعى» كوپ سالالى عىلىمي-تالداۋ جانە گۋمانيتارلىق-اعارتۋ مەملەكەتتىك مەكەمەسىنىڭ ديرەكتورى قانات ساۋدابايەۆ جانە تاعى باسقالار نۇرسۇلتان نازاربايەۆ جونىندە جانە «جىبەكتەي ەسىلمەگەن جول» كىتابىنا قاتىستى ءوز ويلارىن ورتاعا سالدى.
جيىن سوڭىندا بارلىق قاتىسۋشىلار ەلباسىنا ارنالعان ەرەن ەڭبەك - «جىبەكتەي ەسىلمەگەن جول» كىتابى قالىڭ وقىرماننىڭ ءسۇيىپ وقيتىن دۇنيەسىنە اينالاتىنىنا سەنىم ءبىلدىردى.
