نەگە اكىمنىڭ كومەكشىسى ساناسىز، ءمينيستردىڭ كومەكشىسى ساۋاتسىز؟

استانا. قازاقپارات - الەۋمەتتىك جەلىدە، جەڭىس مەرەكەسى قارساڭىندا، اتىراۋدا سوعىس ارداگەرلەرىنىڭ قۇرمەتىنە قويىلعان ەسكەرتكىشتىڭ اشىلۋ راسىمىندە وبلىس اكىمى ورىنباسارىنىڭ كومەكشىسى توقساننان اسقان سوعىس ارداگەرىن ەمەس، قول شاتىرمەن اكىمنىڭ ورىنباسارىن جاۋىننان قورعاپ تۇرعان سۋرەت جاريا بولدى.

بۇل كورىنىس الەۋمەتتىك جەلىدە تەز تاراپ، تالقىعا ءتۇسىپ، وبلىس اكىمىنىڭ ورىنباسارى سىننىڭ استىندا قالعان ەدى.

دەسە دە، ارتىنشا، وبلىس اكىمنىڭ ورىنباسارى بۇل جاعدايعا كومەكشىسىن كىنالاپ، اقتالىپ باقتى. اتالمىش جاعدايعا قاتىستى ءمان-جايدى بىلمەك بولعان ب ا ق وكىلدەرىنە وبلىس اكىمىنىڭ باسپا ءسوز قىزمەتى ول سۋرەتتىڭ جيىن باستالعان ساتتە تۇسىرىلگەنىن ايتىپ، سوڭىنان كومەكشىنىڭ قولشاتىردى ارداگەردىڭ ۇستىنە ۇستاپ تۇرعان سۋرەتىن جىبەرگەن. ايتۋلارىنشا، اكىم ورىنباسارى قاريانىڭ جاڭبىر استىندا قالىپ، ءۇستى سۋ بولىپ تۇرعانىن بايقاپ، كومەكشىسىنە تەز ارادا قولشاتىردى قاريانىڭ ۇستىنە ۇستاۋدى تاپسىرىپتى. ءالقيسا...

الايدا، كوپ ۇزاماي الەۋمەتتىك جەلىدە سول ارداگەردىڭ جاڭبىر استىندا، كەمپىرىمەن قول ۇستاسىپ كەتىپ بارا جاتقان سۋرەتى جاريا بولدى. شاماسى، جيىن بىتكەن سوڭ اكىم قارالار كولىكپەن كەتىپ، ارداگەر ۇيىنە جاياۋ قايتقان-اۋ. رومانتيكا...

ال تاياۋدا الەۋمەتتىك جەلىدە ءجۇز جاسقا تولعان اتاسىن قۇتتىقتاعان ءبىلىم جانە عىلىم ءمينيسترى اسلان ءسارىنجىپوۆ مىرزا ابىرويسىزدىققا تاپ بولدى. ەلىمىزدىڭ باس مۇعالىمى «اۋلداعى اتامىز 100 جىلعا تولدى. ۇستاز، مەكتەپتىن ديرەكتورى بولعان. پوزدراۆلياەم سو 100 لەتنيم يۋبيلەەم اتاشكۋ، ۋچيتەليا سەلسكوي شكولى» دەگەن اينالدىرعان ءۇش سويلەمدە ءتورت قاتە جىبەرىپتى. «جاسقا» دەگەن ءسوزدىڭ ورنىنا «جىلعا» دەگەن ءسوزدى پايدالانىپ، جاڭالىق اشقان سەكىلدى. سونداي-اق، «ڭ» ءارپىنىڭ ورنىنا «ن» دەپ جازعان. ال «اۋىلداعى» دەگەن سوزدە «ى» ارپىنە ورىن تابىلماپتى. ورىسشاسى دا ءماز ەمەس. «پوزدراۆلياەم سو 100 لەتنيم يۋبيلەەم اتاشكۋ، ۋچيتەليا سەلسكوي شكولى» دەگەن سويلەمدە 100 دەن كەيىن سىزىقشا قويۋدى تاعى دا ۇمىتىپتى.

الايدا، الەۋمەتتىك جەلىدەگى سىننان كەيىن مينيستر مىرزا ول قۇتتىقتاۋدى ءوزى جازباعانىن ايتىپ اقتالدى. ايتۋىنشا، ونىڭ اتىنان وزگە ادام جازعان. ءبىراق مينيستر مىرزا ول جازبا كىمنىڭ قولتاڭباسى ەكەنىن قۇپيا كۇيدە قالدىردى. ءبىراق فەيسبۋك پاراقشاسىندا وقىرمانداردان ورىسشا كەشىرىم سۇراعان مينيستر مىرزا ول جازباسىندا دا ەكى ءۇتىردى جوعالتىپ الىپتى.

وسى جاعدايلاردى سارالاپ وتىرىپ، ساناما «نەگە اكىمنىڭ كومەكشىسى ساناسىز، ءمينيستردىڭ كومەكشىسى ساۋاتسىز؟» دەگەن ساۋال ورالدى.

«الاش ايناسى»