استانا ەكونوميكالىق فورۋمى ءوز جۇمىسىن باستادى
فورۋمعا شامامەن 90 ەلدەن 3 مىڭعا جۋىق دەلەگات كەلدى.
ولارلىڭ ىشىندە 200 گە جۋىق ۆيپ- سپيكەر، ماسەلەن پرەمەر-مينيسترلەر، پارلامەنت مۇشەلەرى، قارجى ينستيتۋتتارىنىڭ وكىلدەرى، نوبەل سىيلىعىنىڭ يەگەرلەرى، حالىقارالىق ۇيىمدار باسشىلارى جانە بەلگىلى عالىمدار بولادى.
22 - مامىر كۇنى ەلباسى نۇرسۇلتان نازاربايەۆ VIII استانا ەكونوميكالىق فورۋمىنىڭ جۇمىسىنا قاتىسادى. فورۋم «ينفراقۇرىلىم: ەكونوميكانىڭ ورنىقتى ءوسىمىنىڭ درايۆەرى» تاقىرىبىنا ارنالماق.
سونداي- اق، فورۋم اياسىندا نەبارى ەكى كۇننىڭ ىشىندە، ياعني 21-22 - مامىردا وتىزعا جۋىق سەسسيا وتەدى. ولاردىڭ بارلىعى ەكونوميكاداعى الەۋەتى زور سالالاردىڭ ءبىرى - ينفراقۇرىلىمدى دامىتۋ تاقىرىبىنا ارنالادى.
ايتا كەتەيىك، فورۋمدى ۇيىمداستىرۋعا ب ۇ ۇ، ە ق ى ۇ، ب ۇ ۇ د ب، دۇنيەجۇزىلىك بانك سياقتى ىرگەلى ۇيىمدار اتسالىسىپ وتىر.
القالى جيىن بيىل تۇڭعىش رەت "جاسىل" ەكونوميكا ەلەمەنتتەرى بويىنشا وتكىزىلەدى. قاتىسۋشىلارعا تاراتىلاتىن ماتەريالداردىڭ ءبىر بولىگى قايتا وڭدەۋدەن وتكىزىلگەن ونىمدەردەن جاسالعان. سونىمەن قاتار، فورۋم بيىل العاش رەت «اقىلدى» ناۆيگاتسيا قولدانۋ ارقىلى ۇيىمداستىرىلادى. ياعني، جۋىق ارادا قاتىسۋشىلارعا ارنالعان ۇيالى تەلەفونعا ورناتىلاتىن باعدارلاما جاسالادى. سول ارقىلى مارتەبەلى مەيماندار تەك تاۋەلسىزدىك سارايىندا عانا ەمەس، سونىمەن قاتار استانادا دا باعىتتارىن جاڭىلماي تاباتىن بولادى.
سونىمەن بىرگە، استاناداعى ەكونوميكالىق فورۋم - 2015 اياسىندا وتەتىن «جاڭا جىبەك جولى» IIІ حالىقارالىق كولىكتىك- لوگيستيكالىق بيزنەس- فورۋمىنا ءار ءتۇرلى ەلدەردەن 200 دەن استام تەمىر جول اكىمشىلىكتەرى وكىلدەرى قاتىسادى دەپ كۇتىلۋدە.
