گەرمانيادان شىققان قازاق ءتىلدى نەمىس بايكەرلەر موتوسيكلمەن شىمكەنتكە بارا جاتىر - فوتو
- ءبىز قازاقستاندا تۋىپ- وسكەنىمىزدى ماقتان ەتەمىز. قانشاما ەلدى كورسەك تە، مۇنداي قوناقجايلىلىق پەن باۋىرمالدىلىقتى ەش جەردەن كەزدەستىرگەن جوقپىز. قازاقستان جيىرما جىلدان استام ۋاقىت ىشىندە كوپتەگەن تابىستارعا قول جەتكىزىپ، گۇلدەنە ءتۇستى. ءبىز قازاق ءتىلىن دە ۇمىتقان جوقپىز، ەركىن سويلەي الامىز. قازىرگى تاڭدا گەرمانيادا وڭتۇستىك قازاقستان مەن جامبىل وبلىستارىنان كوشكەن 100 مىڭنان استام نەمىس تۇرادى. ءبىز ءوز ارامىزدا قازاق تىلىندە سويلەسەمىز. سىرتقى ءتۇرىمىز نەمىس بولسا دا، جانىمىز قازاق، - دەيدى ولار.
بايكەرلەردى باتىس قازاقستاندىقتار قۇشاق جايا قارسى الدى. قازاقستان حالقى ب ق و اسسامبلەياسى ءتوراعاسىنىڭ ورىنباسارى عايسا قاپاقوۆ ولارعا قوش كەلدىڭىز ايتتى.
ميحايل مەن رومان فيتتەرەردىڭ سوزىنە قاراعاندا، كەزىندە قازاقستانعا جەر اۋدارىلعان اتا- انالارىن قازاقتار قولدا بارىمەن ءبولىسىپ، امان ساقتاپ قالىپتى. قازاق ەلىنىڭ بارلىق تابىسىنا قۋانىپ وتىراتىن ولار تۋعان جەرىن ءبىر كورىپ قايتپاق بولىپ موتو جورىققا بەل بۋىپتى. شتۋتگارتتان 14 - مامىر كۇنى شىققان بايكەرلەر وسىعان دەيىن پولشا، ۋكراينا، رەسەي جەرلەرىن باسىپ ءوتتى.
بايكەرلەر بۇدان كەيىن اقتوبەدە بولماق، وندا تۋىستارى كۇتىپ وتىر. سودان كەيىن تۋعان باۋىرى مانۋەل فيتتەرەر تۇراتىن شىمكەنتكە جول تارتپاقشى.
اعايىندىلار نەمىس، قازاق، ورىس تىلدەرىن ەركىن مەڭگەرگەن، تۇرىكشەنى تۇسىنەدى، اعىلشىنشا دا بىلەدى.
ايتا كەتەيىك، جاستايىنان موتوسيكلدى «ەرتتەپ مىنگەن» بايكەرلەر وسىعان دەيىن تەمىر كولىكتەرىمەن بۇكىل ەۋروپانى دەرلىك، يتاليا، يسپانيا، اۆستريا، فرانسيا ەلدەرىن ارالاپ شىعىپتى.
