كەمبريدج ۋنيۆەرسيتەتىندە شاكارىمنىڭ شىعارماشىلىعى تۋرالى كىتاپتىڭ تۇساۋكەسەرى ءوتتى
تۇساۋكەسەر بارىسىندا الەمگە ايگىلى جوعارعى وقۋ ورىنىنىڭ ۆيتسە-پرەزيدەنتى پيتەر نولان جانە كەمبريدج پروفەسسورلارىمەن كەزدەسۋ ۇيىمداستىرىلىپ، ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى جانە كەمبريدج ۋنيۆەرسيتەتى اراسىندا عىلىمي جۇمىستار جاساۋ مەن ءوزارا ىنتىماقتاستىق جونىندەگى مەموراندۋمعا قول قويىلدى.
بريتاندىق اكادەميالىق جۇرتشىلىققا قازاق حالقىنىڭ ۇلى فيلوسوفى، اقىنى شاكارىم قۇدايبەردى ۇلىنىڭ ءومىربايانى تانىستىرىلدى.
تۇساۋكەسەردىڭ ەكىنشى بولىگى ديسسكۋسسيا تۇرىندە ءوتتى - قاتىسشۋلار اۆتورعا ءوز سۇراقتارىن قويدى. ءسويتىپ، «Shakarim. The life of a kazakh poet» اعىلشىن تىلىندەگى نۇسقاسى وتە جوعارى دەڭگەيدە ءوتتى.
كەمبريدج ۋنيۆەرسيتەتىنىڭ پروفەسسورى سيدحارت ساكسەن: «شاكارىمنىڭ شىعارماشىلىعىمەن تانىسۋ مەن ءۇشىن قازاقستاندى جاڭا قىرىنان تانۋ بولدى جانە اقىننىڭ فيلوسوفيالىق ويلارى مەنى ەرەكشە تەبىرەنتتى»، - دەسە، مادەنيەتتانۋ دوكتورى ا. تايزەنحاۋزەن: «بۇل كىتاپتا قازاق اقىنى، فيلوسوف ءارى پەداگوگ شاكارىمنىڭ بۇكىل ءومىرى باياندالعان. بۇل جەردە ءبىر اقىننىڭ ءومىربايانى عانا ەمەس، سونىمەن قاتار بۇكىل ۇلتتىڭ تاريحى جاتىر»، - دەپ باعا بەردى.
ەستەرىڭىزگە سالا كەتەيىك، قازاقتىڭ ۇلى اقىنى تۋرالى كىتاپ قازىرگى تاڭدا 4 تىلدە - قازاق، ورىس، اعىلشىن، تۇرىك تىلدەرىندە جارىق كوردى، الداعى ۋاقىتتا قىتايلىق وقىرمانداردىڭ سۇرانىسى بويىنشا كۇنشىعىس ەلىنىڭ تىلىندە جارىق كورمەك.
سونىمەن قاتار ۋنيۆەرسيتەت رەكتورى وسى ساپار بارىسىندا «بولاشاق» باعدارلاماسى بويىنشا ءبىلىم الىپ جاتقان قازاقستاندىق ستۋدەنتتەرمەن دە جۇزدەستى.
تاعى دا اتاپ وتەتىن ءبىر جايت - قازاقستان رەكتورلار كەڭەسى ءتوراعاسى ەرلان سىدىقوۆ QS حالىقارالىق رەيتينگ اگەنتتىگىنىڭ نەگىزىن قالاۋشىسى ءارى قازىرگى تاڭداعى ءتوراعاسى نۋنتسيا كۋاكۋارەلليمەن كەزدەستى. كەزدەسۋ بارىسىندا قازاقستاندىق جوعارى وقۋ ورىندارىنىڭ الەمنىڭ الدىڭعى قاتارلى ءبىلىم وردالارىنا كىرۋ جايى كەڭىنەن اڭگىمە بولدى، دەپ حابارلايدى ە ۇ ۋ باسپا ءسوز قىزمەتىنەن.
