ماڭعىستاۋلىق دزيۋدوشىلار حالىقارالىق تۋرنيردىڭ جەڭىمپازى اتاندى - فوتو

اقتاۋ. قازاقپارات - اقتاۋ قالاسىندا دزيۋدودان ەر قوساي قۇدايكە ۇلى اتىنداعى «حالىق باتىرى» حالىقارالىق جارىسىنىڭ قورىتىندىلارى شىعارىلدى.

ءۇش كۇنگە سوزىلعان باسەكەگە قازاقستاننىڭ ماڭعىستاۋ جانە باتىس قازاقستان وبلىستارى، تاراز، اقتوبە، قىزىلوردا، اتىراۋ قالالارىنان، تۇركيا جانە ازەربايجان ەلدەرىنەن كەلگەن 12 سالماق دارەجەسىندەگى بارلىعى 274 سپورتشى (1997-1998، سونداي-اق 2002-2003-جىلعى) قاتىسقان.

بيىل قازاق حاندىعى قۇرىلۋىنىڭ 550 جىلدىعىنا ارنالعان بۇل جارىس جەتىنشى رەت ءوتتى.

«جارىستىڭ باستى ماقساتى - اتالعان سپورت ءتۇرىن كەڭىنەن ناسيحاتتاۋ، ۇزدىك سپورتشىلاردى انىقتاۋ. بۇدان باسقا، تاجىريبە الماسۋ. ەگەر اۋەلدە جارىس رەسپۋبليكالىق دەڭگەيدە وتكىزىلسە، سوڭعى جىلدارى ونىڭ دارەجەسى حالىقارالىق دەڭگەيگە دەيىن وسكەن. باسقا ەلدەردىڭ سپورتشىلارى قاتىسىپ، ءبىر-بىرلەرىنىڭ جەكپە-جەكتەرىن باقىلاپ، تاجىريبە الادى»، - دەدى ماڭعىستاۋ وبلىسىندا بوزبالالار اراسىنداعى دزيۋدودان باس جاتتىقتىرۋشى ماناربەك بيسەكەنوۆ.

جارىستىڭ ءبىرىنشى كۇنىنىڭ قورىتىندىلارى بويىنشا ماڭعىستاۋ وبلىسى جەرگىلىكتى سپورتشىلارىنىڭ جەڭىستەرىنىڭ ارقاسىندا ءبىرىنشى جالپى كوماندالىق ورىنعا شىقتى. جارىستىڭ ەكىنشى كۇنى بارلىق سالماق دارەجەلەرىندەگى جەكە جەكپە-جەكتەرگە ارنالعان. ءۇشىنشى كۇننىڭ جارىس قورىتىندىسى بويىنشا ماڭعىستاۋدىڭ جارىس جەڭىمپازى ەكەنى بەلگىلى بولدى. وبلىس سپورتشىلارى 9 التىن، 6 كۇمىس جانە 5 قولا مەدال الىپ، ءبىرىنشى جالپى كوماندالىق ورىندى يەلەندى. ەكىنشى ورىندا جامبىل وبلىسى بولسا، ءۇشىنشى ورىندى اتىراۋ وبلىسىنان كەلگەن كوماندا قانجىعاسىنا بايلادى.