استانا قالاسىنىڭ اكىمى نوسەر جاۋىنعا بايلانىستى بارلىق تەحنيكانى جۇمىلدىرىپ، كۇندەلىكتى كەزەكشىلىك ۇيىمداستىرۋدى تاپسىردى

استانا. قازاقپارات - بۇگىن استانا قالاسىنىڭ اكىمى ادىلبەك جاقسىبەكوۆتىڭ باسشىلىعىمەن وتكەن كەزەكتى اپپاراتتىق جيىندا دەمالىس كۇندەرى تولاسسىز جاۋعان نوسەر سالدارىن جويۋ ماسەلەلەرى مەن ەلورداداعى سانيتارلىق-ەپيدەميولوگيالىق جاعداي تالقىلاندى، دەپ حابارلايدى استانا قالاسى اكىمىنىڭ باسپا ءسوز قىزمەتىنەن.

جاۋىن-شاشىن سالدارىنان 16-17- مامىر كۇندەرى ەلوردانىڭ 12 ۋچاسكەسىن سۋ باسىپ، كولىك قوزعالىسى شەكتەلدى. «قازگيدرومەت» مالىمەتتەرى بويىنشا جاۋىن-شاشىننىڭ ايلىق مولشەرى 34 م م بولسا، سول كۇنى ءبىر تاۋلىك ىشىندە 38,5 م م جاۋىن-شاشىن جاۋعان.

سينوپتيكتەردىڭ حابارلاۋىنشا، ەلوردادا الداعى كۇندەردە دە كوشپەلى بۇلت شىعىپ، جاڭبىر جاۋادى دەپ كۇتىلۋدە.

«دەمالىس كۇندەرى جاۋعان جاۋىن-شاشىن جالپى نورمادان اۋىتقىعان قۇبىلىس. جاۋعان جاڭبىر مولشەرى قالىپتى مولشەردەن اسىپ كەتتى. سينوپتيكتەردىڭ بولجاۋىنشا، مۇنداي جاعداي الداعى ۋاقىتتا دا قايتالانۋى مۇمكىن. سوندىقتان بۇل كۇندەرى بارلىق تەحنيكانى جۇمىلدىرىپ، كۇندەلىكتى كەزەكشىلىك ۇيىمداستىرۋ قاجەت. سۋ سورۋعا ارنالعان قۇرىلعىلار سۋ باسۋ قاۋپى بار جەرلەردە ورناتىلۋى كەرەك»، - دەدى اكىم.

قالانىڭ كوممۋنالدىق قىزمەتتەرى كۇشەيتىلگەن رەجىمدە جۇمىس اتقارۋدا. استانادا دەمالىس كۇندەرى 10 مىڭ تەكشە مەتر جاڭبىر سۋى سورىلدى.