جاۋىرىنى جەرگە تيمەگەن بۋرابايلىق بالۋان تاعىدا اقمولا وبلىسىنىڭ بارىسى اتاندى - فوتو

كوكشەتاۋ. قازاقپارات - كوكشەتاۋدا قازاقشا كۇرەستەن «اقمولا وبلىسى بارىسى» تۋرنيرىنىڭ جەڭىمپازى انىقتالدى.  

 وبلىس ورتالىعىنداعى تاۋەلسىزدىك الاڭىندا وتكەن سايىستا 38 سپورتشى بالۋاننىڭ التىن بەلبەۋىن ساراپقا سالدى. ەڭ اۋىر سالماق سانالاتىن تۇيە بالۋان كۇرەسىندە وسىعان دەيىن وبلىس كولەمىندە بىردە ءبىر رەت «جاۋىرىنى جەر يىسكەمەگەن» بۋرابايلىق نۇرلان جامالوۆ جەڭىمپاز اتانىپ، 180 مىڭ تەڭگەنىڭ سەرتيفيكاتىن قانجىعاسىنا بايلادى.

وبلىستىڭ ءار وڭىرىنەن جينالعان كىلەڭ مىقتى 38 بالۋاننىڭ ىشىندە باعى مەن بابى قاتار شاپقان نۇرلان ەندى استانا قالاسىندا وتەتىن «قازاقستان بارىسى» تۋرنيرىندە اقمولا وبلىسىنىڭ نامىسىن قورعايتىن بولادى. سونىمەن قاتار، كوكشەتاۋ قالاسىنىڭ نامىسىن قورعاپ، 2- ورىن العان اسەت ءجۇنىسوۆ تە «قازاقستان بارىسى» تۋرنيرىنە قاتىساتىن بولدى.

ەسكە سالا كەتسەك، بۋرابايلىق نۇرلان جامالوۆ وسىمەن 5- مارتە «اقمولا وبلىسى بارىسى» اتانىپ وتىر.