داريعا نازاربايەۆا ءبىلىم مينيسترلىگىنە بالاما وقۋلىقتاردان باس تارتۋدى ۇسىندى
بۇگىن ماجىلىستە وقۋلىقتاردىڭ ساپاسى جانە ءبىلىم بەرۋ ۇيىمدارىن وقۋلىقتارمەن قامتاماسىز ەتۋگە ارنالعان ۇكىمەت ساعاتىندا پالاتا ءتوراعاسىنىڭ ورىنباسارى داريعا نازاربايەۆا وسىلاي مالىمدەدى.
«ءبىز ءالى كۇنگە دەيىن مينيسترلىكپەن بىرەگەي وقۋلىق بازاسىن قۇرۋ تۋرالى جانە مىندەتتى رەتىندە بالاما وقۋلىقتاردان باس تارتۋ ماسەلەسىندە ورتاق تۇسىنىستىككە كەلە العانىمىز جوق. ارينە، بالاما وقۋلىقتارعا ەشكىم قارسىلىق جاساپ وتىرعان جوق، مەكتەپتەر ونى ساتىپ الا بەرسىن، كىتاپحانالارىن تولىقتىرسىن. ماسەلە وندا ەمەس. ەگەر مۇعالىم قاجەت دەپ ساناسا، وندا ونىڭ ءوزى كىتاپحاناعا بارىپ سول وقۋلىقتى الار ەدى. ەگەر وقۋشى مەكتەپ وقۋلىعىنان الاتىن بىلىمگە قاناعاتتانباسا، وندا كىتاپحاناعا بارىپ، سول جەردەن ول دا ءبىلىمىن تولىقتىرا الادى. قازىر بىزدە مەكتەپ وقۋشىلارىندا اقپاراتتار الۋعا، ولاردى وڭدەۋگە تولىق مۇمكىندىكتەر بارشىلىق»، - دەدى د. نازاربايەۆا جيىندى قورىتىندىلاي كەلە.
ۆيتسە- سپيكەردىڭ ايتۋىنشا، بالاما وقۋلىقتارعا قوماقتى قاراجات جۇمساۋدىڭ قاجەتى شامالى.
«كەيدە باسپالار مەسەناتتار، قايىرىمدىلىق جاساۋشىلار ءوز قاراجاتتارىمەن مەملەكەتكە قامقورلىق جاساپ وتىر دەگەندە دە ءبىر قۋلىق بار ءتارىزدى»، - دەپ اتاپ ءوتتى د. نازاربايەۆا.
سونىمەن قاتار ۆيتسە- سپيكەر ءمينيستردىڭ وقۋلىق شىعارۋعا 2,3 ميلليارد تەڭگە جەتىسپەيدى دەگەن ءسوزىن دە كەلتىرىپ ءوتتى.
«ەگەر مينيسترلىك مىندەتتى رەتىندە بالاما وقۋلىقتار شىعارۋ تاجىريبەسىنەن باس تارتاتىن بولسا، وندا بىزگە الگى شىعىستاردى جابۋعا دا قاراجات تابىلاتىن ەدى»، - دەدى دەپۋتات.
اۆتور: قانات مامەتقازى ۇلى
