ۇلتتىق ناقىشتا كيىم تىگەتىن شەبەرحانا ءونىمىن شەتەلگە شىعارۋدا

استانا. قازاقپارات -   تاراز قالاسىنداعى ۇلتتىق ناقىشتا كيىم تىگەتىن «اسىل ديزاين» شەبەرحاناسى شەتەلگە شىعاراتىن ءونىم كولەمىن ۇلعايتتى. جىلىنا مىڭ مەتر ماتا وڭدەيتىن شاعىن سەحتىڭ ءونىمى بۇگىندە ءۇش مىڭ مەتردەن اسىپ وتىر.

قازاقى ويۋ- ورنەكپەن ارلەنىپ تىگىلگەن كيىمدەر جەرگىلىكتى تۇتىنۋشىلاردىڭ عانا ەمەس، شەتەلدىكتەردىڭ دە قىزىعۋشىلىعىن تۋدىردى.

سايات قىلىشبەكوۆ -  وسى شەبەرحانادا جۇمىس ىستەيتىن جالعىز ەر ازامات. ول ديزاينەر بولۋدى بالا كەزىنەن ارمانداعان. سوندىقتان ارنايى كاسىپتىك كوللەدجگە ءتۇسىپ، ديزاينەر- تىگىنشى ماماندىعىن الىپ شىقتى. بۇگىندە وڭىرگە تانىمال شەبەرحانادا ەڭبەك ەتەدى.

شەبەرحانا ءوز جۇمىسىن وسىدان 22 جىل بۇرىن باستاپتى. كاسىپورىن العاشقىدا شيكىزاتتى شەتەلدەن الدىرعان. كەيىن جاڭا تەحنولوگيانى ەنگىزۋ ارقىلى ءوز ءوندىرىسىن جولعا قويعان. سونىڭ ناتيجەسىندە ۇلتتىق ويۋ- ورنەكپەن بەزەندىرىلگەن وتاندىق ءونىم شىعارىپ وتىر.

 ايدارحان قاليەۆ، «اسىل ديزاين» ءسان ءۇيىنىڭ باس ديزاينەرى:

 - بۇل دايىن زاتتار، كۇندەلىكتى كيىمدەر تەك قانا تارازدا ەمەس، الماتى، استانا، ۇلكەن- ۇلكەن كورمەلەردە شىعىپ جاتىر. سۇرانىس ۇلكەن. ايەلدەرگە ارنالعان ۇلتتىق ناقىشتاعى قازاقى ورامالدار، شارفتار شەتەلگە كەتىپ جاتىر. تىگىن سەحىندا جيىرمادان استام ادام جۇمىس ىستەيدى. ولاردىڭ ءارقايسىسى تاۋلىگىنە ءبىر كيىمنەن تىگىپ شىعارادى. دەگەنمەن، بۇل كولەم تاپسىرىسقا بايلانىستى وزگەرىپ وتىرادى.

قاجەتتى ماماندار كاسىپورىن جانىنان اشىلعان كوللەدجدە دايىندالادى. مۇندا جاستاردىڭ تەوريالىق ءبىلىمىن تاجىريبەمەن ۇشتاستىرۋعا جاعداي جاسالعان. بۇل ۇدەرىس ەلىمىزدەگى جەڭىل ونەركاسىپ سالاسىن دامىتۋعا ۇلكەن سەرپىن بەرمەك.

www.24.kz