بوكس: گەننادي گولوۆكين ۆيللي مونرونى نوكاۋتپەن جەڭدى - فوتو

استانا. قازاقپارات - قازاقستاندىق كاسىبي بوكسشى گەننادي گولوۆكين كاليفورنيا شتاتىنداعى ينگلۆۋد قالاسىنداعى «فورۋم» ارەناسىندا امەريكاندىق كىشى ۆيللي مونرونى التىنشى راۋندتا نوكاۋتقا جىبەرىپ، ورتا سالماقتا سۋپەرچەمپيوندىق اتاعىن قورعاپ قالدى.

باستاپقىدان قارسىلاسىن سوققىنىڭ استىنا العان گ. گولوۆكين مونرونى ەكىنشى راۋندتا ەكى مارتە سۇلاتىپ ءتۇسىرىپ، نوكداۋنعا جىبەردى. دەگەنمەن ءۇشىنشى، ءتورتىنشى راۋندتا امەريكالىق بوكسشى ەسىن جيعانداي بولىپ قارسىلاسا باستادى. گەننادي دە «فورۋمداعى» 12 مىڭ كورەرمەنگە قىزىقتى سوزعىسى كەلگەندەي، ەكپىنىن ءسال باستى. الايدا التىنشى راۋندتا گ. گولوۆكيننىڭ اۋىر سوققىسىنان كەيىن الاڭداعى تورەشى ايقاستى توقتاتتى.

بۇل - 33 جاسار قازاقستاندىق بوكسشىنىڭ كاسىبي رينگتەگى 33 كەزدەسۋىندەگى كەزەكتى جەڭىسى. گەننادي سونىڭ 30 ىن، قاتارىنان 26 شايقاسىن نوكاۋتپەن اياقتاپ وتىر.