پولشا مەن ەستونيادا افريكاندىق دوڭىز وباسىنىڭ جاڭا وقيعالارى تىركەلدى
بۇل تۋرالى بەلارۋس اۋىل شارۋاشىلىعى جانە ءوندىرىس مينيسترلىگىنىڭ ۆەتەرينارلىق جانە ازىق-تۇلىككە قاداعالاۋ جۇرگىزۋ دەپارتامەنتىنە سىلتەمە جاساعان بەلتا حابارلايدى.
حالىقارالىق ەپيزووتيكالىق بيۋروسىنىڭ مالىمەتتەرىنشە، بۇل ىندەتتىڭ جاڭا وقيعالارى پولشاداعى پودلياسك ۆويەۆودستۆوسىنىڭ اۋماعىندا، سونداي-اق ەستونيانىڭ ۆالگاماا جانە يدا-ۆيرۋماا ۋەزدەرىندە تىركەلگەن.
وسىعان بايلانىستى دەپارتامەنت بەلارۋس اۋماعىندا ليتۆادان ءتىرى شوشقالاردى، بىلعارى، ءمۇيىزدى-تۇياقتى جانە ىشەكتەن جاسالعان شيكىزاتتاردى، شوشقا قىلتانىن، اڭشىلىق ولجالارىن، جانۋارلاردان، سونىڭ ىشىندە بالىقتار مەن قۇستاردان جاسالعان مال ازىعى مەن ازىق قوسپالارىن، تەرميالىق وڭدەۋدەن (تەمپەراتۋراسى پليۋس 70 گرادۋستان تومەن ەمەس، وڭدەۋ ۋاقىتى - 20 مينۋتتان از ەمەس) وتكىزىلمەگەن مىسىقتار مەن يتتەرگە ارنالعان ازىق قوسپالارىن، سونداي-اق پولشا مەن ەستونيادان شوشقالاردى سويۋ جانە ەتىن بولشەكتەۋ جابدىقتارىندا بولعان شيكىزاتتىڭ كىرگىزىلۋىنە جول بەرمەۋ بويىنشا قوسىمشا شارالاردى قولدانۋ قاجەتتىلىگى تۋرالى اقپاراتتاندىرادى.
دوڭىز وباسى وقيعالارى تىركەلگەن پودلياسك ۆويەۆودستۆوسى، ۆالگاماا جانە يدا- ۆيرۋماا ۋەزدەرىنە كەلەتىن بولساق، بۇلاردا دا وسىنداي شەكتەۋلەر كوزدەلگەن.
افريكاندىق دوڭىز وباسى - سوزىلمالى تۇردە وتەتىن جانە كوبىنەسە ولىمگە سوقتىراتىن جۇقپالى ۆيرۋستىق اۋرۋ. بۇل ىندەتكە جاس شاماسىنا جانە تۇقىمىنا قاراماستان، جابايى جانە ءۇي شوشقالارى ۇشىرايدى. بۇل اۋرۋعا قارسى ۆاكتسينا جوق. اۋرۋعا شالدىققان شوشقالاردىڭ بارلىعى دەرلىك جويىلادى. افريكاندىق دوڭىز وباسىنىڭ ادام ءۇشىن قاۋپى جوق.
