جاركەن بودەش ۇلى: مەنىڭ ءبىر ەرلىگىم - اتاجۇرتىمدى تاۋ اسىپ، تاس باسىپ قارشاداي كەزىمدە اداسپاي تاپقانىم

نۇر-سۇلتان. قازاقپارات - جاركەن بودەش ۇلى - قازاق پوەزياسىنىڭ قۇبىلىسى. كەسەك تالانت يەسى. قازاق ادەبيەتىنىڭ رۋحتى، پافوستى جىر ۇلگىسى دە، بۇگىنگى قازاق جىرىنداعى سىرشىلدىق پەن سىنشىلدىق تا، ادامعا ءتان ساعىنىش پەن جاستىققا ءتان ءمولدىر سەزىم دە، وت- جۇرەكتى وتانشىلدىق پەن جان- جۇرەكتى ۇلتجاندىلىق تا - ءبارى- ءبارى جاركەن اقىننىڭ جىرلارىندا.

اقىندى مەرەيتويىمەن قۇتتىقتاپ، تەلەفون ارقىلى سۇحباتتاسقان ەدىك.. . جاۋھار جۇرەك يەسىنىڭ جانسارايىنا ءسىز دە تورلەتىڭىز! (2015- جىل)

- ارمىسىز، جاركەن اعا!

- ار بول، بارمىن بالام!

- مىنە، بۇگىن جەتپىس جاسقا كەلدىڭىز، تۋعان كۇنىڭىز، مەرەيلى مەرەيتويىڭىز قۇتتى بولسىن!

- راحمەت، اينالايىن! ازداپ سىرقاتتانىپ، ەمحانا مەن ءۇيدىڭ اراسىندا ءجۇرمىن.

- جۋىردا شىعارماشىلىق كەشىڭىز وتكەلى جاتىر ەكەن.. .

- ءيا، اللا قالاسا، 19 - مامىر كۇنى قازاقستان جازۋشىلار وداعىندا «ارعى تاۋعا اسۋمىن، بەرگى تاۋعا بەلەسپىن» دەگەن تاقىرىپتا شىعارماشىلىق كەشىم وتەدى. قازىر سونىڭ دايىندىق جۇمىستارىمەن ءجۇرىپ جاتىر.

- بارەكەلدى، كەشتىڭ اتاۋى قىزىق ەكەن.. . نەگە بۇلاي اتادىڭىز؟

- مەنىڭ بۇكىل ءومىرىم - ولەڭ. ولەڭنەن باسقا بايلىققا دا، اتاققا دا كوڭىل اۋدارعان ەمەسپىن. قۇدايدى وكپەلەتىپ الماۋ ءۇشىن ماعان بەرگەن ەڭ ۇلكەن سىيى - ولەڭدى ايالاپ، حالىقتىڭ الدىندا جەتكىزسەم، ادال بولسام، بۇكىل قانىمدى- جانىمدى بەرسەم دەپ ويلايمىن. باسقا مەنىڭ ادەبيەتتە العان اتاعىم دا جوق. كەشتىڭ اتاۋىنا كەلسەم، «ارعى تاۋعا اسۋمىن» دەپ وتىرعانىم - مەنىڭ بالا كۇنىم تۋعان جەرىم - جايىر تاۋىنىڭ تابيعاتىندا ءوتتى. «بەرگى تاۋعا بەلەسپىن» دەپ وتىرعانىم - التايدان اتىرۋعا دەيىنگى ۇلى دالا، الاتاۋدان كوكشەتاۋعا دەيىنگى قاسيەتتى ولكە - ارداقتى اتاجۇرت. شىعارماشىلىق كەشىمە اقىن- جازۋشىلار، تانىمال انشىلەر، زيالى قاۋىم وكىلدەرى قاتىسادى. جاركەن اعاڭنىڭ حال- جايى - وسى.

- ءسىزدىڭ ەسىمىڭىز ەرەكشە. سىزدەن باسقا جاركەن دەگەن ەسىم كەزدەستىرمەگەن ەكەنمىن. قانداي ماعانا بەرەدى؟ !

- اسىلىندە، مەنىڭ ازان شاقىرىپ قويعان اتىم - جارمۇحاممەد. مەنىڭ انام ءدىندى قاتتى جاقسى كورەتىن، ناماز وقيتىن جان بولاتىن. «بالام، كەلەشەكتە قانداي بولاتىنىڭدى قايدان بىلەسىڭ، زامان بولسا مىناۋ وزگەرىپ، قيىنداپ بارا جاتىر. پايعامبارىمىز مۇحاممەدتىڭ قاسيەتتى ەسىمىن قايتا- قايتا ايتا بەرمەيىك، سەن جاركەن بوپ ءجۇرشى» دەپ ەركەلەتىپ، سودان جاركەن اتانىپ كەتتىم. ەڭ العاشقى توپتاما ولەڭىمدى دە جاركەن دەگەن اتپەن شىعاردىم. ەڭ العاشقى كىتابىمدا جاركەن دەگەن اتپەن باسىلىپ كەتتى. ال، قازىر دە جاركەن بودەش ۇلىمىن.. .

- جاركەن اعا، كەزىندە ءسىز قاجىتاي ءىلياس، قابدەش جۇمادىلوۆتەن كەيىن شەكارادان اتامەكەنگە قاراي جاياۋ- جالپىلاي وتكەن قالامگەردىڭ ءبىرىسىز. جالپى ءسىزدىڭ اتامەكەنگە ورالۋىڭىز جونىندە ايتساق.. .

- توردەگى جۇرت توبەڭنەن تونسە جالعىز جاناشىرىڭ الپىس ەكى تامىرىندا ءوز قانى كۇركىرەپ اققان قانداستارىم بولماق دەپ تاۋ اسىپ، تاس باسىپ شىبىن وتە المايتىن، قۇس وتە المايتىن شەكارادان جاياۋ وتكەن اداممىن. اللاعا، سانسىز شۇكىرشىلىك ايتام، تابانىم تۋعان جەردىڭ توپىراعىنا تيگەنى ءۇشىن دە مەن باقىتتى پەندەمىن.

- ولەڭىڭىز كەرەمەت، ءبىراق، اتىڭىزدى ادەبيەتشىلەردەن باسقا جۇرت بىلە بەرمەيدى، نەگە؟

- مەن كىم كورىنگەننىڭ الدىنا جۇگىرىپ بارا بەرمەيتىن اداممىن. وسى كۇنگە دەيىن ءبىر اكىمنىڭ، ءبىر باستىقتىڭ الدىنا بارعان ەمەسپىن. نە ءۇشىن؟ ءوزىمنىڭ مىنەزىم سولاي. ماعان بارلىق مارتەبەم دە، بايلىعىم دا - پوەزيا. ولەڭنەن جوعارى ەشكىم بار دەپ ويلامايمىن. سول ءۇشىن ەشكىمنىڭ الدىندا باسىمدى يگىم كەلمەيدى. ادەبيەتتى سۇيەمىن! ادەبيەتى جوق ەل ەشقاشان كەمەلدەنگەن ەلدەر قاتارىنا جاتپايدى.

- «جالعىز» دەگەن پوەماڭىزدى وقىپ وتىرىپ، سول پوەماداعى جالعىز ءوزىڭىز ەمەس پە دەگەن ويعا قالامىز.. . جانە:

جالعان- اي.. .

«جالعىزسىراۋ قانداي جامان،

تارپاڭنىڭ تامىرىندا قان قايناعان.

اداسقان ۇيىرىنەن قۇلا بيە،

قوسىلدى قۇلاندارعا قاق جايلاعان.. .» دەيسىز.. . ءوزىڭىزدى كوپ ىشىندە دە جالعىز سەزىنەسىز بە؟

- ءيا، ول جالعىز - مەنمىن.. . بۇل پوەمانى تۇتاستاي جاتقا بىلەتىن جاس وقىرماندارىم بار. «جالعىزدىق تەك قۇدايعا عانا جاراسادى» دەپ ايتىلادى. جالعىزدىق بارلىق ادامنىڭ باسىندا بار نارسە. بۇل تەك ءبىر عانا ادامنىڭ باسىنداعى جالعىزدىق ەمەس، بۇكىل الەمدىك جالعىزدىق دەپ ويلايمىن. شاكارىم دە جالعىز بولدى.. . جالعىزدىقتى تەك قانا وقۋ كەرەك. ونى مازمۇنداپ، ونىڭ جاقسىلىعىن ايتۋدىڭ قاجەتى جوق دەپ ويلايمىن.

- «بۇل كۇندە سەكىلدىمىن ءبىر ءتىرى ەلەس،

ەندى مەنىڭ ءولۋىم مۇمكىن ەمەس.. .» دەيسىز ءبىر ولەڭىڭىزدە. اللاعا شۇكىر، 70 جاسقا كەلدىڭىز، ومىرگە ايتار العىسىڭىز بەن وكپەڭىز بار ما؟

- ءوزىمدى ومىرگە وكپەلى اداممىن دەپ ايتا المايمىن. ادام ەشقاشان تاعدىردى تاڭداپ المايدى. تاعدىر - جاراتقاننىڭ ءىسى. مەنىڭ ءوزىمدى- ءوزىم ماقتايتىن ءبىر ەرلىگىم بار. ول - مەنىڭ اتاجۇرتىمدى تاۋ اسىپ، تاس اسىپ قارشاداي كەزىمدە اداسپاي تاپقانىم. مەن ءوزىمدى سول قاسيەتىم ءۇشىن جاقسى كورەمىن.. .

- ءيا، دۇرىس ايتاسىز، سول تاعدىر سوقپاعى ءسىزدى ءبىر كەزدە كوكشەتاۋدا قوي باقتىردى ەمەس پە؟!

- ءيا، وسى سۇراعىڭا وراي، مەنىڭ ەسىمە ءبىر وقيعا ءتۇسىپ وتىر.. . مەنىڭ ولەڭىمنىڭ شىعۋ تاريحىن ايتىپ بەرەيىن. قوي باعىپ ءجۇرىپ، قوزى قايىرىپ كەل دەگەن سوڭ سوندا بارا جاتقانىمدا جولدا ۇلكەن كول بار. سول كولدى جاعالاپ كەلە جاتتىم. قوزىلار دا جاعالاپ كەلە جاتتى. كۇن دەگەن قۇيىپ نوسەر جاۋىپ تۇردى. سول ساتتە مەنىڭ اياعىم تايىپ كەتىپ، كولدىڭ استىنا قاراي زىمىراي جونەلدىم. استىنا قاراي كەتىپ بارام. وتە تەرەڭ كول بولاتىن. سول ۋاقىتتا كولدىڭ جاعالاۋىندا ءبىر توپ شەڭگەل ءوسىپ تۇر ەكەن. شاپ بەرىپ ۇستاپ الدىم. سىرتىمنان كورىپ كەلە جاتقان ادامدار موينىما ارقان سالىپ قۇتقارىپ الدى. سوندا تۋعان ولەڭىم: «ولەڭ دەگەن نە دەسەم، ءبىر توپ شەڭگەل ەكەن عوي» دەگەن.

ءيا، اتامەكەنگە ورالعاننان كەيىن بىردەن راحات ومىرگە باتتىم دەپ ايتا المايمىن. ادامنىڭ توپىراعىنان باسقا جاققا اۋىسقاننان كەيىن مۇڭ دا، زار دا بولادى ەكەن. اكە- شەشەم اناۋ جاقتا قالدى، جالعىزدىقتى دا كوردىم. تاڭسىق ورتا، بەيمالىم مەكەن. كىمنىڭ دە بولسىن بەلگىسىز جەرگە تابانىن تىرەگەندە قوس اياعى شىدەرلەنىپ، تۇساۋلانىپ قالاتىنى ءسوزسىز. كەڭەس وداعىندا كەلدىم. سولاردىڭ باسشىسىنا ارناپ ءوتىنىش جازىڭىز دەدى. مەن باسپانا سۇراپ كەلدىم، ماعان باسپانا بەرىڭىز دەپ ايت دەدى. مەن ولەڭمەن جازىپ بەردىم. كەيىن ءبىر وفيتسەر كەپ تۇر «مىنا ولەڭدى قارا سوزگە اينالدىرىپ، ورىسشا جازىپ بەرىڭىزشى» دەپ. مەنىڭ ەڭ ءبىرىنشى باسقا تىلگە اۋدارىلعان ولەڭىم سول بولدى.

ول كەزدە مەنىڭ اتا- انام مەنەن مۇلدە بەيحابار ەدى. ولار مەنىڭ قاي جاقتا جۇرگەنىمدى دە بىلمەدى. قىتايدا قاتتى ساياسات بولدى. سوندا بىرەۋلەر شەكارادا اتىلىپ كەتتى دەگەندى ەستىگەندە مەنىڭ اكە- شەشەم، اۋىل- ايماق مەنى قايتىس بولىپ كەتتى دەپ اس بەرگەن. مەن 20 جىلدان كەيىن شەكارا اشىلعاننان كەيىن عانا تۋعان جۇرتىما باردىم.

- ءسىزدىڭ تۋعان جەرگە ارنالعان ولەڭىڭىزدى ءبىراز جاستار جاتقا وقيمىز. رۇقسات بولسا وقىپ بەرەيىن بە؟!

- ارينە، تىڭداپ وتىرمىن.. .

تۋعان جەردىڭ قار، مۇزى،

ايازىڭمەن جۋىندىر.

تۋعان جەردىڭ بال قىزى،

بۇرىمىڭمەن بۋىندىر.

تۋعان جەردىڭ بۇلاعى،

تولقىنىڭمەن ات مەنى.

تۋعان جەردىڭ جىلانى،

شىرىلداتىپ شاق مەنى.

تۋعان جەردىڭ شەڭگەلى,

تىرنا اياماي بەتىمدى.

تۋعان جەردىڭ ەرمەنى,

اۋزىما قۇي ءوتىمدى.

تۋعان جەردىڭ دوڭىزى،

قان جوسا قىپ جارىپ كەت.

تۋعان جەردىڭ قوڭىزى،

دومالاتىپ الىپ كەت.

تۋعان جەردىڭ قاسقىرى،

كەمىر، اقىن سۇيەگىن.

تۋعان جەردىڭ تاس، قۇمى،

سەنى وسىلاي سۇيەمىن!

- بۇل ءسىزدىڭ تۋعان جەرگە دەگەن ساعىنىشىڭىزدان تۋعان بولار.. .

- دۇنيەدەگى ەڭ ۇلكەن، ەڭ عالامات ساعىنىش تۋعان جەرگە دەگەن ساعىنىش ەكەن. مەيلى قاراپايىم ادام بولسىن، مەيلى اقىن ادام بولسىن ەڭ ىستىق ساعىنىشى ول - تۋعان جەر. ءتىرى جانعا ودان اسقان ساعىنىش جوق. مەنىڭ ولەڭدەرىمنىڭ كوبىسىنىڭ ساعىنىش بولاتىنى - مەن ءوز تۋعان توپىراعىمدى شەكسىز سۇيەمىن!

- ولەڭدەرىڭىز درامالىق سيۋجەتتەرگە تۇنىپ تۇر. ءسىز دراماتۋرگياعا كەلسەڭىز قازاقتىڭ شيللەرى بولاتىنىڭىزعا كۇمانسىز سەنەمىن. پەسالار جازۋعا تالپىنىپ كورمەدىڭىز بە؟

- كوپ راحمەت! مەن باۋىرجان مومىش ۇلىنا ارناپ تۇڭعىش رەت «باۋىرجان» اتتى پەسا جازدىم. تاراز قالاسىندا باۋىرجان مومىش ۇلى اتىنداعى رەسپۋبليكالىق تەاتر فەستيۆالىندە «باۋىرجان» جۇلدەلى ورىن الدى. ەكىنشى ءبىر دراما ول شەرحان مۇرتازانىڭ «اي مەن عايشا» روماننىڭ جەلىسى بويىنشا «شەر اتا» دەگەن پەسا جازىلدى. ءالى ەش جەردە جاريالانعان جوق. اللا قالاسا، الداعى ۋاقىتتا تەاترلارعا ۇسىنامىن دەگەن ويدامىن. اللا كۇش- قۋات بەرسە الداعى ۋاقىتتا ولەڭ دە، پەسا دا جازىلا بەرەدى.. .

- جازا بەرىڭىز، قالامىڭىزدان قاسيەت كەتپەسىن! ولەڭدى قالاي جازاسىز؟

- مەن ولەڭدى تاڭ اتقانشا سارىلىپ وتىرىپ جازبايمىن. مەن ارنايى وسى ولەڭ جازايىنشى دەپ تە وتىرمايمىن. قاي ۋاقىتتا ۋاقىتى كەلەدى، سول ۋاقىتتا جازامىن. ول تاڭ اتقاندا بولۋى مۇمكىن، مۇمكىن تۇندە بولۋى مۇمكىن. مەن ولەڭ جازعاندا الدىمەن ويىما تۇسىرەمىن، 20 شۋماققا دەيىن ويىمدا ساقتاپ جۇرەم. سوسىن كەيىن اقىرىنداپ قاعاز بەتىنە تۇسىرەمىن.

- وسى ۋاقىتقا دەيىن 10 نان استام كىتاپ جازدىڭىز. قازاقتىڭ اقىن، جازۋشىلارى اراسىندا ادەبي سىيلىققا اۋەس بوپ بارا جاتقاندار كوپ. ءتىپتى سول سىيلىق ءۇشىن نەشە ءتۇرلى ارەكەتكە بارادى. ءسىزدىڭ سىيلىققا دەگەن كوزقاراسىڭىز قانداي؟

- ەڭبەگىڭنىڭ باعالانعانى جاقسى. ەل مويىنداعان، جۇرت مويىنداعان، كوركەمدىگى جوعارى، مازمۇنى تەرەڭ شىعارماعا بەرىلىپ جاتسا ادەبي سىيلىق كەرەك. ەگەر ول جاس بولسا ىنتالاندىرادى. ەگدە بولسا ونىڭ ءوزىنىڭ ەڭبەگى باعالانعانىنا قۋانادى. كەز كەلگەن شىعارماشىلىق ادامنىڭ ەڭبەگى باعالانۋى كەرەك. كىم كورىنگەنگە بەرىلگەن سىيلىقتىڭ قۇنى دا بولمايدى. مەن مەملەكەتتىك سىيلىققا ەكى رەت ۇسىنىلدىم. 1-2 داۋىس جەتپەي قالىپ جاتادى. نە سەبەپ ەكەنىن سوندا وتىرعان ادامدار بىلەتىن شىعار. ايتەۋىر مۇندا بۇرا تارتۋشىلىق بار دەپ ەسەپتەيمىن. ونى مەنسىز دە جۇرتتىڭ ءبارى بىلەدى. ەندى ماعان سول سىيلىقتىڭ قاجەتى دە جوق. ەندى قالعان عۇمىرىمدا سىيلىققا جالتاقتاۋمەن وتكىزەتىن جايىم جوق. بەرسە بەرسىن بەرمەسە قويسىن! ەگەر وزدەرى كەپ الماساڭ بولمايدى دەپ جاتپاسا، مەن ەندى ەشكىمنىڭ ارتىنان جۇگىرمەيمىن. وسى كۇنگە دەيىن جۇگىرگەن جوقپىن. جۇگىرۋگە دە ۋاقىتىم جوق.

- بىزدە ومارعازى ايتان ۇلى، سۇراعان راحمەت ۇلى سىندى قازاقتىڭ ماقتانىشىنا اينالعان تالانتتى اقىندارىمىز بار. ءبىراق، ادەبيەتتە جۇرگەن كەيبىر جاستارىمىز بۇل ەسىمدەردەن بەيحابار. بۇل سوندا بىزدەگى ناسيحاتتىڭ ءالسىز تۇسى ما الدە؟ ءسىز قالاي ويلايسىز؟

- ومارعازى مەن سۇراعاندى جاستار اراسىندا دارىپتەۋ ماسەلەسىن قولعا الۋىمىز كەرەك. ولاردى سول كەزدەگى قالام ۇستاپ جۇرگەندەردىڭ كوبى تانيدى، بىلەدى. ولار قازاق ادەبيەتىمەن قوسا شەتەل ادەبيەتىن دە، قىتاي ادەبيەتىندە وقىعان جان- جاقتى ادامدار. جازعان دۇنيەلەرىنىڭ كوركەمدىك دەڭگەيى مىقتى، مازمۇنى تەرەڭ شىعارمالار. ونى بىلمەۋ جاستارعا كۇنا. ۇستازىن بىلمەگەن ادام قالاي شاكىرت بولادى؟ !

- قازىرگى قازاق پوەزياسى قانداي فورمادا دامىپ كەلەدى؟

- قازاق ادەبيەتىندەگى جانردا الەمدىك دەڭگەيدەگىسى - پوەزيا. ءبىزدىڭ مىقتى اقىندارىمىزدى سول كۇيىندە اۋدارىپ جەتكىزە السا الەمدىك ادەبيەتتىڭ دە شوقتىعىن كوتەرەر ەدى. ماسەلەن، قاي تىلدە بولسىن، ابايدى ءالى كۇنگە دەيىن جەتكىزە الماي ءجۇرمىز. ورىستار دا جەتكىزە المادى. سەبەبى، ابايدىڭ ويى تەرەڭ، ابايدىڭ زامانى باسقا. تەك جاناما عانا اۋدارىلىپ ءجۇر. اباي اباي كۇيىندە جەتكەن جوق. ال، ماحامبەتتەن باستاپ قازاق جىراۋلارىن سول كۇيىندە اۋداراتىن بولسا بۇكىل دۇنيەجۇزىلىك پوەزيا قول جەتپەيتىن بيىككە اينالىپ كەتەتىن ەدى. ءبىز وسىنى ءبىلۋىمىز كەرەك. ال، قازىر زامان باسقا ادام باسقا. پوەزيادا بۇگىن دە سىلكىنىس بولۋى كەرەك، ىزدەنىس بولۋى كەرەك.

- قازىرگى جاستار پوەزياسىنا كوڭىلىڭىز تولا ما؟

- كەز كەلگەن اقىنعا ىزدەنىس كەرەك. ىزدەنبەسەڭ زاماننان الدەقايدا كەش قالاسىڭ. بۇكىل دۇنيەجۇزى تاريحىن، الەم ادەبيەتىن ءبىلۋى كەرەك. سوندا عانا وسى زامانعا لايىق كوركەم شىعارما شىعادى. قازاق جاستار پوەزياسىنا كوڭىلىم تولادى. شەتىنەن كەرەمەت كلاسسيك دەپ ايتپايمىن. ءبىراق، بيىككە كوتەرىلگەن قازاق پوەزياسىن ودان ءارى دارىپتەۋ - ءبىزدىڭ ماقساتىمىز.

- ءسىزدىڭ ولەڭدەرىڭىزدى سىناپ جازعاندار بولدى ما؟

- وسى كەزگە دەيىن مەنى ەشكىم سىناعان جوق. ال، كەرىسىنشە ءوزىڭ ماقتاعانداي ماقتاعاندار بولدى. ءابىش كەكىلبايەۆ، تەمىرحان مەدەتبەكوۆ، قابدەش ءجۇمادىلوۆ سەكىلدى كوزى ءتىرى كلاسسيكتەر مەن تۋرالى ماقالا جازدى. مەنىڭ ەڭبەگىم از دا بولسا ءوز باعاسىن الىپ جاتىر. قىزعانبايتىندار ، ىشىندە قىزىل ءيتى جوقتار، ناعىز تالانتتى ادامدار مەنىڭ ەڭبەگىمدى باعالاپ جاتىر. مىناۋ مىناداي ەدى دەپ ماعان قاتال پىكىر ايتقان ءالى ەشكىم جوق.

- جىلقىنى كوپ جىرلايسىز.. .

- مەن جىلقىنى جاقسى كورەمىن. جالپى قازاق حالقى جىلقى مىنەزدى حالىق قوي. قازاق بۇرىن جوڭعار شاپقىنشىلىعىنان دا، تالاي جاۋگەرشىلىكتە دە جىلقىمەن شاپقان. مەنىڭ قابانباي باتىردىڭ مىنگەن اتىنا ارنالعان «قۋباس ات» دەگەن ولەڭىم بار:

ءتىرى بولساڭ قابانباي مىنگەن قۋباس ات،

قۇيرىعىڭنان الار ەدىم- اۋ تۋ جاساپ.

الدەقاشان كەتەر ەدىك توز- توز بوپ،

انامىزدان باتىر بولىپ تۋماساق،

اقىن بولىپ تۋماساق.

بەۋ، قۋباس ات،

قۋباس ات،

تولارساعىڭمەن تۋسىرىلعان قۇمدى اساپ.

و دۇنيەدەن كىسىنەشى كۇمبىرلەپ،

بۇ دۇنيەدە قالايىن مەن مىڭ جاساپ.

بەك، قۋباس ات،

قۋباس ات.. .» دەپ جىرلاعان. قازىر باسپاعا تاعى ءبىر جىر جيناعىمدى دايىنداپ جاتىرمىن. جيناقتى «جىلقى كىسىنەيدى» دەپ اتادىم.

- جاركەن اعا، قازاق ەلىنىڭ بولاشاعىن قالاي ەلەستەتەسىز؟

- بىزدە ۇلتتىق يدەلوگيا، ۇلتتىق باعدار بولۋى كەرەك! ۇلتتىق باعدار بولماي، ۇلت ماسەلەسى شەشىلمەي ەشتەڭە دە بولمايدى. مەن قازاقپىن، قازاق ۇلتىنىڭ ۇلىمىن دەپ ايتۋ ءۇشىن الدىمەن ءبىلىمىڭ، ونىڭ قولدايتىن ۇكىمەتىڭ بولۋى كەرەك. تاۋەلسىزدىك دەگەننىڭ باستى ماقساتى - قازاق ۇلتىنىڭ مەملەكەتى. نەگىزگى ۇلت - قازاق. ۇلى مەملەكەتتىڭ ۇلى ۇستازى، يەسى - قازاق!

الدا ءبىزدى نۇرلى دا، جارقىن بولاشاق كۇتىپ تۇرعانىنا سەنەمىن.. .

- اڭگىمەڭىزگە راحمەت! جازارىڭىز كوبەيسىن، جاركەن اعا!

P/S: تاعدىردىڭ قايقى قىلىشىنان جانىن تالاي جارالاعان جارالى جاندى جاركەن اقىن دەپ بىلەمىز. ول قازاق پوەزياسىنىڭ قايىسپاس قارا نارى. ونىڭ جاركەن اقىن دەگەن اتى، شىعارماشىلىعى قانداي سىيلىق بولسىن ودان جوعارى. جەتپىستىڭ جالاۋلى شىڭىنا شىققان، قازاق پوەزياسىن ءبىر بيىكتىككە كوتەرگەن اقىن عۇمىرىنا ءبىز دە اللادان اماندىق تىلەيمىز!

سۇحباتتاسقان: سالتانات قوجا (2015- جىل)

«ادەبيەت پورتالى»