بولاشاقتا مەكتەپ تۇلەكتەرى ۇ ب ت- نى بىرنەشە مارتە تاپسىرۋى مۇمكىن

استانا. قازاقپارات - بولاشاقتا مەكتەپ تۇلەكتەرى ۇلتتىق ءبىرىڭعاي تەستىلەۋدى بىرنەشە مارتە تاپسىرۋى مۇمكىن.

بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندەگى بريفينگتە ەلىمىزدىڭ ءبىلىم جانە عىلىم مينيسترلىگى ءبىلىم جانە عىلىم سالاسىنداعى باقىلاۋ كوميتەتىنىڭ ءتوراعاسى سايات ءنۇسىپوۆ ءمالىم ەتتى.

 «ءبىزدىڭ بالالارىمىزعا ەشكىم دە، ەشقاشان دا «قىلمىسكەر» رەتىندە قاراپ كورگەن جوق، كەلەشەكتە دە قارامايدى. ەكىنشىدەن، بولاشاقتا ءبىز وقۋشى ۇ ب ت- نى (مەملەكەتتىك جوعارلاپ وقۋ ەمتيحانى) ءبىر ەمەس، بىرنەشە رەت تاپسىرۋعا مۇمكىندىك بەرۋدى جوسپارلاپ وتىرمىز»، - دەدى س. ءنۇسىپوۆ ب ا ق وكىلدەرىنىڭ ساۋالىنا وراي.

ونىڭ اتاپ وتۋىنشە، تەستى بىرنەشە مارتە تاپسىرۋ الەمنىڭ كوپتەگەن ەلدەرىنىڭ تاجىريبەسىندە بار. سوندىقتان دا ەلىمىزدىڭ ءبىلىم جانە عىلىم مينيسترلىگى اقپاراتتىق تەحنولوگيالاردى پايدالانا وتىرىپ، بولاشاقتا وسى تاجىريبەنى قازاقستاندا دا ەنگىزۋدى جوسپارلاپ وتىر.

سونىمەن قاتار كوميتەت ءتوراعاسى وقۋشىلاردىڭ ۇ ب ت تاپسىرۋ پۋكتىنە كىرگەن كەزدە تەكسەرۋدەن وتۋىنە قاتىستى ءوز پىكىرىمەن دە ءبولىستى. «وقۋشىلار ۇلتتىق ءبىرىڭعاي تەستىلەۋ تاپسىرعان كەزدە تەكسەرىستەن وتەدى. ول راس. ويتكەنى، زاڭعا سايكەس تەست وتكىزۋ ەرەجەسى بويىنشا ەشكىم ەشقانداي تەحنيكالىق قۇرال- جابدىقتى ۇلتتىق ءبىرىڭعاي تەست تاپسىرۋدا پايدالانباۋى ءتيىس. سوندىقتان، اتا- انالارعا، مۇعالىمدەرگە، وقۋشىلارىمىزعا ايتارىمىز، ەشقانداي بايلانىس قۇرالىن پايدالانۋعا بولمايدى. جىلدان جىلعا ءبىزدىڭ ۇ ب ت تاپسىراتىن پۋنكتتەرىمىزدە تەحنيكالىق قۇرالدار كوبەيىپ جاتىر. سوندىقتان، ءبىز وقۋشىلاردى ءتىنتۋ ماقساتىن كوزدەمەيمىز»، - دەدى ول.

 اۆتور: مارلان جيەمباي