قازاقستاندا تۇڭعىش رەت قاتەرلى تەرى ىسىگى دەرتىنە قارسى كۇرەس كۇنى اتاپ ءوتىلدى

الماتى. قازاقپارات - قازاقستان قاتەرلى تەرى ىسىگى - مەلانوما دەرتىنە قارسى كۇرەستە دۇنيەجۇزىلىك دەنساۋلىق ساقتاۋ ۇيىمىنىڭ (د د س ۇ) جاھاندىق باستاماسىنا قوسىلدى.

بۇگىن الماتىدا دەرماتولوگ، كوسمەتولوگ جانە ونكولوگ دارىگەرلەرگە ارنالعان «مەلانوما اۋرۋىن دياگنوستيكالاۋ جانە ەمدەۋ الگوريتمدەرى» تاقىرىبىندا عىلىمي-تاجىريبەلىك كونفەرەنسيا ءوتتى.

مامانداردىڭ ايتۋىنشا، قازاقستان ورتا ازيا ەلدەرىنىڭ اراسىندا مەلانوما دەرتىنە شالدىعۋ بويىنشا ءبىرىنشى ورىندا تۇر. 2013-جىلعى دەرەكتەر بويىنشا قازاقستاندا مەلانوما دەرتىنىڭ ايتارلىقتاي جوعارى كورسەتكىشتەرى الماتىدا، شىعىس قازاقستان، سولتۇستىك قازاقستان، قاراعاندى جانە پاۆلودار وبلىستارىندا تىركەلگەن.

جىل سايىن قازاقستاندا مەلانومادان 150 ادام كوز جۇمادى. 2012-جىلى 286 ەمدەلۋشىگە مەلانوما دياگنوزى قويىلعان. 2013-جىلى دەرتكە شالدىققاندار سانى 326 عا دەيىن ارتقان. 2014-جىلى 340 ناۋقاس تىركەلگەن.

«تەرىدەگى پايدا بولعان پيگمەنتتەردى الىپ تاستاۋ نيەتىمەن ەمدەلۋشىلەردىڭ جالپى ماشىقتاعى دارىگەرلەرگە، دەرماتولوگتارعا، اسىرەسە، كوسمەتولوگتارعا جۇگىنۋى كەزىندە ولارعا لازەرمەن، سۇيىق ازوتپەن نەمەسە حيرۋرگيالىق ادىسپەن ەمدەۋدى رۇقسات ەتۋ ءۇشىن الدىن-الا ونكولوگقا كونسۋلتاتسياعا جىبەرۋ ۇسىنىلادى. دەرماتوفيبروما، گەمانگيوما جانە بۇرىن-سوڭدى جاراقاتسىز-اق تەرىدە پايدا بولاتىن تىرتىق تۇرىندە بايقالاتىن ەرەكشە جانە جىكتەلۋگە جاتپايتىن تەرى مەلانومالارى تۋرالى ءبىلىپ، ەستە ۇستاعان ءجون. تەك ونكولوگتىڭ قورىتىندىسىنان كەيىن عانا دارىگەرلەر تەرىدەگى پيگمەنتتىك نيەۆۋستاردى (داقتاردى) ەمدەي الادى»، - دەيدى س. د. اسفەندياروۆ اتىنداعى قازۇمۋ ديپلومنان كەيىنگى ءبىلىم بەرۋ ينستيتۋتىنىڭ دەرماتوۆەنەرولوگيا جانە ەستەتيكالىق مەديتسينا كافەدراسىنىڭ مەڭگەرۋشىسى اسيا قابىلبەكوۆا.

مەلانومانىڭ دامۋىن قوزدىراتىن باستى فاكتور - ۋلتراكۇلگىن ساۋلەلەردىڭ ۇزاق اسەرى. ايتپاقشى، كۇن ساۋلەسىنىڭ ءومىر بويعى اسەرى جينالىپ، قوسىلا بەرەتىنىن ۇمىتپاعان دا ءجون. سونىمەن قاتار مەلانومالاردىڭ دامۋىنا پيگمەنتتىك داق جاراقاتتارى اسەر ەتەدى. اتاپ ايتقاندا، بۇل جەردە اڭگىمە كيىمنىڭ، اياق كيىمنىڭ قاجاۋى، كەسىپ العان جارالار تۋرالى بولىپ وتىر.

ماماندار سونداي-اق اسا ىستىق ايماقتارعا ساپار شەگۋدەن قاۋىپتەنۋگە كەڭەس بەردى. اتالعان اۋرۋعا كوبىنە تەرىسى كۇنگە تەز كۇيەتىن اققۇبا تەرىلى، سەكپىلى جانە مەڭدەرى بار ادامدار بەيىم كەلەدى. وسىنى ەسكەرە كەلە، سۋىق جەردە تۇراتىن، تەرىسى كۇنگە بەيىمدەلمەگەن ادامدارعا بىردەن ىستىق ايماقتارعا بارىپ، كۇنگە كۇيۋدەن قورعانۋ كەرەك.

«مەلانوما نەعۇرلىم ەرتە انىقتالاتىن بولسا، سوعۇرلىم ونى ەمدەۋ جەڭىل بولادى. قازىرگى ۋاقىتتا بۇكىل الەمدە تارگەتتىك (نىسانالى، شەكتەلگەن) پرەپاراتتارمەن ەمدەۋ، جەكە تۇلعاعا باعىتتالعان مەديتسينانىڭ باعىتى كەڭىنەن تارالعان. اۋرۋدىڭ كەزەڭىنە بايلانىستى ەمدەۋدىڭ ءارتۇرلى ادىستەرى قولدانىلادى. ولاردىڭ قاتارىندا حيرۋرگيالىق، ساۋلەلىك تەراپيا، حيميوتەراپيا، يممۋنوتەراپيا بار. قازاقستاندا تارگەتتىك تەراپيا ەنگىزىلىپ كەلەدى، ول دۇنيە ءجۇزى بويىنشا ءتيىمدى ەمدەۋ ءادىسى سانالادى»، - دەدى قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ (قازوجرعزي) ەمحانالىق بولىمشەسىنىڭ مەڭگەرۋشىسى دينا تولەۋوۆا.

اۆتور: گۇلميرا عوسمانالي