ۇكىمەتتىك ەمەس ۇيىمدار قازاقستاندا جەكە دەتەكتيۆتىك قىزمەت ەنگىزىلەدى - ءماجىلىس

استانا. قازاقپارات - بۇگىن پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى «جەكە دەتەكتيۆتىك قىزمەت تۋرالى» زاڭ جوباسىن ءبىرىنشى وقىلىمدا ماقۇلدادى.

 «جەكە دەتەكتيۆتىك قىزمەتتى ەنگىزۋ جەكە جانە زاڭدى تۇلعالاردىڭ قۇقىقتارى مەن ەركىندىگىن، مەملەكەت پەن قوعامنىڭ مۇددەلەرىن قورعاۋعا باعىتتالعان. وسىعان بايلانىستى زاڭ جوباسىن قابىلداۋداعى ماقسات ەلىمىزدەگى جەكە دەتەكتيۆتىك قىزمەتتى رەتتەۋ بولىپ تابىلادى. بۇل رەتتە قۇجاتپەن ءبىرقاتار ەرەجەلەر قاراستىرىلادى» ، - دەدى زاڭ جوباسى بويىنشا بايانداعان ق ر ادىلەت ءمينيسترى بەرىك يماشيەۆ.

ونىڭ ايتۋىنشا، زاڭ جوباسى بويىنشا جەكە جانە زاڭدى تۇلعالارعا جەكە دەتەكتيۆتىك قىزمەت كورسەتۋدىڭ، وسىعان تاپسىرىس بەرۋشىنىڭ مۇددەلەرى مەن قۇقىقتارىن قورعاۋدىڭ نەگىزگى مىندەتتەرى ايقىندالادى. ادامداردىڭ، زاڭدى تۇلعالاردىڭ قۇقىقتارىن، بوستاندىقتارى مەن زاڭدى مۇددەلەرىنىڭ، كونستيتۋتسيالىق قۇرىلىستى، قوعامدىق يماندىلىقتى بۇزۋعا جول بەرىلمەيدى. قۇپيالىلىق پەن لاۋازىمدى تۇلعالاردىڭ جەكە دەتەكتيۆتىك قىزمەتىنە ارالاسپاۋ قاعيداتتارى دا قاراستىرىلادى.

بۇدەن بولەك، جەكە دەتەكتيۆتىك قىزمەتكە تاپسىرىس بەرۋشىنىڭ زاڭدى قۇقىقتارى مەن مۇددەلەرىن قورعاۋعا بايلانىستى ليسەنزيالاناتىن قىزمەتتەر ءتۇرى دە قاراستىرىلادى. سونىمەن قاتار، ليسەنزيا الاتىن ادامدار ءۇشىن بىلىكتىلىك تالاپتارى بەلگىلەنەدى. اتاپ ايتقاندا، دەتەكتيۆتەرگە قۇقىق قورعاۋ نەمەسە ارناۋلى مەملەكەتتىك ورگانداردىڭ جەدەل نەمەسە تەرگەۋ بولىمشەلەرىندە كەمىندە 15 جىل ەڭبەك ءوتىلىنىڭ بولۋى، 35 جاسقا تولۋى، سوتتىلىعىنىڭ بولماۋى سەكىلدى باسقا دا تالاپتار قويىلادى.

سونىمەن قاتار، دەتەكتيۆتىك ىس- شارالاردىڭ تۇبەگەيلى بولىپ تابىلاتىن تىزبەسى (جەكە اڭگىمەلەسۋ، انىقتامالار، مىنەزدەمەلەر سۇراتۋ) ەنگىزىلەدى. جەكە دەتەكتيۆتەردىڭ قىزمەتىن قۇقىقتىق رەتتەۋدى قامتاماسىز ەتۋ ءۇشىن ولاردىڭ زاڭناما تالاپتارىن ورىنداۋىن باقىلاۋ بويىنشا ۋاكىلەتتى ورگاننىڭ قۇزىرەتى، سونداي- اق وزگە دە فۋنكسيالار بەلگىلەنەدى.

اۆتور: قانات مامەتقازى ۇلى