قازىر مەملەكەتتى سوعىسپەن ەمەس، ىشىنە ىرىتكى سالۋ ارقىلى جاۋلايدى - ن. ەرىمبەتوۆ
بۇل تۋرالى بۇگىن «استانا - قازاقستان حالقىنىڭ ۇلتتىق بىرلىگىن نىعايتۋداعى نەگىزگى فاكتورى» اتتى عىلىمي- تاجىريبەلىك كونفەرەنسيادا قازاقستاننىڭ ازاماتتىق اليانسى بىرلەستىگىنىڭ باسشىسى نۇرلان ەرىمبەتوۆ ءمالىم ەتتى.
ونىڭ ايتۋىنشا، قازاقستانداعى ۇلت ارالىق، ءدىنارالىق كەلىسىمدى ساقتاۋدىڭ ماڭىزدىلىعى ارتپاسا، ەشقاشان كەمىگەن ەمەس.
«قازاقستان پرەزيدەنتى نۇرسۇلتان نازاربايەۆ «نۇر وتان» پارتياسىنىڭ سيەزىندە مەملەكەتتى ادامدار قولداۋى كەرەك، ەتنوستاردىڭ مىقتى كەلىسىمى مەن ءوزارا تەڭدىگى بولۋى قاجەت دەپ ايتقان بولاتىن. سەبەبى، قازىر مەملەكەتتى سوعىس ارقىلى ەمەس، ىشتەن ىرىتكى سالۋ ارقىلى جاۋلايدى. ەۋروپادا، امەريكادا، ازيادا نە بولىپ جاتىر؟! ادامدار الاڭعا شىعىپ، ءبىرىن ءبىرى ءولتىرىپ جاتىر. بۇل مۇناي باعاسىنىڭ قۇلدىراۋىنان نەمەسە ەكونوميكالىق سەبەپتەردەن ەمەس، الەۋمەتتىك جانە ۇلتتىق توپتاردىڭ اراسىنا جىك سالۋدان باستالادى. بۇگىن سوعان قارسى تۇرۋىمىز شارت»، - دەدى ول.
ونىڭ اتاپ كورسەتكەنىندەي، شەت مەملەكەتتەردەن كەلگەن مەيماندار ەلىمىزدەگى بۇل تىنىشتىقتى باستى بايلىق رەتىندە باعالايدى. سوندىقتان قازاقستان جۇرتى بۇل بىرلىكتى ءوزىنىڭ نەگىزگى قۋاتى رەتىندە ساقتاپ قالۋى ءتيىس دەپ وتىر.
«مەن ق ر پرەزيدەنتى سايلاۋىندا باقىلاۋ رەسپۋبليكالىق قوعامدىق كوميسسياسىنىڭ باسشىسى بولدىم. كوپتەگەن شەتەل بايقاۋشىلارىمەن كەزدەستىم. ولار قازاقستانداعى ۇلتارالىق تىنىشتىققا، كەلىسىمگە ءتانتى بولدى. كوشەدە ءتۇرلى ۇلت وكىلدەرىن كورىپ، ولاردىڭ ءبىر- بىرىمەن تاتۋ- ءتاتتى ەكەنىن، كوشەدە ەش قورقىنىشسىز سەرۋەندەۋگە بولاتىنىن بايقادى. استانا ولار ءۇشىن جاڭالىق بولدى. قازاقستانعا ات باسىن تىرەگەندە ولار ءتىپتى بۇل مەملەكەت قايدا ەكەنىن دە بىلمەگەن بولاتىن. ولار ماعان ازىق- تۇلىك نەمەسە كيىم باعالارىن ايتقان جوق، كوشەدە تۇنگى ۋاقىتقا دەيىن سەرۋەندەگەندەگى اسەرلەرىمەن ءبولىستى. جاستاردىڭ، ءتۇرلى ۇلت پەن ۇلىستاردىڭ ءبىر- بىرىنە باۋىرداي قاراعانىن، حالىقتىڭ ىشىندەگى قاپەرسىز، تىنىش ءومىردى ايتۋمەن بولدى»، - دەيدى ن. ەرىمبەتوۆ.
اۆتور: جاسۇلان جولدىبايەۆ
