12:21, 13 - مامىر 2015 | GMT +5
ا. حاميد: بانگلادەش حالقى ق ر پرەزيدەنتىنىڭ ىلكىمدى ءارى سىندارلى كوشباسشىلىعىنا ءتانتى
استانا. قازاقپارات - بانگلادەش حالىق رەسپۋبليكاسىنىڭ پرەزيدەنتى ابدۋل حاميد مەملەكەت باسشىسى نۇرسۇلتان نازاربايەۆتى پرەزيدەنتتىك سايلاۋداعى جەڭىسىمەن قۇتتىقتادى.
بۇل تۋرالى اقوردانىڭ باسپا ءسوز قىزمەتى حابارلادى.
قۇتتىقتاۋدا نۇرسۇلتان نازاربايەۆتىڭ كورەگەن باسشىلىعى ارقاسىندا قازاقستان سوڭعى جيىرما جىلدا الەۋمەتتىك- ەكونوميكالىق دامۋ تۇرعىسىنان زور تابىستارعا جەتكەنى اتاپ وتىلگەن.
«بانگلادەش حالقى ءسىزدىڭ ىلكىمدى ءارى سىندارلى كوشباسشىلىعىڭىزعا ءتانتى. مەن شىن نيەتىممەن ەكى ەل اراسىنداعى قارىم- قاتىناستار ءوزارا تيىمدىلىك جاعىنان الداعى جىلدارى دا نىعايا بەرەدى، ال بىزدەر تاتۋلىقتى، ىلگەرىلەۋ مەن تۇراقتىلىقتى قامتاماسىز ەتۋ، سونداي- اق حالىقتارىمىزدىڭ باق- بەرەكەسىن ارتتىرۋ ءۇشىن بىرلەسىپ جۇمىس ىستەيتىن بولامىز دەپ ۇمىتتەنەمىن»، - دەلىنگەن جەدەلحاتتا.
