بۇل مەشىتكە جەتۋ ءۇشىن ادامدار قاتەرگە باس تىگەدى - فوتو

استانا. قازاقپارات - مۋمباي جاعالاۋىنان جارتى شاقىرىم جەردە ورنالاسقان ۋورلي شىعاناعىنداعى كىشكەنە عانا بۇل ارالعا الەمنىڭ تۇكپىر- تۇكپىرىنەن تۋريستتەر اعىلىپ كەلىپ جاتادى.

سەبەبى، بۇل ارالدا ەرەكشە ۇلگىدەگى حادجي الي دارگاح مەشىتى بار. قۇلشىلىق ورداسى قاجىلىق پارىزىن وتەۋ ءۇشىن ءوزىنىڭ بار بايلىعىن كەدەي- كەپشىككە ۇلەستىرگەن سايەدە پير حادجي الي شاح بۋكحاري ەسىمدى داۋلەتتى ساۋداگەردىڭ قۇرمەتىنە تۇرعىزىلعان.

ءوزىنىڭ قاجىلىق ساپارىنان سوڭ ءالي شاح الەمدى ارالاپ، ساياحات جاساۋعا شىعادى. ساياحات بارىسىندا ءتۇرلى عاجايىپتارعا تاپ بولعان الي شاح ءدال وسى ارالدا ءوزىنىڭ ءىزباسارلارىن جولىقتىرعان. سولاردىڭ باستاماسىمەن 1431-جىلى الي شاح اتىنداعى مەشىت سالىنادى.

اينالاسىن سۋ قورشاعان ارالداعى مەشىتكە جەتۋ ءۇشىن ادامدار العاشقى بەس عاسىر بويى قايىقپەن قاتىناعان ەكەن. ال، 1944-جىلى مەشىتكە باراتىندار ءۇشىن ارنايى جول توسەلىپ باستايدى.

الايدا، ماۋسىمدىق جەل ۋاقىتىندا الىپ تولقىندار جولدى شايىپ كەتەتىن كورىنەدى. داۋىل باسىلعان سوڭ جولدى بيىكتەتۋ ءۇشىن تاعى دا توپىراق توگىلەدى. ال، شىلدە- تامىز ايلارىندا جاڭبىر ماۋسىمى باستالعان كەزدە مەشىت قاقپاسى مۇلدەم جابىق بولادى. ادامداردىڭ الاي- دۇلەي الاسۇرعان تەڭىز تولقىندارىنىڭ قۇربانىنا اينالماس ءۇشىن مەشىت باسشىلىعى وسىلاي ىستەۋگە ءماجبۇر بولادى ەكەن.

اق كوبىگىن اسپانعا اتقان دۇلەي تولقىنداردىڭ بيىكتىگى كەيدە بىرنەشە قاباتتى ۇيمەن بىردەي بولىپ، ادامداردى اعىزىپ اكەتەتىن جاعدايلار ءجيى بولىپ تۇرادى ەكەن. دەگەنمەن، جۇما كۇندەرى بۇل مەشىتكە  40000-نان استام ادام جينالاتىن كورىنەدى.

muslim.kz