ەرجۇرەك ءاليا سوعىستان ءتىرى قايتقاندا وسى كويلەكتى كيىپ جۇرەر ەدى عوي
دەپ جازادى «الماتى اقشامى» گازەتى.
ماسكەۋدە ءاليا مولداعۇلوۆا اتىنداعى كوشە جانە سول كوشەنىڭ بويىندا باتىر قىزدىڭ اتىنداعى مەكتەپ بار. «الماتى اقشامىندا» جاريالانعان ساياسي شولۋشىمىز، بەلگىلى جۋرناليست ءا. امانگەلدىنىڭ «مەن كورگەن مينيستر» (7.05.2015) اتتى ماقالاسىندا مىنانداي دەرەك كەزدەسەدى. «.. .№891 مەكتەپ. مەكتەپتە باتىر قىزعا ارناپ مۋزەي اشىلعان. مۋزەيدە ءاليانىڭ ومىرىنە قاتىستى جادىگەرلىك زاتتار: قازاق قىزدارى كيەتىن ۇزىن جەڭ، كەڭ ەتەكتى بۇرمەلى كويلەك پەن ادەمى ويۋ- ورنەكتى كامزول، بىر باۋ بيداي، پيلوتكا مەن سنايپەر مىلتىعىنىڭ وعى، ت. ب. قويىلعان.. .» .
وسىنداعى جادىگەرلىك زاتتاردىڭ ىشىنەن قازاق قىزدارى كيەتىن ۇزىن جەڭ، كەڭ ەتەكتى بۇرمەلى كويلەك پەن ادەمى ويۋ- ورنەكتى كامزول ەرەكشە نازار اۋدارتادى. ءاليا كيگەن ۇزىن جەڭ، كەڭ ەتەكتى بۇرمەلى كويلەك پەن ادەمى ويۋ- ورنەكتى كامزولدى مەرەكە، اسىرەسە، ناۋرىز كۇندەرى بولماسا، ءسىز قازىر مەكتەپتە نە بولماسا وقۋ ورنىندا ءاليا كيگەن كويلەك پەن كامزول كيىپ جۇرگەن جاستى كوردىڭىز بە؟ جارايدى، مەكتەپتە رۇقسات ەتىلمەيدى ەكەن، ونىڭ ءوز كيىم فورماسى (ونى كيىپ جۇرگەنىنە دە كۇماندىمىن) بار دەلىك. ال ەندى، كوشەگە كيىپ شىقساڭىز، بىرەۋ شەشىپ المايدى عوي. ەرجۇرەك، نامىستى قىز ءاليا سوعىستان ءتىرى قايتقاندا وسى كويلەكتى كيىپ جۇرەر ەدى عوي دەپ ويلايسىڭ.
ويتكەنى، ول ۇلت نامىسىن بىرىنشى كەزەكتە ويلايتىن جاس ەدى. بىرەۋلەردىڭ زامان باسقا، زاڭ باسقا، قازىرگى جاستار باسقا عوي دەيتىندەرىن ءبىلىپ وتىرمىن. ءبىز وسىلاي سويلەۋگە ابدەن ۇيرەنىپ العانبىز. ءبىزدى قۇرتاتىن دا وسى ءسوز.
بولماسا وزگەگە ەمەس، وزىڭە ۇقساپ جۇرگەنگە نە جەتسىن! كوشەگە شىعىڭىزشى، شۇرق- تەسىك دجينسي، شولاق شورتيك، اشىلعان كىندىك، شاشىلعان شاشتان باسقا نە كورەسىز.
؟بىر زاماندا مۋزەيدەن ۇلى عالىم قانىش ساتبايەۆتىڭ ەتىگىن كورىپ قاتتى تولقىعانىم بار ەدى. سودان كەيىنگى تولقۋىم وسى. ورىستار مۇراجايعا قويۋعا باتىر قىزدىڭ كويلەگىنەن باسقا قوياتىن نارسە تابا الماي قالدى دەيسىز بە؟ بالكىم، قازاقتار ۇلتتىق كيىمدەرىن ەندى تەك مۋزەيدەن عانا كورەتىن بولادى دەپ ويلادى ما ەكەن. كىم ءبىلسىن؟ !
قالي سارسەنباي
