قازاقستاندا سۋديالارعا مەملەكەتتىك ءتىلدى ءبىلۋ مىندەتتەلەدى

استانا. قازاقپارات - قازاقستاندا سۋديالارعا مەملەكەتتىك ءتىلدى ءبىلۋ مىندەتتەلەدى.

بۇل تۋرالى بۇگىن ق ر پرەزيدەنتى جانىنداعى و ق ك- ىندە وتكەن بريفينگتە ق ر جوعارعى سوتى قىلمىستىق ىستەر جونىندەگى قاداعالاۋشى سوت القاسىنىڭ ءتوراعاسى اباي راحمەتۋلين ءمالىم ەتتى.

«سۋديا لاۋازىمىنا بىلىكتىلىك ەمتيحانىن تاپسىرۋ تالاپتارىن قايتا قاراۋدى قاجەتسىنەدى. ونىڭ نەگىزى رەتىندە گەرمانيا تاجىريبەسى الىنۋى مۇمكىن. وندا سۋديالاردى دايىنداۋ جازباشا ەمتيحان مەن تاجىريبەلىك وقىتۋدىڭ بىرنەشە كەزەڭىمەن جۇرگىزىلەدى. اتاپ ايتقاندا، زاڭنامالىق دەڭگەيدە ۇسىنىس ينستيتۋتىن، «ا» كورپۋسىنا كانديداتتاردى ىرىكتەۋدەگىدەي مەملەكەتتىك ءتىلدى بىلۋىنە ارنالعان تەستىلەۋدى ەنگىزۋ ماسەلەلەرىن قاراستىرۋ ۇسىنىلۋدا»، - دەدى ول.

سونىمەن قاتار ول سۋديا لاۋازىمىنا ۇسىنىلعان تۇلعاعا ءبىر جىلدىق سىناق مەرزىمىن ەنگىزۋ ماسەلەسى دە قارالىپ جاتقانىن اتاپ ءوتتى.

«اتالعان مەرزىم اياقتالعاننان كەيىن تۇراقتى نەگىزدە سۋديا لاۋازىمىنا تاعايىنداۋ تۋرالى ماسەلە حالىقارالىق ستاندارتتارعا سايكەس سوت تورەلىگى قورىتىندىلارىنىڭ نەگىزىندە جوعارعى سوت كەڭەسىمەن شەشىلۋى قاجەت»، - دەدى ا. راحمەتۋلين.

ا. راحمەتۋلين ءوز سوزىندە مامانداندىرىلعان ماگيستراتۋرانى بىتىرگەن سۋديالىققا كانديداتتارعا قويىلاتىن  بىلىكتىلىك تالاپتارىن كۇشەيتۋ ماسەلەسىنە توقتالدى.

«21-22 جاس بۇل جوعارى زاڭگەرلىك ءبىلىم الۋ كەزەڭى. 25-27 جاس سوت تورەلىگى ينستيتۋتىنا ماگيستراتۋرادا ءبىلىم الۋ ءۇشىن تۇسەتىن ۋاقىت. 28-29 جاستا ءبىر جىلدان ءۇش جىلعا دەيىنگى سىناق مەرزىمىمەن سوت لاۋازىمىنا تاعايىندالۋ ءۇشىن بايقاۋعا قاتىسۋى قاجەت»، دەدى سوت القاسىنىڭ ءتوراعاسى.  

ونىڭ سوزىنە قاراعاندا، ودان كەيىن 30-32 جاستا پرەزيدەنتتىڭ سۋديا لاۋازىمىنا تاعايىنداۋ تۋرالى جارلىعى شىعۋى كەرەك.

«مامانداندىرىلعان ماگيستراتۋرادا سۋديا لاۋازىمىنا بىلىكتىلىك ەمتيحانىن تاپسىرۋ بارىسىندا مىندەتتى پسيحولوگيالىق تەستىلەۋ ەنگىزۋ قاجەت»، - دەدى ول.

 اۆتور: مارلان جيەمباي