قازاقستان پرەزيدەنتى ماسكەۋدە ءبىرقاتار ەكىجاقتى كەزدەسۋلەر وتكىزدى
ناقتىراق ايتقاندا، ەلباسى ب ۇ ۇ باس حاتشىسى پان گي مۋنمەن كەزدەسىپ، ىنتىماقتاستىقتىڭ نەگىزگى باعىتتارى، ونى ءارى قاراي جانداندىرۋ مۇمكىندىكتەرى، سونداي-اق تۇرلى سالالارداعى بىرلەسكەن جوبالاردى جۇزەگە اسىرۋ ماسەلەلەرىن تالقىلادى.
***
ازەربايجان رەسپۋبليكاسىنىڭ پرەزيدەنتى يلحام اليەۆپەن كەزدەسۋ بارىسىندا ەكى ەلدىڭ ساۋدا-ەكونوميكا، ينۆەستيسيا جانە كولىك-ترانزيت سالالارىنداعى ءوزارا ىقپالداستىقتىڭ نەگىزگى جايتتارى تۋرالى ءسوز قوزعالدى.
مەملەكەتتەر باسشىلارى وڭىرلىك جانە حالىقارالىق كۇن تارتىبىندەگى وزەكتى ماسەلەلەر جونىندە دە پىكىر الماستى.
***
قازاقستان پرەزيدەنتى نۇرسۇلتان نازاربايەۆ پەن ۆەنەسۋەلا بوليۆاريان رەسپۋبليكاسىنىڭ پرەزيدەنتى نيكولاس مادۋرو ەكىجاقتى ساۋدا-ەكونوميكالىق ىنتىماقتاستىق ماسەلەلەرىن، سونداي-اق وسى بايلانىستاردى كەڭەيتۋدىڭ كەلەشەگىن تالقىلادى.
***
موڭعوليا پرەزيدەنتى ساحياگين ەلبەگدورجپەن كەزدەسۋ بارىسىندا ساۋدا-ەكونوميكا سالاسىنداعى ەكىجاقتى ىقپالداستىقتىڭ قازىرگى احۋالى مەن كەلەشەگى قاراستىرىلدى.
مەملەكەتتەر باسشىلارى حالىقارالىق كۇن تارتىبىندەگى مەيلىنشە وزەكتى ماسەلەلەر تۋرالى پىكىر الماستى.
***
قازاقستان پرەزيدەنتى نۇرسۇلتان نازاربايەۆ پەن كۋبا رەسپۋبليكاسىنىڭ مەملەكەتتىك كەڭەسى مەن مينيسترلەر كەڭەسىنىڭ ءتوراعاسى راۋل كاسترو ەكى ەلدىڭ ءتۇرلى سالاداعى ءوزارا ىقپالداستىعىن نىعايتۋدىڭ نەگىزگى اسپەكتىلەرىن قاراستىردى.
***
سەربيا رەسپۋبليكاسىنىڭ پرەزيدەنتى توميسلاۆ نيكوليچپەن كەزدەسۋدە ساۋدا-ەكونوميكالىق ىنتىماقتاستىقتى ءارى قاراي دامىتۋدىڭ نەگىزگى باعىتتارى، سونداي-اق ەكى ەلدىڭ حالىقارالىق ۇيىمدار اياسىنداعى ءوزارا ءىس-قيمىلدارى تالقىلاندى.
سونىمەن قاتار، حالىقارالىق كۇن تارتىبىندەگى وزەكتى ماسەلەلەر جونىندە پىكىر الماسىلدى.
***
چەحييا رەسپۋبليكاسىنىڭ پرەزيدەنتى ميلوش زەمانمەن اڭگىمەدە چەح كوشباسشىسىنىڭ قازاقستانعا بىلتىرعى ساپارى كەزىندە جاسالعان ۋاعدالاستىقتاردىڭ جۇزەگە اسىرىلۋ بارىسى سوز بولدى.
ەكى مەملەكەتتىڭ كوشباسشىلارى قارىم-قاتىناستاردىڭ جۇيەلى دامۋ سيپاتىن اتاي كەلە، ودان ءارى كەڭەيە بەرەتىنىنە ءۇمىت ءبىلدىردى.
***
وڭتۇستىك افريكا رەسپۋبليكاسىنىڭ پرەزيدەنتى دجەيكوب زۋمامەن كەزدەسۋدە ساياسي جانە ساۋدا-ەكونوميكالىق سالالارداعى ءوزارا ىقپالداستىقتى نىعايتۋ ماسەلەلەرى قاراستىرىلدى.
تاراپتار سونداي-اق، ءبىرقاتار پەرسپەكتيۆالى سالالار بويىنشا، حالىقارالىق ۇيىمدار اياسىنداعى ىنتىماقتاستىقتى كەڭەيتۋدىڭ قاجەتتىگىن اتاپ ءوتتى.
