قازاقستان پرەزيدەنتى ءبىرقاتار مەملەكەتتەر ە ا ە و-پەن ساۋدا-ەكونوميكالىق قاتىناستار ورناتۋ ۇسىنىسىمەن شىعۋدا - ەلباسى
دەپ حابارلايدى اقوردانىڭ باسپاءسوز قىزمەتىنەن.
كەزدەسۋگە پرەزيدەنتتەر - قازاقستاننان - نۇرسۇلتان نازاربايەۆ، ارمەنيادان - سەرج سارگسيان، بەلارۋس رەسپۋبليكاسىنان - الەكساندر لۋكاشەنكو، قىرعىزستاننان - المازبەك اتامبايەۆ، رەسەي فەدەراسياسىنان ۆلاديمير پۋتين، سونداي-اق ەۋرازيالىق ەكونوميكالىق كوميسسيا القاسىنىڭ ءتوراعاسى ۆ.حريستەنكو قاتىستى.
مەملەكەتتەر باسشىلارى ەۋرازيالىق ەكونوميكالىق وداق قىزمەتىنىڭ قازىرگى ماسەلەلەرىن، ۇيىم اياسىنداعى سەرىكتەستىكتى تەرەڭدەتۋ مەن حالىقارالىق ىنتىماقتاستىق اياسىن كەڭەيتۋ كەلەشەگىن، سونداي-اق قىرعىزستاننىڭ وداققا قوسىلۋ ۇدەرىسىن تالقىلادى.
وتىرىسقا قاتىسۋشىلارعا ارناعان سوزىندە نۇرسۇلتان نازاربايەۆ ەۋرازيالىق ەكونوميكالىق وداق قۇرۋ تۋرالى شارتقا قول قويىلعانىنا ءبىر جىل تولعاندا ءوتىپ وتىرعان كەزدەسۋدىڭ ايرىقشا سيپاتىن اتاپ ايتتى.
- مۇددەلەر تەڭدىگى، پراگماتيزم جانە كەزەڭدىلىك قاعيداتتارىنا نەگىزدەلگەن ينتەگراسيالىق بىرلەستىك ءبىزدىڭ مەملەكەتتەرىمىزدى جانە ەكونوميكالارىمىزدى الەمدىك داعدارىستىڭ كۇردەلى جاعدايىندا نىعايتۋعا قابىلەتتى ەكەنىنە سەنىمدىمىن. ە ا ە و جۇمىسى تۇبەگەيلى باستالعالى بەرى ءبىزدىڭ قاتارىمىز ارمەنيا جانە قىرعىزستاننىڭ قوسىلۋى ارقىلى تولىقتى. بىرلەسكەن ىنتىماقتاستىق بولاشاقتا ەلدەرىمىزدىڭ بايلانىسىن نىعايتىپ، ەۋرازيالىق وداقتىڭ دامۋىنا تىڭ سەرپىن بەرەرى انىق، - دەدى قازاقستان پرەزيدەنتى.
مەملەكەت باسشىسى حالىقارالىق قوعامداستىقتىڭ بۇل ەكونوميكالىق بىرلەستىككە قىزىعۋشىلىعى ارتىپ كەلە جاتقانىنا توقتالدى.
- بۇگىندە ءبىرقاتار مەملەكەتتەر بىزگە ساۋدا-ەكونوميكالىق قاتىناستار ورناتۋ، ەركىن ساۋدا ۇسىنىسىمەن شىعۋدا. ماسەلەن، ۇكىمەتارالىق كەڭەس وتىرىسىنىڭ اياسىندا ە ا ە و مەن ۆەتنام اراسىندا ەركىن ساۋدا ايماعى تۋرالى ءبىرىنشى كەلىسىمگە قول قويۋ جوسپارلانىپ وتىر. كەلىسىم جوباسى قازىر مەملەكەتىشىلىك ۇدەرىستە قاراستىرىلىپ جاتىر. سونداي-اق بۇگىندە قىتاي حالىق رەسپۋبليكاسىمەن سەرىكتەستىك جانە ىنتىماقتاستىق تۋرالى كەلىسىم جاساۋ جونىندەگى كەلىسسوزدەردى باستاۋ ماسەلەسى كۇن تارتىبىندە تۇر. تۇركيا، يران، ءۇندىستان، موڭعوليا، ازەربايجان وسى كەزەڭدەگى كەلەسى الەۋەتتى سەرىكتەستەر بولا الار ەدى، - دەدى نۇرسۇلتان نازاربايەۆ.
قازاقستان پرەزيدەنتى قابىلدانعان شەشىمدەردى جۇزەگە اسىرۋ جۇمىسى ۇكىمەت تاراپىنان دا، كوميسسيا تاراپىنان دا جۇيەلى جانە ءبىرىزدى ىڭعايدان كەلۋدى تالاپ ەتەتىنىنە نازار اۋداردى.
- بارلىق ۋاعدالاستىقتاردى كەزەڭ-كەزەڭمەن ىسكە اسىرۋ مەرزىمدەرىن ءبىز ايقىنداپ الدىق. ۇيىمىمىز بىرتىندەپ بارىنشا ءتيىمدى سيپات الىپ كەلەدى، قاجەتتى شارتتىق بازا قالىپتاسۋدا. ونىڭ ورنىقتى دامۋى وسىعان نەگىزدەلەدى، - دەدى مەملەكەت باسشىسى.
نۇرسۇلتان نازاربايەۆ الەمدەگى كۇردەلى ەكونوميكالىق جاعدايعا قاراماستان، ە ا ە و وزىنە مۇشە ەلدەردىڭ بارلىعىنىڭ يگىلىگى جولىندا بۇدان ءارى دامۋ ءۇشىن زور الەۋەتكە يە ەكەنىنە سەنىم ءبىلدىردى.
- قازىر، داعدارىس پەن باتىستىڭ سانكسيالىق ساياساتى جاعدايىندا تاۋار اينالىمىنىڭ تومەندەۋى بايقالادى. ءبىراق ءبىزدىڭ قارىم-قاتىناسىمىزدىڭ جالپى جاعدايى سونداي - كاسىپورىندار مەن تاۋارلاردىڭ اۋىسۋى، بىرلەسكەن كاسىپورىنداردىڭ قۇرىلۋى ۇدەرىسى ءجۇرىپ جاتىر. ءبىز دۇرىس جولدا كەلەمىز دەپ سانايمىن. قازاقستان ەلدەرىمىزدىڭ اراسىنداعى ساۋدا-ەكونوميكالىق ىنتىماقتاستىڭ وراسان الەۋەتىنە يە ەۋرازييالىق ەكونوميكالىق وداق جۇمىسىنا اسا زور ماڭىز بەرىپ كەلدى جانە سولاي بولا دا بەرەدى. ءبىز ءوزارا ءتيىمدى قۇجاتتاردى ازىرلەۋ مەن قابىلداۋ ءۇشىن قاجەتتى كۇش-جىگەردى جۇمىلدىراتىن بولامىز، - دەدى قازاقستان پرەزيدەنتى.
وتىرىس بارىسىندا مەملەكەتارالىق ىنتىماقتاستىقتى ءتۇرلى سالالاردا ودان ءارى دامىتۋعا باعىتتالعان ءبىرقاتار قۇجاتتارعا قول قويىلدى.
