13:03, 08 - مامىر 2015 | GMT +5
ازيا چەمپيوناتىندا قازاقستاندىق داۋلەت نيازبەكوۆ «التىن» جەڭىپ الدى
استانا. قازاقپارات - قازاقستاندىق داۋلەت نيازبەكوۆ ەركىن كۇرەستەن كاتاردا ءوتىپ جاتقان ازيا چەمپيوناتىنىڭ التىن جۇلدەسىن جەڭىپ الدى، - دەپ حابارلايدى Vesti.kz.
قۇرلىقتىق چەمپيوناتتىڭ ەكى دۇركىن قولا جۇلدەگەرى، سونىمەن قاتار الەم چەمپيوناتىنىڭ ءۇشىنشى ورىن يەگەرى داۋلەت نيازبەكوۆ 61 كەلىگە دەيىنگى سالماق دارەجەسىندە سىنعا ءتۇستى. سوڭعى كەزدەسۋدە ول يراندىق بەحنام ەحسونپۋرانى جەڭدى. جاپونيالىق ماساكۋزۋ كاموي مەن موڭعول نورمين باتبولد ۇزدىك ۇشتىككە ەندى.
ايتا كەتەيىك، ازيا چەمپيوناتىندا ايەلدەر اراسىندا قازاقستاندىق تاتيانا امانجول- باكاتۇك (48 كەلىگە دەيىن) جانە ايىم ءابدىلدينا (58 كەلىگە دەيىن) قولا جۇلدەگە يە بولدى.
قۇرلىقتىق تۋرنير 10- مامىرعا دەيىن جالعاسادى.
