ق ح ر- مەن تاتۋ كورشىلىك قارىم-قاتىناستى دامىتا ءتۇسۋ قازاقستاننىڭ سىرتقى ساياساتىنداعى باسىم باعىت - ن. نازاربايەۆ - فوتو
بۇگىن اقوردادا ەلىمىزگە رەسمي ساپارمەن كەلگەن قىتاي حالىق رەسپۋبليكاسىنىڭ ءتوراعاسى شي جينپيڭمەن كەڭەيتىلگەن قۇرامداعى كەزدەسۋ بارىسىندا ق ر پرەزيدەنتى نۇرسۇلتان نازاربايەۆ وسىلاي مالىمدەدى.
«ەڭ الدىمەن، ءسىز قازاقستانعا ءبىزدىڭ ەلىمىزدە وتكەن پرەزيدەنتتىك سايلاۋدان كەيىن قادام باسىپ وتىرعان العاشقى مەملەكەت باسشىسىز. وسى ارقىلى ءسىز ءبىزدىڭ قاتىناستارىمىزدىڭ جوعارى دەڭگەيىن، وعان ەرەكشە ءمان بەرەتىنىڭىزدى راستاپ وتىرسىز. ءسىز، مەنىمەن تەلەفون ارقىلى دا حابارلاسىپ، جەدەلحات جولداعانسىز، ەندى كەلىسسوزدەر ءۇشىن ءوزىڭىز دە كەلىپ وتىرسىز. ءبىز بۇنى جوعارى باعالايمىز»، - دەدى ن. نازاربايەۆ كەڭەيتىلگەن قۇرامداعى كەزدەسۋدە.
سونىمەن قاتار، ەلباسى قىتاي حالىق رەسپۋبليكاسىمەن تاتۋ كورشىلىك قارىم-قاتىناستى دامىتا ءتۇسۋ قازاقستاننىڭ سىرتقى ساياساتىنداعى باسىمدىقتاردىڭ ءبىرى ەكەنىن اتاپ ءوتتى. پرەزيدەنتتىڭ ايتۋىنشا، ءوزارا بايلانىستار ورناعان جىلدارى قازاقستان مەن قىتاي ەكىجاقتى ىنتىماقتاستىقتىڭ ساپالى ترانسفورماتسياسىن جۇزەگە اسىرا الدى. «قازاقستاننىڭ تاۋەلسىزدىگى جاريالانعان العاشقى كۇننەن باستاپ، ءبىز قىتاي حالىق رەسپۋبليكاسىمەن بايلانىستى جانداندىرىپ، تاتۋ كورشىگە، سەنىمدى دوسقا اينالدىق. سىندارلى ەكونوميكالىق ارىپتەس بولدىق. بىزدە ەكى ەلدىڭ مۇددەسىنە ساي، ەكىجاقتى قارىم-قاتىناستى ودان ءارى دامىتا تۇسۋگە بارلىق جاعداي، وسى باعىتتا ايقىندالعان ناقتى جوسپارلار بار. ونىڭ ءبارى قازاقستان - قىتاي قاتىناسىن الدەقايدا جاڭا ءارى جوعارى ساپالى دەڭگەيگە شىعارادى. وسىنىڭ ءبارى تىكەلەي ءسىزدىڭ جانە قىتاي باسشىلىعىنىڭ قولداۋىنىڭ ارقاسىندا بولىپ وتىر. وسى ءۇشىن دە مەن سىزگە زور ريزاشىلىعىمدى بىلدىرەمىن»، - دەدى ەلباسى ن. نازاربايەۆ.
اۆتور: قانات مامەتقازى ۇلى
