اقوردادا قازاقستان پرەزيدەنتى مەن ق ح ر ءتوراعاسى كەلىسسوزدەر جۇرگىزۋدە

 استانا. قازاقپارات - ءدال وسى ۋاقىتتا اقوردادا ق ر پرەزيدەنتى نۇرسۇلتان نازاربايەۆ پەن ەلىمىزگە رەسمي ساپارمەن كەلگەن قىتاي حالىق رەسپۋبليكاسىنىڭ ءتوراعاسى شي جينپين اراسىنداعى كەلىسسوزدەر وتۋدە.

ايتا كەتەيىك، بۇعان دەيىن ق ح ر سىرتقى ىستەر ءمينيسترىنىڭ ورىنباسارى چىن گوپيڭ  ق ح ر ءتوراعاسىنىڭ قازاقستانعا ساپارى قايتا پرەزيدەنت بولىپ سايلانعان ەلباسى نۇرسۇلتان نازاربايەۆتى ساياسي قولداۋ بەلگىسى رەتىندە وتەتىندىگىن ايتقان بولاتىن. جالپى، شي جينپين ەلىمىزگە سوڭعى رەت 2013 -جىلى كەلگەن ەدى.

  ق ح ر سىرتقى ىستەر مينيسترلىگىنىڭ اتاپ وتۋىنشە، ەكى مەملەكەت باسشىسىنىڭ كەزدەسۋىندە «جىبەك جولى ەكونوميكالىق بەلدەۋى» جوباسى قۇرىلىسىن جەدەلدەتۋ جانە ەكى ەل اراسىنداعى ساۋدا قاتىناستارىن دامىتۋ بويىنشا ماسەلەلەر تالقىلانباق.

 قازاقستان مەن قىتاي اراسىنداعى تاۋار اينالىمى 2014 -جىلى 17,2 ميلليارد دوللاردى قۇرادى.

 
  اۆتور: مارلان جيەمباي