ءسىز مىنا ەكى ءتۇرلى ايەلدىڭ قايسىسىنا جاتاسىز؟

استانا. قازاقپارات - ءوزى سۇلۋ، ءوزى اقىلدى، ءبىراق ومىردە سونداي باقىتسىز؟ نەگە؟ تاۋعا دا، تاسقا دا باسى ءتيىپ، ءومىردىڭ كەرمەك ءدامىن تاتىپ ۇلگەرگەن تالاي ارۋلارىمىز بۇل ساۋالعا وزدەرى دە جاۋاپ تابا المايتىن سەكىلدى. بۇگىن عالىمداردىڭ الەۋمەتتىك زەرتتەۋلەرىن ۇسىنامىز.

«ايەل باسىنا تۇسەتىن بار بالە اقىلىنان نەمەسە پاراساتتىلىقتىڭ جەتىسپەۋ سالدارى» دەگەن كىتاپتاعى اقىلدى مەن پاراساتتى ايەل ايىرماسىنا بەرىلگەن تۇسىنىكتەمەنى بەرە كەتسەك دەيمىز. بۇدان قورتاتىن وي: ايەل باقىتى اقىلىندا ەمەس پاراساتىندا.

سونىمەن اقىلدى نازىك جاننىڭ پاراساتتىسىنان ايىرماسى قانداي؟..

سەبەپ-سالدار: كۇيەۋىنىڭ قاتە ءىسىن نەمەسە كەمشىلىگىن بايقاعاندا

اقىلدى ايەلدىڭ ارەكەتى: كۇيەۋىنىڭ قاتەسىن نەمەسە كەمشىلىگىن كوزىنە شۇقىپ كورسەتىپ، الدىندا وسىلاي بولاتىنىن ەسكەرتكەنىن ايتادى.

پاراساتتى ايەلدىڭ ارەكەتى: كۇيەۋىنىڭ قاتەسىن نەمەسە كەمشىلىگىن كورمەگەن بولا سالادى؛ كەيدە ارقاسىنان قاعىپ، ادامدار ءوز قاتەلىگىنەن ساباق الاتىنىن ايتىپ، كەلەسى جولى ونىڭ مىندەتتى تۇردە جولى بولاتىنىن مەڭزەيدى

سەبەپ-سالدار: وتباسى قيىن-قىستاۋ كەزەڭگە تاپ كەلگەندە.

اقىلدى ايەلدىڭ ارەكەتى: بۇكىل جاۋاپكەرشىلىكتى ءوز مويىنىنا العان ايەل كۇيەۋىن قالاي دۇرىس ءومىر ءسۇرۋ كەرەكتىگىنە ۇيرەتە باستايدى.

پاراساتتى ايەلدىڭ ارەكەتى: كۇيەۋىنە بۇل تىعىرىقتان شىعۋ جولىنا باعىت-باعداردى بايقاتپاي نۇسقاپ، قيىنشىلىقتى ءوزى ەڭسەرگەنىنە قولداۋ ءبىلدىرىپ، دەمەيدى.

سەبەپ- سالدار: بالا تاربيەسى

اقىلدى ايەلدىڭ ارەكەتى: بار كۇش-جىگەرىن بالالارىنىڭ ماتەماتيكا مەن شەت ءتىلىن يگەرۋگە جۇمسايدى.

پاراساتتى ايەلدىڭ ارەكەتى: ال پاراساتتى جان ءار بالاسىنىڭ قانداي قارىم-قابىلەتى بارىن بايقاستاپ، سونى دامىتۋعا، بالانىڭ تۇلعالانۋىنا باسىمدىق بەرەدى.

سەبەپ-سالدار: جۇمىس بابى

اقىلدى ايەلدىڭ ارەكەتى: ول جۇمىستا بارلىعىنان ۇزدىك بوپ العا سۋىرىلىپ شىعىپ، ەشقاشان قاتەلىك جىبەرمەۋگە تىرىسادى. ءبىراق سوعان قاراماستان ۇجىمداعى ادامدار ودان اياعىن تارتىپ ۇستايدى.

پاراساتتى ايەلدىڭ ارەكەتى: ول ۇجىمدى ماحاببات پەن جىلۋلىققا بولەپ، ارىپتەستەرىن ەشقانداي جاماندىققا قيماي، كەيدە سول جولدا ءوز-ءوزىن قۇربان ەتەدى

سەبەپ-سالدار: نەمەرە تاربيەسى

اقىلدى ايەلدىڭ ارەكەتى: بالالارىنا سەنبەي، ۇنەمى اقىل-كەڭەس بەرىپ، بالانى قالاي دۇرىس ءوسىرۋ كەرەكتىگىن ايتىپ، ۇنەمى ومىرلەرىنە ارالاسىپ وتىرادى.

پاراساتتى ايەلدىڭ ارەكەتى: ۇلكەن بالالارىنىڭ ىشكى ومىرىنە ارالاسپايدى، قيىنشىلىقتا دا، جاقسىلىقتا دا ۇنەمى جاندارىندا انا ماحابباتىمەن جىلىتىپ، قولعابىس ەتىپ، قولداپ-كومەكتەسىپ جۇرەدى، بالالارىنىڭ تاڭداۋىمەن ساناسادى، سىيلايدى.

سەبەپ-سالدار: اتا-ەنەگە دەگەن قارىم-قاتىناسى

اقىلدى ايەلدىڭ ارەكەتى: ەنەنىڭ ىقپالىنان شىعۋعا تىرىسىپ، وعان قارسى كۇرەسىپ، ءوزىنىڭ دەگەنىن تالاپ ەتىپ، سول ءۇشىن ايقاي-شۋ شىعارادى.

پاراساتتى ايەلدىڭ ارەكەتى: پاراساتتى ايەل جىميۋدى، ءۇنسىز تىڭداۋدى، باس شۇلعىپ كەلىسۋدى ادەت ەتەدى. ءبىراق بارلىعىن ءوز دەگەنىمەن جاسايدى، ارينە بار ىنتا-شىنتاسىمەن جۇزەگە اسىرعاندىقتان، وعان ەشكىم نارازى بولمايدى.

سەبەپ-سالدار: ادامدارعا دەگەن قارىم-قاتىناسى

اقىلدى ايەلدىڭ ارەكەتى: اقىلدى ايەل بار الەمدى وزگەرتىپ، ادامداردى دا تۇزەگىسى كەلەدى

پاراساتتى ايەلدىڭ ارەكەتى: ال پاراساتتى ايەل ءوزى وزگەرىپ، باسقالار قانداي، سونداي قالپىمەن قابىلداۋعا تىرىسادى.

سەبەپ-سالدار: ومىرلىك كوزقاراسى

اقىلدى ايەلدىڭ ارەكەتى: كىم دۇرىس ادام، سول باقىتتى دەپ ويلايدى.

پاراساتتى ايەلدىڭ ارەكەتى: كىم باقىتتى سونىكى دۇرىس دەپ سانايدى.

«الاش ايناسى»