ءبىز ۇلى جەڭىستى ماڭگىلىك ۇلىقتاپ وتەتىن بولامىز - ەلباسى - فوتو
«بۇل ۇلى وتان سوعىسىنداعى جەڭىمپازدار مەن بۇگىنگى وتان قورعاۋشىلاردىڭ اراسىنداعى اسكەري داستۇرلەردىڭ ساباقتاستىعىن اڭعارتادى. مايدانداعى ايبىندى ەرلىك، تىلداعى قاجىماس قايراتتى ەڭبەك سول جەڭىستىڭ شەشۋشى كۇشى بولدى. مەن سوعىس جانە ەڭبەك ارداگەرلەرىن شىن جۇرەكتەن قۇتتىقتايمىن»، - دەدى ەلباسى.
سونىمەن قاتار، مەملەكەت باسشىسى بۇگىن ەلىمىزدىڭ ايبىندى ساربازدارى سالتاناتتى مارشپەن «قازاق ەلى» الاڭىنان ءجۇرىپ وتەتىنىن ايتىپ، بۇنىڭ ۇلى جەڭىسكە جانە وتان قورعاۋشىلارعا دەگەن ەرەكشە قۇرمەت كۇنى ەكەنىن العا تارتتى.
«قىمباتتى قازاقستاندىقتار! ەلىمىزدىڭ شەبى ءبۇتىن، شەكاراسى بەرىك بولسىن. وتانىمىز تىنىشتىققا بولەنە بەرسىن. ماڭگىلىك ەلىمىز مىزعىماس بەيبىتشىلىكتە بولسىن. بايراعىمىز بيىكتە جەلبىرەپ، ابىرويىمىز اسقاق بولسىن. ايبىندى ارميامىز جاساسىن! قازاقستان جاساسىن! ۋرا!»، - دەدى ن. نازاربايەۆ ءسوز سوڭىندا.
جوعارعى باس قولباسشىنىڭ جالىندى ءسوزىن بارلىق ساردارلار مەن ساربازدار ءىلىپ اكەتىپ، ۋرالادى. سوسىن اسكەريلەر قازاقستان رەسپۋبليكاسىنىڭ ءانۇرانىن شىرقاپ، ونىڭ سوڭىنان سالتاناتتى شەرۋ باستالىپ كەتتى.
اۆتور: قانات مامەتقازى ۇلى
