اتاقتى مايدانگەر، اقىن يون دەگىن جايلى «قازاقپارات» اگەنتتىگىنىڭ ءتىلشىسى جاپپاربەرگەن ايبوتانىڭ كىتابى جارىق كوردى
تۋىندى يون دەگەننىڭ «ۆوينا نيكوگدا نە كونچاەتسيا» اتتى اۆتوبيوگرافيالىق ەڭبەگىنەن اۋدارىلعان. وندا كەيىپكەردىڭ 16 جاسىنان سوعىسقا اتتانعانى، قان مايداندا ۆزۆود كومانديرى بولىپ جاۋعا قارسى ەرلىكپەن شايقاسقانى، سوعىستىڭ سوڭعى جىلىندا تانك روتاسىنىڭ كومانديرى بولىپ ءجۇرىپ كورسەتكەن ەرلىكتەرى سۋرەتتەلەدى.
كىتاپ «توعاناي ت» باسپاسىنان 100 دانا كولەمدە باسىلىپ شىقتى.
اۆتور اتاقتى تۇلعانىڭ ەرلىككە تولى ونەگەلى ءومىرى قازاق وقىرماندارىنا جەتۋىن قالاعانىن ايتادى.
«وسى ەڭبەكتى جازۋعا مەنى ونىڭ ونەگەلى ءومىرى، ومىرلىك ۇستانىمى شابىتتاندىردى. ءتىپتى، سوعىس جىلدارىنان سوڭ دا يون لازار ۇلى ادامزاتقا قىزمەت ەتۋىن جالعاستىردى. وسىنداي تۇلعالاردىڭ ءومىرىن ناسيحاتتاۋ بولاشاق ۇرپاقتىڭ پاتريوتتىق رۋحىن ارتتىرارى ءسوزسىز»، - دەدى «قازاقپارات» اگەنتتىگىنىڭ الماتىداعى ءتىلشىسى جاپپاربەرگەن ايبوتا.
ايتا كەتۋ كەرەك، اۆتور اقىن تۋىندىسىن ءوز قارجىسىنا شىعارعان. بولاشاقتا الماتىداعى كىتاپحانالارعا تەگىن تاراتىپ شىعۋدى جوسپارلاپ وتىر.
سوعىس تۋرالى ەڭ قاتال پوەتيكالىق شىعارمانىڭ اۆتورى ۇلتى يەۆرەي يون لازار ۇلى دەگەن ەكەنىن ءبىرى بىلسە، ءبىرى بىلە بەرمەيدى.
1925 - جىلى موگيليەۆ- پودولسكىدە تۋعان يون دەگىن 1941 - جىلى 9 - سىنىپتى بىتىرگەن سوڭ ءوز ەركىمەن مايدانعا اتتانادى. بۇكىل سوعىس بارىسىندا الدىڭعى شەپتەن كورىندى.
الدىمەن بارلاۋدا، كەيىن ت-34 تانكىسىنىڭ كومانديرى، تانك روتاسىنىڭ كومانديرى بولعان. بىرنەشە رەت وق ءتيىپ جارالانعان. ءتىپتى، دارىگەرلەردىڭ ءوزى ونىڭ ايىعىپ كەتەتىنىنە سەنبەگەن. ءبىراق اركەز گوسپيتالدان شىققان سوڭ بىردەن مايدانعا اتتانىپ وتىرعان. جەتى رەت وق ءتيىپ جارالانعان. باس سۇيەگىندە جارىقشاق بار. سول جاق باس سۇيەگىنىڭ جوعارعى جاعى مايدالانىپ كەتكەن سۇيەكتەردەن جينالعان. « قىزىل تۋ» ، 1- دارەجەلى «وتان سوعىسى» ، Ⅱدارەجەلى «وتان سوعىسى» اسكەري وردەندەرىمەن، پولشانىڭ گريۋنۆالد كرەستى وردەنىمەن ماراپاتتالعان.
سوعىس اياقتالعان سوڭ باسشىلىقتىڭ قارسىلىعىنا قاراماستان اسكەري قىزمەتتەن بوساپ، مەديتسينالىق ينستيتۋتقا ءتۇستى. نەگىزگى جۇمىسىنان باسقا كوپ ۋاقىتىن ادەبي ەڭبەككە جۇمسادى. ماماندىعى بويىنشا ءبىر ۇلكەن كىتاپ، 90 ماقالا جاريالاعان. كوركەم شىعارمالاردان پروزا مەن ولەڭدەردەن تۇراتىن 9 كىتابى جارىق كورگەن.
پروفەسسور يون دەگىن - يزرايلدىڭ ورتوپەديا جانە تراۆماتولوگيا سالاسىنىڭ الدىڭعى قاتارلى ماماندارىنىڭ ءبىرى. قازىر زەينەت جاسىندا. يزرايلدىڭ گۆيتايم قالاسىندا تۇرىپ جاتىر.
قاريا ءوزى تۋرالى ەڭبەكتىڭ قازاق تىلىندە جارىق كورگەنىنە ۇلكەن رازىلىعىن بىلدىرگەن. ويتكەنى، ول كىسىنىڭ بىرنەشە جىل ءومىرى قوستاناي وبلىسىندا دارىگەرلىك قىزمەتپەن وتكەن.
اۆتورمەن حابارلاسقان كەزدە، قازاق حالقىن جاقسى كورەتىنىن ءبىلدىرىپ، ىستىق سالەم جولداعان.
اۆتور: گۇلميرا عوسمانالي
