قازاقستاندا جۇرگىزىلىپ جاتقان رەفورمالار بارشا ورتالىق ازياعا تارالۋى مۇمكىن

استانا. قازاقپارات - قازاقستاندا جۇرگىزىلىپ جاتقان ساياسي جانە ەكونوميكالىق رەفورمالار ورتالىق ازيانىڭ بارشا ەلدەرىنە تارالسا جاقسى تاجىريبە بولار ەدى.

بۇنداي پىكىردى بۇگىن استانادا ءوتىپ جاتقان «قازاقستاندىق جول - بولاشاعى ءبىر ۇلت» اتتى حالىقارالىق ساياساتتانۋشىلار كونگرەسىندە جوعارى گەوساياسي زەرتتەۋلەر جانە ارالاس عىلىمدار ينستيتۋتىنىڭ پرەزيدەنتى (يتاليا) تيبەريو گراتسياني ايتتى.

«پرەزيدەنت نازاربايەۆتا ۇزاق مەرزىمدى ساياسات بار جانە ول ەكى جىل بۇرىن جاريالانعان «قازاقستان-2050» باعدارلاماسىنا سايكەس كەلەدى. اتاپ ايتقاندا، قازاقستان حالىقارالىق الاڭداعى ءوزىنىڭ ءرولىن جاقسى تۇسىنەدى. ورتالىق ازيا وڭىرىندە، جالپى بارشا الەمدەگى وزىندىك ءرولىن ايقىن ءتۇسىنىپ وتىر. قازاقستاندا ءجۇرىپ جاتقان ساياسي جانە ەكونوميكالىق رەفورمالار كەيىننەن ورتالىق ازيانىڭ بارلىق ەلدەرىنە تارالۋى مۇمكىن»، - دەپ توقتالدى ساياساتتانۋشى.

ت. گراتسياني قازىرگى كەزدە قازاقستان جاھاندىق ەكونوميكالىق داعدارىستى ەڭسەرۋ ءۇشىن ەلەۋلى كۇش-جىگەر جۇمساپ جاتقاندىعىنا ايتا كەلە: «ەۋرازيالىق ەكونوميكالىق وداق - ول ورتالىق ازيا وڭىرىندە جانە جالپى الەمدە داعدارىستى ەڭسەرۋدىڭ جاقسى شاراسى»، - دەدى.

اۆتور: رۋسلان عابباسوۆ