ەلباسى سوعىس جانە تىل ارداگەرلەرىنە تاۋەلسىزدىگىمىزدىڭ ءتول ناگرادالارىن تاپسىردى
«قادىرلى قاۋىم، ارداگەرلەر مەن اسكەري، قۇقىق قورعاۋ، ارنايى قىزمەت قىزمەتكەرلەرى! ەڭ الدىمەن بارشاڭىزدى ەرتەڭگى اتاپ وتەتىن وتان قورعاۋشىلار كۇنىمەن قۇتتىقتايمىن. ءبىز 1992 -جىلى 7 - مامىردا قازاقستاننىڭ اسكەرىن قۇرعان بولاتىنبىز. بۇل كۇن - ءبىز ءۇشىن وتان قورعاۋشىلار كۇنى. ەكىنشىدەن، بۇل مەرەكە ۇلى وتان سوعىسىنداعى جەڭىستىڭ 70 جىلدىعىمەن قاتار كەلىپ وتىر. وسى ەكى مەرەكەمەن بارشالارىڭىزدى قۇتتىقتايمىن» ، - دەدى ق ر پرەزيدەنتى.
مەملەكەت باسشىسى اتالعان مەرەكەلەرگە وراي ارنايى جارلىق شىعارىپ، ءبىراز ازاماتتاردى ماراپاتتاۋدى ۇيعارعانىن، ماراپاتقا ەرەن ەڭبەگىمەن قالتقىسىز قىزمەت ەتكەن جاندار كىرگەنىن اتاپ ءوتتى.
«وسى جولى ۇلى وتان سوعىسى ارداگەرلەرى مەن تىل ارداگەرلەرىنە تاۋەلسىزدىگىمىزدىڭ ءتول ناگرادالارى تاپسىرىلاتىن بولادى. قازاقستان بويىنشا كوپ ازاماتتار ماراپاتتالدى. مەنىڭ ۋاكىلدەرىم جەر- جەردە ونى تابىستايدى. سىزدەرگە تابىستاعانىم سولاردىڭ بارلىعىنا بىردەي تابىستاعانىم بولىپ سانالادى» ، - دەدى ەلباسى.
«بۇگىنگى ۇرپاق 70 جىلدىعى اتاپ وتىلەتىن ۇلى جەڭىستى الىپ بەرگەن اعا بۋىننىڭ الدىندا ءار ۋاقىتتا قارىزدارمىز. مەملەكەت باسشىسى رەتىندە مەن بۇكىل ەل اتىنان سىزدەرگە مىڭ العىس ايتامىن، ارداقتى ارداگەرلەر. قازاق حالقى ءاردايىم ەر جىگىت ەلدىڭ قورعانى دەپ كەلگەن. بۇگىنگى ءراسىم سول سەنىم ۇددەسىنەن شىققان ساڭلاقتارعا دەگەن مەملەكەتتىڭ سىي قۇرمەتى بولىپ تابىلادى» ، - دەدى ەلباسى.
مەملەكەت باسشىسى ەر- ازاماتقا قاستەرلى تاۋەلسىزدىكتى، تۋعان وتاندى قورعاپ، ەل تىنىشتىعىن كۇزەتۋدەن اسقان مارتەبە بولماۋى كەرەكتىگىن باسا ايتتى.
سول ابىرويلى بورىشتى ادال اتقاردىڭىزدار جانە اتقارىپ كەلەسىزدەر. سىزدەر بەيبىت كۇندە دە باتىرلىققا ورىن بار دەپ سوعىستان كەيىن ەلگە قىزمەت ەتتىڭىزدەر. قوعامداعى ءتارتىپ پەن تۇراقتىلىقتىڭ ساقتالۋى دا سىزدەردىڭ زور ەڭبەكتەرىڭىزدىڭ ارقاسى. سوندىقتان وتان قورعاۋشىلار ومىرىندە وتان قورعاۋشى ەلدىڭ ورنى قاشاندا ەرەكشە بولعان. بارشاڭىز بىلەسىزدەر، ۇلتتىق اسكەر ەگەمەن ەلدىڭ كۇش قالقانى بولىپ سانالادى. ونىڭ باستى مىندەتى - ۇلت پەن ۇلىستىڭ تىنىشتىقىعىن قامتاماسىز ەتۋ» ، - دەدى ق ر پرەزيدەنتى.
اۆتور: مارلان جيەمباي
