ەلباسى قازاقستاندىقتاردى وتان قورعاۋشىلار كۇنىمەن قۇتتىقتادى

استانا. قازاقپارات - بۇگىن اقوردادا ق ر پرەزيدەنتى نۇرسۇلتان نازاربايەۆ قارۋلى كۇشتەردىڭ، قۇقىق قورعاۋ جانە ارنايى ورگانداردىڭ وكىلدەرىنە جوعارى اسكەري شەن مەن اتاقتار تابىس ەتتى.

«قۇرمەتتى ساردارلار، گەنەرالدار مەن وفيتسەرلەر، وتان قورعاۋشىلار كۇنى 7- مامىر ەكەنىن بىلەسىزدەر. ۇلى جەڭىستىڭ 70 جىلدىق مەرەيتويى الدىندا كەزدەسىپ وتىرمىز. وسى ەكى مەرەكەمەن سىزدەردى شىن جۇرەگىمنەن قۇتتىقتايمىن. ءبىز ەرلىك پەن ەلدىكتىڭ ايبىنىن اسقاقتاتا تۇسەتىن وسى ەكى مەرەكەنى بىرگە اتاپ ءوتۋدى داستۇرگە اينالدىرعانبىز»، - دەدى ق ر پرەزيدەنتى.

مەملەكەت باسشىسى ءبىزدىڭ بەيبىت ءومىرىمىزدى قاس قاقپاي كۇزەتەتىن ۇلتتىق ارميامىز بۇگىندە كەمەلىنە كەلگەنىن، ەرتەڭ اسكەرىمىزدى قۇرعانىمىزعا 23 جىل بولاتىندىعىن اتاپ ءوتتى.

«ول - تاۋەلسىزدىگىمىز بەن تۇتاستىعىمىزدىڭ تىرەگى. حالقىمىزدا «باتىر تۋسا - ەل ىرىسى» دەگەن ءسوزى بار. سوندىقتان اسىرەسە قولباسشىلار، گەنەرالدار، وفيتسەرلەر ءوزىنىڭ جۇمىس ىستەيتىن وڭىرىندە باسشى بولىپ، ۇلگى بولىپ سانالادى. باۋىرجان مومىش ۇلىنىڭ «ەلىڭدى سۇيمەي ەرلىك ىستەي المايسىڭ» دەگەن ءسوزى بار. سوندىقتان سىزدەردى پاتريوتتار دەپ سانايمىن. سىزدەر ءمىنسىز قىزمەت ەتە وتىرىپ، جاس ۇرپاققا وتاندى ءسۇيۋدىڭ ۇلگىسىن كورسەتەسىزدەر»، - دەدى ەلباسى.

سونىمەن قاتار مەملەكەت باسشىسى جوعارى اسكەري شەن مەن اتاق العان ازاماتتاردىڭ بۇل قىزمەتتەرىن مەملەكەت جوعارى باعالايتىندىعىن اتاپ ءوتتى.

«قاستەرلى قاس مەرەكە قارساڭىندا بۇگىن ءداستۇر بويىنشا سىزدەرگە جوعارى اسكەري شەن مەن اتاق تاپسىرايىن دەپ وتىرمىن. لايىقتىلار قاتارىندا قارۋلى كۇشتەر مەن بىرگە قۇقىق قورعاۋ سالاسى، ارنايى ورگاندار وكىلدەرى بار. تۇپتەپ كەلگەندە، ءبارىنىڭ قىزمەتىنىڭ نەگىزى - ول ەلدىڭ تىنىشتىعىن قورعاۋ، حالىقتىڭ قاۋىپسىزدىگىن قامتاماسىز ەتۋ. ادال ەڭبەگىمەنەن ەل دامۋىنا ۇلەس قوسۋ ءار وتانداستارىمىزدىڭ الدىنداعى مىندەتى بولىپ سانالادى»، - دەدى ن. نازاربايەۆ.

اۆتور: مارلان جيەمباي