ەكسپو - قالاشىق كەيىننەن قارجىلىق ورتالىققا اينالماق
«ءبىز بۇل جايىندا كوپ ايتىپ ءجۇرمىز، الايدا قارجىلىق سالادا قازاقستاندى وڭىرلىك كوشباسشى رەتىندەگى مارتەبەسىن ارتتىرا المادىق. قازىرگى كەزدە بۇل تۇرعىدا جاڭا مۇمكىندىكتەر تۋىنداپ وتىر. استانادا جاڭا قارجىلىق ورتالىقتى قۇرۋ ۇسىنىلۋدا. نەگە؟ ءبىز اۋقىمدى ەكسپو - قالاشىقتى سالىپ جاتىرمىز. كورمە اياقتالعاننان كەيىن وسى عيماراتتار بۇنداي ورتالىقتى ورنالاستىرۋعا ساي كەلەدى. مۇمكىن وندا ۇلتتىق بانك تە ورنالاسار»، - دەدى پرەزيدەنت.
مەملەكەت باسشىسى بۇل تۇرعىدا دۋبايدىڭ تاجىريبەسىن پايدالانۋ كەرەكتىگىن اتاپ ءوتتى.
«دۋبايدىڭ ۇلگىسىمەن ينۆەستيتسيالىق رەزيدەنتتىك ۇستانىمىن ەنگىزۋ قاجەت، ال كليەنتتىك قاتىناستاردى نورماتيۆتىك-قۇقىقتىق، كەلىسىم-شارتتىق رەتتەۋگە اۋىستىرۋ كەرەك. دۋباي شەيحىمەن پىكىر الماستىم، ءبىز ولاردىڭ تاجىريبەسىن پايدالانامىز. ءبىزدىڭ ورتالىقتىڭ وزىندىك زاڭناماسى بولادى جانە وندا بارلىعى شەتەلدىك قۇقىقپەن جۇمىس ىستەيدى»، - دەدى ن. نازاربايەۆ.
اۆتور: رۋسلان عابباسوۆ
